வெளியே தான் விவாகரத்து.. அதிமுக - பாஜக இடையே ரகசிய உறவு தொடர்கிறது - தயாநிதி மாறன் தாக்கு!

கோவை: வெளியில் பார்ப்பதற்குத்தான் விவாகரத்து. ஆனால் ரகசிய உறவில் பாஜக அதிமுக தொடர்கிறது என திமுக எம்.பி தயாநிதி மாறன் விமர்சித்துள்ளார்.

திமுக இளைஞரணிச் செயலாளரும், தமிழக இளைஞர் நலன் மற்றும் விளையாட்டுத்துறை அமைச்சருமான உதயநிதி ஸ்டாலின் பிறந்தநாளை முன்னிட்டு, கோவை மாவட்ட திமுக சார்பில் கிரிக்கெட் போட்டிகள் நடத்தப்பட்டன. இதற்கான பரிசளிப்பு விழாவில் திமுக விளையாட்டு மேம்பாட்டு அணியின் மாநிலச் செயலாளர் தயாநிதி மாறன் எம்.பி கலந்துகொண்டார்.

இந்த நிகழ்வில் பேசிய தயாநிதி மாறன், "அமைச்சர் செந்தில் பாலாஜியை வேண்டுமென்றே சிறையில் வைத்துள்ளனர். கொங்கு மண்டலத்தில் அதிமுகவும், பாஜகவும் வெற்றி பெற வேண்டும் என்பதற்காக அவரை சிறையில் வைத்துள்ளனர். கொங்குநாட்டு மக்கள் செந்தில் பாலாஜிக்கு நன்றி கடன்பட்டவர்கள். அவர் சிறையில் இருந்தாலும் அவருக்கு வெற்றியை காணிக்கையாக தருவார்கள்.

இதுநாள் வரைக்கும் அதிமுக, பாஜகவுடன் கூட்டணியில் இருந்தது. கடந்த 5 ஆண்டுகளுக்கு முன்பு நாடாளுமன்றத்தில் வாயை திறந்தார்களா ஒரு கேள்வி கேட்டார்களா? ஆனால், பொள்ளாச்சி எம்.பி சண்முகசுந்தரம் 240 கேள்விகளை கேட்டுள்ளார். திமுக எம்.பிக்கள் நாடாளுமன்றம் சென்றவுடன் தமிழ்நாட்டுக்காக அவ்வளவு கேள்விகளை கேட்டுள்ளோம். திமுக நாடாளுமன்றத்திற்குச் சென்றவுடன் தலைகீழாக மாறிவிட்டது.

நாம் கட்டும் வரிப் பணத்தை நமக்கு முழுமையாக மத்திய அரசு கொடுப்பதில்லை. நாம் ஒரு ரூபாய் கொடுத்தால் 29 பைசா தான் மத்திய அரசு திருப்பிக் கொடுக்கிறது. அதேநேரத்தில் உத்தரப்பிரதேசம் மாநிலம் கொடுக்கும் 1 ரூபாய்க்கு 2 ரூபாய் 17 பைசா திருப்பிக் கொடுக்கிறது. பாஜக தமிழ்நாட்டுக்கு எதிரானது. அதற்கு துணை போனது அதிமுக.

செந்தில் பாலாஜி மீது பொய் வழக்கு போட்டு கைது செய்தார்கள். ஆனால், கூட்டணியை விட்டு வெளியே வந்த பின்னும், எடப்பாடி பழனிசாமி மீதும், எஸ்பி வேலுமணி மீதும் ஏன் இன்னும் சிபிஐ, வருமான வரித்துறை, அமலாக்கத்துறை சோதனை செய்யவில்லை. அவர்கள் மீதும் பல வழக்குகள் நிலுவையில் உள்ளன.

நாங்கள் வெளியே வந்தது மாதிரி நடிக்கிறோம். நீங்களும் அப்படியே நடியுங்கள் என, இரு கட்சிகளிடையே ரகசிய கூட்டணி தொடர்கிறது. வெளியில் பார்ப்பதற்கு விவாகரத்து செய்து கொண்டோம். ஆனால் ரகசிய உறவில் தொடர்வோம். இது தான் பாஜக அதிமுக" என தயாநிதி மாறன் விமர்சித்தார்.

English summary

DMK MP Dayanidhi Maran has criticized that BJP AIADMK continues in secret relationship, Divorce is for outward appearance only.