சில விசயங்களைத் திரும்பத் திரும்ப சொல்லியே ஆகணும்.. மாநாட்டுக்கு விஜய் ரெடி! தொண்டர்களுக்கு அட்வைஸ்

Published: Saturday, October 26, 2024, 11:05 [IST]

Subscribe to Oneindia Tamil

சென்னை: பெயரைப் போல சில விசயங்களைத் திரும்பத் திரும்பச் சொல்லியே ஆக வேண்டும். அப்படித்தான் கடிதங்களில் சொன்னதையே இங்கு மீண்டும் வலியுறுத்தப்போகிறேன். எல்லா வகைகளிலும் எனக்கு நீங்களும் உங்கள் பாதுகாப்புமே முக்கியம்.ஆகவே,மாநாட்டுப் பயணப் பாதுகாப்பில் நீங்கள் அனைவரும் மிகக் கவனமாக இருக்க வேண்டும் என்று தவெக தலைவர் விஜய் தனது கட்சியினரை அறிவுறுத்தியுள்ளார்.

தமிழக வெற்றிக் கழகம் என்ற கட்சியை தொடங்கியுள்ள நடிகர் விஜய், கட்சியின் முதல் மாநில மாநாட்டை நடத்த விக்கிரவாண்டியில் நடத்துகிறார். நாளை இந்த மாநாடு நடைபெறுகிறது. விக்கிரவாண்டி வி சாலையில் 85 ஏக்கர் பரப்பளவில் பிரமாண்டமாக மாநாட்டை நடத்த விஜய் திட்டமிட்டுள்ளார். மாநாட்டிற்கான அனைத்து ஏற்பாடுகளும் முழு வீச்சில் தயாராகி வருகின்றன.

tvk maanadu tamilaga vetri kazhagam actor vijay

ஏறத்தாழ அனைத்து ஏற்பாடுகளும் முடிந்துள்ள நிலையில், தொண்டர்கள் இன்றே மாநாட்டிற்கு வருகை தர ஆயத்தமாகியுள்ளனர். பல்வேறு ஊர்களில் இருந்தும் மாநாட்டிற்கு கிளம்பிவிட்டனர். தமிழக அரசியல் வட்டாரத்திலும் விஜய் கட்சியின் இந்த மாநில மாநாடு பெரும் எதிபார்ப்பை ஏற்படுத்தியுள்ளது. மாநாடு நாளை நடைபெற உள்ள நிலையில், விஜய் தனது கட்சி தொண்டர்களுக்கு இன்று விடுத்துள்ள அறிவுறுத்தலில் கூறியிருபதாவது:-

என் நெஞ்சில் குடியிருக்கும் தோழர்களுக்கு, வணக்கம். பெயரைப் போல சில விசயங்களைத் திரும்பத் திரும்பச் சொல்லியே ஆக வேண்டும். அப்படித்தான் கடிதங்களில் சொன்னதையே இங்கு மீண்டும் வலியுறுத்தப்போகிறேன். காரணம், எல்லா வகைகளிலும் எனக்கு நீங்களும் உங்கள் பாதுகாப்புமே முக்கியம்.ஆகவே,மாநாட்டுப் பயணப் பாதுகாப்பில் நீங்கள் அனைவரும் மிகக் கவனமாக இருக்க வேண்டும்.

இருசக்கர வாகனப் பயணத்தை தவிர்த்தல் நன்று. உங்கள் பாதுகாப்புக் கருதியே இதைச் சொல்கிறேன். அதேபோல, வருகிற வழிகளில் பொதுமக்களுக்கோ போக்குவரத்திற்கோ இடையூறு செய்யாமல் வரவேண்டும். போக்குவரத்து நெறிமுறைகளில் கவனம் செலுத்துவதோடு, மாநாட்டுப் பணிக்கானக் கழகத் தன்னார்வலர்கள் மற்றும் தனியார் பாதுகாவல் படைக்கு ஒத்துழைப்பு நல்குவதோடு, மாநாடு சார்ந்து காவல்துறையின் பாதுகாப்பு நெறிமுறைகளுக்கும் முழு ஒத்துழைப்பு அளிக்க வேண்டும்.

உங்களின் பாதுகாப்பானப் பயணத்தை எண்ணியபடியே மாநாட்டுக்கு வருவேன்.நீங்களும் அதை மனதில் வைத்தே வாருங்கள்.அப்படித்தான் வரவேண்டும். நாளை (27-10-2024) நமது மாநாட்டில் சந்திப்போம். மாபெரும் அரசியல் சரித்திரத்தை நிகழ்த்திக் காட்டுவோம். தோழமையுடன், உங்கள் விஜய். என்று அந்த அறிக்கையில் கூறியுள்ளார்.

Published On October 26, 2024