“திருமாவளவனை ஈ மொய்ப்பது போல இளைஞர்கள் மொய்க்கிறார்கள்”.. அமைச்சர் வன்னி அரசு சொன்ன காரணம்!
சென்னை: விசிக தலைவர் திருமாவளவன் பங்கேற்கும் நிகழ்வுகளில் அண்மைக்காலமாக முண்டியடித்துக்கொண்டு தொண்டர்கள் திரள்வதால் கூட்ட நெரிசல் ஏற்பட்டு வருவது பற்றிய கேள்விக்கு பதில் அளித்த அமைச்சர் வன்னி அரசு, "ஒரு மாஸ் லீடர் என்றால் எப்போதுமே Mass-ஓடுதான் இருப்பார்கள். திருமாவளவன் இருக்கும் இடத்தில் ஈ மொய்ப்பது போல இளைஞர்கள் வருகிறார்கள்." எனக் கூறியுள்ளார்.
சென்னை விமான நிலையத்தில் அமைச்சர் வன்னி அரசு இன்று செய்தியாளர்களைச் சந்தித்தார். அப்போது பேசிய அவர் இடைத்தேர்தலில் முதல்வர் விஜய் வெகு தீவிர பிரச்சாரம் மேற்கொள்வது பற்றிய கேள்விக்கு பதில் அளித்தார். அவர் பேசுகையில், "இடைத்தேர்தலில் மதச்சார்பற்ற சமூக நீதி கூட்டணியின் வெற்றி வாய்ப்பு மிகவும் பிரகாசமாக உள்ளது. கூட்டணித் தலைவர்களும், தொண்டர்களும் தீவிர பிரசாரத்தில் ஈடுபட்டு வருகின்றனர்.
குறிப்பாக விடுதலைச் சிறுத்தைகள் கட்சியினர், தொகுதிகளில், மிகுந்த உற்சாகத்துடன் களப்பணியாற்றி வருகின்றனர். தவெக அரசின் கடந்த 4 மாத கால சிறப்பான செயல்பாடுகளும், முதலமைச்சரின் திட்டங்களும், மக்கள் மத்தியில் பெரும் நம்பிக்கையை ஏற்படுத்தியுள்ளன. இதன் காரணமாக இடைத்தேர்தலில், எங்கள் கூட்டணிக்கான வெற்றி உறுதியானது.
பொதுத்தேர்தலில், 234 தொகுதிகளிலும் போட்டியிட வேண்டியிருப்பதால், தலைவர்கள் அனைத்து தொகுதிகளுக்கும் சென்று பிரச்சாரம் செய்ய போதிய நேரம் கிடைக்காது. ஆனால், இடைத்தேர்தலில் குறிப்பிட்ட தொகுதிகளில், போதிய நேரம் கிடைப்பதால், தலைவர்கள் தீவிர பிரசாரம் மேற்கொள்வதும், தொண்டர்களை நேரடியாக சந்திப்பதும் இயல்பான ஒன்று.
இடைத்தேர்தலில் தலைவர்கள், தீவிரமாக பிரசாரம் செய்வதை வைத்து தோல்வி பயம் ஏற்பட்டுள்ளதாக கூற முடியாது. கடந்த காலங்களில், நடைபெற்ற இடைத்தேர்தல்களிலும், அனைத்து கட்சித் தலைவர்களும், இதேபோன்று தீவிர பிரசாரம் மேற்கொண்டுள்ளனர்." என்றார்.
பாமக, தவெக கூட்டணியில் இணைய உள்ளதா என்ற கேள்விக்கு பதில் அளித்த வன்னி அரசு, "பாமக எடுக்கும் முடிவுகள் அனைத்தும், பாஜகவின் விருப்பத்திற்கு உட்பட்டதாகவே உள்ளன. பாமகவுக்கு, பாஜகவே உரிமையாளராக செயல்படுகிறது. பாஜக என்ன சொல்கிறதோ? அதைத்தான் பாமக செய்யும் நிலை உள்ளது. எனவே பாமக, தங்கள் ஓனரான, பாஜகவை கேட்டுவிட்டு தான், இந்தக் கூட்டணியில் இணைவதா வேண்டாமா? என்று முடிவு செய்யும். இதில் பாமகவின் சுயேச்சையான முடிவுகளுக்கு இடமில்லை.
திமுகவும், விடுதலைச் சிறுத்தைகள் கட்சியும், சமூக நீதி, மாநில உரிமை, சனாதன எதிர்ப்பு மற்றும் திராவிடக் கோட்பாடுகளின் அடிப்படையில் ஒரே பாதையில் பயணிக்கும் இயக்கங்களாகவே உள்ளன. கோட்பாட்டு ரீதியாக இரு இயக்கங்களும் எப்போதும் ஒன்றுபட்டே செயல்பட்டு வருகின்றன. இப்போது சூழ்நிலை காரணமாக, தேர்தல் சூழ்நிலை காரணமாக அணி மாறி இருந்தாலும், கோட்பாடு அடிப்படையில் நாங்கள் ஒன்றாக தான் பயணிக்கிறோம்." எனத் தெரிவித்தார்.
விசிக தலைவர் திருமாவளவன் பங்கேற்கும் நிகழ்வுகளில் அண்மைக்காலமாக முண்டியடித்துக்கொண்டு திரள்வதால் கூட்ட நெரிசல் ஏற்பட்டு வருவது பற்றிய கேள்விக்கு பதில் அளித்த அமைச்சர் வன்னி அரசு, "ஒரு மாஸ் லீடர் என்றால் எப்போதுமே Mass-ஓடுதான் இருப்பார்கள். விடுதலைச் சிறுத்தைகள் கட்சி என்பது செயற்கையாக உருவாக்கப்பட்ட கூட்டமல்ல. இயல்பாக வருகிற ஆதரவு. திருமாவளவனுக்கு தலைமுறை தலைமுறையாக ஆதரவாளர்கள் வருகிறார்கள். ஜென் Z இளைஞர்கள் விசிகவை நோக்கி நகர்கிறார்கள்.
திருமாவளவன் இருக்கும் இடத்தில் ஈ மொய்ப்பது போல இளைஞர்கள் வருகிறார்கள். நாங்கள் வரும்போது எப்படி தீவிரமாக இருந்தோமோ அப்படி புதிதாக இளைஞர்கள் வருகிறார்கள். தொண்டர்கள் கூடுவதை கட்டுக்கோப்பில்லாமல் கூடுகிறார்கள் என விசிகவுக்கு எதிராக கட்டமைக்கப்படும் சதியாகவே பார்க்கிறோம். விசிகவினர் ராணுவக் கட்டுக்கோப்பு உள்ள இயக்கம். எங்கள் தலைவரின் சொல்லுக்கு கட்டுப்படுபவர்கள். கட்சித் தலைவர் தொண்டர்கள் மீது காட்டும் அன்பும், அவர்களை வழிநடத்தும் விதமும், இதற்கு முக்கிய காரணமாக உள்ளது." என்றார்.
Click it and Unblock the Notifications
Sign in with Google
