காலில் விழுந்து வோட்டு கேளுங்கள்.. தாமரையை மலர வையுங்கள்.. பாஜக அண்ணாமலை

கோவை: வீடுகளுக்கு நேரடியாக சென்று மக்கள் காலில் விழுந்து வாக்கு கேளுங்கள் என தமிழக பாஜக தலைவர் அண்ணாமலை தெரிவித்துள்ளார்.

தமிழகத்தில் உள்ள 21 மாநகராட்சிகள், 138 நகராட்சிகள், 490 பேரூராட்சிகள் என அனைத்து நகர்ப்புற உள்ளாட்சி அமைப்புகளுக்கும் வரும் பிப்ரவரி 19 ஆம் தேதி தேர்தல் நடத்தப்படுகிறது.

12,838 பதவியிடங்களுக்கான நகர்ப்புற உள்ளாட்சி பிரதிநிதிகள் நேரடி தேர்தல் மூலம் தேர்ந்தெடுக்கப்பட உள்ளனர். இதற்கான தேர்தல் முடிவுகள் வரும் 22 ஆம் தேதி வெளியாகிறது. மொத்தம் 1,298 பதவியிடங்களுக்கு மார்ச் 4-ஆம் தேதி மறைமுகத் தேர்தல் நடைபெறும் என்று அறிவிக்கப்பட்டுள்ளது.

சட்டசபை தேர்தல்

நாடாளுமன்றத் தேர்தல், சட்டசபைத் தேர்தல், ஊரக உள்ளாட்சி தேர்தல் ஆகியவற்றை அதிமுகவில் கூட்டணியில் இருந்து பாஜக சந்தித்தது. ஆனால் இந்த நதர்ப்புற உள்ளாட்சி தேர்தலில் இடப்பங்கீட்டு பேச்சுவார்த்தையில் சுமூக உடன்பாடு எட்டப்படாததால் தனித்து போட்டியிடுவதாக கடந்த திங்கள்கிழமை பாஜக அறிவித்தது.

கோவையில் வேட்பாளர்கள்

இதையடுத்து பாஜக சார்பில் போட்டியிடும் வேட்பாளர்களின் பட்டியலையும் அக்கட்சி வெளியிட்டு வருகிறது. இந்த வகையில் கோவையில் வேட்பாளர்களை அறிமுகம் செய்து வைக்கும் கூட்டம் இன்று நடைபெற்றது. அப்போது வேட்பாளர்களை அறிமுகம் செய்து வைத்து பாஜக தலைவர் அண்ணாமலை பேசினார்.

காலில் விழுந்து வாக்கு கேளுங்கள்

அவர் பேசுகையில் பாஜக வேட்பாளர்கள் மக்களின் வீடுகளுக்கு சென்று சகோதர சகோதரிகள் போல பேசுங்கள். மக்களின் காலில் விழுந்து வாக்கு கேளுங்கள். கோவை தெற்கு தொகுதியில் அக்கா வானதி ஸ்ரீனிவாசன் தாமரையை மலர வைத்துள்ளார். தேர்தலில் அக்காவை முழுமையாக பயன்படுத்திக் கொள்ளுங்கள் என தெரிவித்துள்ளார்.

அறிமுகக் கூட்டம்

அது போல் சென்னை தாம்பரம், ஆவடி மாநகராட்சிகளுக்கு போட்டியிடும் வேட்பாளர்கள் அறிமுகக் கூட்டத்தில் அண்ணாமலை கலந்து கொண்டு பேசினார். பாஜக குறுகிய காலத்தில் அதிக வேகமாக வளர்ந்து வரும் கட்சியாகும். அடுத்த பதினொரு நாட்கள் போர்க்களம் போல் இருக்கும். போர்க்களத்தில் இருப்பது போல் முழு மூச்சாக பணியாற்ற வேண்டும் என தெரிவித்தார்.

English summary

TN BJP President Annamalai says that go and touch the voter's feet to get vote in Local body elections.