சீமானை பார்த்ததுமே கட்டியணைத்த அண்ணாமலை.. நெகிழ வைத்த கோவை.. 2 பேருக்கும் எவ்வளவு பாசம் பாருங்க

Updated: Saturday, July 27, 2024, 21:34 [IST]

Subscribe to Oneindia Tamil

கோவை: கோவையில் நடந்த நிகழ்ச்சியில் நாம் தமிழர் தலைமை ஒருங்கிணைப்பாளர் சீமானை பார்த்ததும், பாஜக மாநில தலைவர் அண்ணாமலை கைக்குலுக்கி ஆரத்தழுவி வாழ்த்து தெரிவித்தது அங்கிருந்தவர்களை ஆச்சரியப்படுத்தியது. தமிழக அரசியலில் இருவரும் எதிரெதிர் துருவங்களாக பயணிக்கும் நிலையில் இந்த சம்பவம் இரு கட்சியினருக்கும் நெகிழ்ச்சியை ஏற்படுத்தி உள்ளது.

தமிழக பாஜக மாநில தலைவராக இருப்பவர் அண்ணாமலை. அதேபோல் நாம் தமிழர் கட்சியின் தலைமை ஒருங்கிணைப்பாளராக இருப்பவர் சீமான். இவர்கள் 2 பேரும் தமிழக அரசியலில் எதிரெதிர் துருவங்களாக பயணித்து வருகின்றனர். மேலும் பொதுமேடைகளில் இருவரும் மாறி மாறி விமர்சனம் செய்வதை வாடிக்கையாக வைத்துள்ளனர்.

பாஜக, நாம் தமிழர் என இரு கட்சிகளின் கொள்கைகள் ரீதியாக அண்ணாமலை, சீமானையும், சீமான் அண்ணாமலையையும் விமர்சித்து வருவதை நாம் பார்த்து இருக்கிறோம். ஆனாலும் கூட இருவருக்கும் ஒரு ஒற்றுமை இருக்கிறது. அண்ணாமலை, சீமானை விமர்சனம் செய்யும்போதெல்லாம் அண்ணன் என்ற வார்த்தையை பயன்படுத்துவார். அதேபோல் சீமானும், அண்ணாமலையை விமர்சிக்கும் போதெல்லாம் தம்பி அண்ணாமலை என்ற வார்த்தையை பயன்படுத்துவார்.

இத்தகைய சூழலில் தான் இன்று நாம் தமிழர் கட்சியின் ஒருங்கிணைப்பாளர் சீமானை, பாஜக மாநில தலைவர் அண்ணாமலை திடீரென்று ஆரத்தழுவி வாழ்த்து தெரிவித்த சம்பவம் நடந்துள்ளது. இந்த சம்பவம் கோவையில் அரங்கேறி உள்ளது. அதாவது கோவை லீ மெரிடியன் நட்சத்திர ஹோட்டலில் ஜெம் மருத்துவமனை மருத்துவர் பழனிவேலு வாழ்க்கை குறித்த புத்தக வெளியீட்டு விழா இன்று நடந்தது.

இந்த விழாவில் தமிழகத்தை சேர்ந்த அரசியல் கட்சி தலைவர்கள், அறிஞர்கள், விஞ்ஞானிகள் உள்பட பல்வேறு துறைகளில் முன்னணியில் உள்ளவர்களுக்கு அழைப்பு விடுக்கப்பட்டு இருந்தது. இந்த விழாவில் முன்னாள் இஸ்ரோ விஞ்ஞானி மயில்சாமி அண்ணாதுரை, பாமக தலைவர் அன்புமணி ராமதாஸ், பாஜக மாநில தலைவர் அண்ணாமலை, நாம் தமிழர் கட்சியின் ஒருங்கிணைப்பாளர் சீமான் உள்பட ஏராளமானவர்கள் பங்கேற்றனர்.

இந்த விழாவில் தான் சீமானை பார்த்ததும் அண்ணாமலை அவரை நோக்கி நடந்து வந்தார். அண்ணாமலை வருவதை அறிந்த சீமான் சிரித்தபடி எழுந்து நின்றார். அருகே வந்த அண்ணாமலை புன்சிரிப்புடன் சீமானிடம் கைக்குலுக்கினார். அதன்பிறகு அவர் சீமானை கட்டியணைத்து ஆரத்தழுவி வாழ்த்து தெரிவித்தார்.

பதிலுக்கு சீமானும் அண்ணாமலைக்கு வாழ்த்து தெரிவித்தார். அதன்பிறகு இருவரும் அவரவருக்கு ஒதுக்கப்பட்ட இடத்தில் போய் அமர்ந்தனர். இந்நிலையில் தான் சீமான் - அண்ணாமலை ஆகியோர் ஆரத்தழுவி வாழ்த்துகளை பரிமாறி கொள்ளும் வீடியோ தற்போது இணையதளங்களில் வெளியாகி வேகமாக பரவி வருகிறது.