அண்ணாமலையால் அதிமுக பரிதாபம்.. கோவை 6 சட்டசபை தொகுதியிலும் பாஜகவை விட குறைந்த ஓட்டு வாங்கிய சோகம்

கோவை: கோவை லோக்சபா தொகுதியில் போட்டியிட்ட பாஜக மாநில தலைவர் அண்ணாமலையால் அங்குள்ள 6 சட்டசபை தொகுதிகளிலும் பாஜகவை விட அதிமுக குறைந்த அளவிலேயே ஓட்டு வாங்கி உள்ளது. இதில் 5 சட்டசபை தொகுதிகளில் அதிமுகவை சேர்ந்தவர்கள் எம்எல்ஏக்களாக உள்ள நிலையில் பாஜக பெற்ற ஓட்டு சதவீதம் அந்த கட்சிக்கான எச்சரிக்கை மணியாக மாறி உள்ளது.

தமிழ்நாடு மற்றும் புதுச்சேரியில் உள்ள 40 லோக்சபா தொகுதிகளிலும் திமுக மற்றும் அதன் கூட்டணி கட்சிகள் வெற்றி பெற்றுள்ளன. முதல்வர் ஸ்டாலின் கூறியபடி 40க்கு 40 தொகுதிகளை திமுக கூட்டணி மொத்தமாக கைப்பற்றி உள்ளது.

இதனால் அதிமுக கூட்டணி, பாஜக கூட்டணி மற்றும் சீமானின் நாம் தமிழர் கட்சி வேட்பாளர்கள் யாரும் ஜெயிக்கவில்லை. குறிப்பாக பெரிதும் எதிர்பார்க்கப்பட்ட தமிழக மாநில தலைவர் அண்ணாமலை கோவை தொகுதியில் திமுக வேட்பாளர் கணபதி ராஜ்குமாரிடம் தோற்றார்.

கோவை தொகுதியில் திமுக வேட்பாளர் கணபதி ராஜ்குமார் 5 லட்சத்து 68 ஆயிரத்து 200 ஓட்டுகள் பெற்றார். அண்ணாமலை 4 லட்சத்து 50 ஆயிரத்து 132 ஓட்டுகள் மட்டுமே பெற்றதால் 1 லட்சத்து 18 ஆயிரத்து 68 ஓட்டுகள் வித்தியாசத்தில் திமுக வேட்பாளர் கணபதி ராஜ்குமார் வெற்றி பெற்றார். இங்கு அதிமுக வேட்பாளர் சிங்கை ராமசந்திரன் 3ம் இடம் பிடித்தார். அவர் மொத்தம் 2 லட்சத்து 36 ஆயிரத்து 490 ஓட்டுகள் வாங்கினார்.

இது பாஜக மற்றும் அதிமுகவினர் சோகத்தில் உள்ளனர். இதற்கிடையே தான் கோவை லோக்சபா தொகுதியில் உள்ள அனைத்து சட்டசபை தொகுதிகளிலும் திமுக அதிக ஓட்டுகளை பெற்றதும், அதேவேளையில் பாஜகவை விட அனைத்து சட்டசபை தொகுதிகளிலும் அதிமுக குறைந்த ஓட்டுகளை பெற்றுள்ளதும் தெரியவந்துள்ளது. அதாவது கோவை லோக்சபா தொகுதியில் மொத்தம் 6 சட்டசபை தொகுதிகள் உள்ளன.

அதன்படி கோவை சூலூர், கவுண்டம்பாளையம், கோவை வடக்கு, கோவை தெற்கு, சிங்காநல்லூர் மற்றும் திருப்பூர் மாவட்டம் பல்லடம் ஆகிய 6 சட்டசபை தொகுதிகள் சேர்ந்தது தான் கோவை லோக்சபா தொகுதியாகும். இதில் கோவை தெற்கு தொகுதி எம்எல்ஏவாக பாஜகவின் வானதி சீனிவாசன் உள்ளார். மற்றபடி 5 சட்டசபை தொகுதிகளிலும் அதிமுகவை சேர்ந்தவர்கள் தான் எம்எல்ஏவாக உள்ளனர்.

அதாவது சூலூரில் அதிமுகவின் கந்தசாமி, கவுண்டம்பாளையத்தில் அதிமுகவின் அருண் குமார், கோவை வடக்கில் அதிமுகவின் அம்மன் கே அர்ஜுனன், சிங்காநல்லூரில் அதிமுகவின் ஜெயராம், திருப்பூர் மாவட்டம் பல்லடத்தில் அதிமுகவின் ஆனந்தன் உள்ளிட்டவர்கள் எம்எல்ஏவாக உள்ளனர். இப்படி கோவை லோக்சபா தொகுதியில் உள்ள 6 சட்டசபை தொகுதிகளில் 5 இடங்களில் அதிமுகவை சேர்ந்தவர்கள் எம்எல்ஏக்களாக இருந்தாலும் கூட பாஜகவை விட அனைத்து தொகுதியிலும் அதிமுக வேட்பாளர் சிங்கை ராமச்சந்திரன் குறைவாக ஓட்டு வாங்கி உள்ளார்.

அதேவேளையில் ஒரு எம்எல்ஏ கூட இல்லாத திமுக 6 சட்டசபை தொகுதியிலும் அதிக ஓட்டுகளை அள்ளி உள்ளது. அதன்படி பல்லடம் சட்டசபை தொகுதியில் திமுகவுக்கு 42.5 சதவீத ஓட்டுகளும், பாஜகவுக்கு 28.4 சதவீத ஓட்டுகளும், அதிமுகவுக்கு 19.1 சதவீத ஓட்டுகளும் கிடைத்தது. சூலூர் தொகுதியில் திமுகவுக்கு 39.2 சதவீத ஓட்டுகளும், பாஜகவுக்கு 30.8 சதவீத ஓட்டுகளும், அதிமுகவுக்கு 21.6 சதவீத ஓட்டுகளும் கிடைத்துள்ளது.

அதேபோல் கவுண்டம் பாளையம் சட்டசபை தொகுதியில் திமுகவுக்கு 41.2 சதவீத ஓட்டுகளும், பாஜகவுக்கு 33.4 சதவீத ஓட்டுகளும், அதிமுகவுக்கு 16.6 சதவீத ஓட்டுகளும் கிடைத்துள்ளன. கோவை வடக்கு தொகுதியில் திமுகவுக்கு 40.6 சதவீத ஓட்டுகளும், பாஜகவுக்கு 35.8 சதவீத ஓட்டுகளும், அதிமுகவுக்கு 14.5 சதவீத ஓட்டுகளும் கிடைத்துள்ளது.

மேலும் கோவை தெற்கு தொகுதியில் திமுகவுக்கு 42.7 சதவீத ஓட்டுகளும், பாஜகவுக்கு 36.9 சதவீத ஓட்டுகளும், அதிமுகவுக்கு 13.3 சதவீத ஓட்டுகளும் கிடைத்துள்ளது. சிங்காநல்லூர் தொகுதியில் திமுகவுக்கு 42.3 சதவீத ஓட்டுகளும், பாஜகவுக்கு 33.8 சதவீத ஓட்டுகளும், அதிமுகவுக்கு 15.8 சதவீத ஓட்டுகளும் கிடைத்துள்ளது. இது கோவையில் அதிமுகவின் செல்வாக்கு குறைந்து வருகிறதா என்ற கேள்வியை எழுப்பி உள்ளது. இதனை அதிமுக தலைமை உடனடியாக சரிசெய்ய வேண்டும். இல்லாவிட்டால் வரும் காலத்தில் கோவையில் திமுக மற்றும் பாஜக இடையே தான் நேரடி போட்டி இருக்கும் என்கின்றனர் அரசியல் நோக்கர்கள்.

English summary

BJP state president Annamalai who contested in Coimbatore Lok Sabha constituency, AIADMK has got less votes than BJP in all the 6 assembly constituencies there.