அதிகாலையிலேயே பரபரப்பு.. வால்பாறையில் 20 அடி பள்ளத்தில் கவிழ்ந்த பேருந்து - 40 பேர் காயம்

கோவை: திருப்பூரில் இருந்து கோவை மாவட்டம், வால்பாறைக்கு சென்ற அரசுப் பேருந்து 20 அடி பள்ளத்தில் கவிழ்ந்து விபத்துக்குள்ளானதில் 40 பேர் பலத்த காயமடைந்தனர். காயமடைந்தவர்கள் அனைவரும் மீட்கப்பட்டு 108 ஆம்புலன்ஸ் மூலமாக வால்பாறை அரசு மருத்துவமனையில் அனுமதிக்கப்பட்ட நிலையில், அங்கு தீவிர சிகிச்சை அளிக்கப்பட்டு வருகிறது.

கோவை மாவட்டத்தில் உள்ள வால்பாறைக்கு இன்று அதிகாலை 12.30 மணி அளவில் திருப்பூர் பகுதியில் இருந்து அரசுப் பேருந்து சென்று கொண்டிருந்துள்ளது. இந்தப் பேருந்தை கணேஷ் (வயது 49) என்பவர் இயக்கி உள்ளார். நடத்துனர் சிவராஜ் உள்பட பேருந்தில் 72 பயணிகளை ஏற்றிக் கொண்டு வால்பாறை பகுதியில் பேருந்து சென்றுள்ளது.

அதிகாலை சுமார் 3 மணி அளவில் வால்பாறை அருகே உள்ள கவர்கள் எஸ்டேட் பகுதி 33 ஆவது கொண்டை ஊசி வளைவில் சென்றபோது பேருந்து கட்டுப்பாட்டை இழந்து 20 அடி பள்ளத்தில் கவிழ்ந்து விபத்துக்குள்ளானது. இந்த விபத்து குறித்து தகவல் அறிந்து வந்த வால்பாறை காவல் துறையினர் சம்பவ இடத்துக்கு விரைந்து சென்று மீட்புப் பணியில் ஈடுபட்டனர்.

108 ஆம்புலன்ஸ் மூலமாக காயமடைந்தவர்கள் அனைவரும் மீட்கப்பட்டு வால்பாறை அரசு மருத்துவமனைக்கு அழைத்துச் செல்லப்பட்டனர். இந்த விபத்தில் ஓட்டுநர் கணேசன் பலத்த காயமடைந்தார். கணேசனை மேல் சிகிச்சைக்காக பொள்ளாச்சி அரசு மருத்துவமனைக்கு கொண்டு சென்றனர். கை, கால், தலை போன்ற பல்வேறு இடங்களில் படுகாயங்கள் அடைந்த பயணிகளும் மேல் சிகிச்சைக்காக பொள்ளாச்சி மருத்துவமனைக்கு கொண்டு செல்லப்பட்டனர்.

இந்த விபத்து குறித்து வால்பாறை காவல் துறையினர் விசாரணை மேற்கொண்டு வருகின்றனர். அரசுப் பேருந்து 20 அடி பள்ளத்தில் கவிழ்ந்து விபத்துக்குள்ளான சம்பவம் பெரும் பரபரப்பை ஏற்படுத்தியுள்ளது.

English summary

A government bus traveling from Tiruppur to Valparai in Coimbatore district overturned into a 20-foot gorge, seriously injuring 40 people.