அதிமுகவினருடன் தொடர்பு.. கோவை திமுக நிர்வாகியின் பதவியை பறித்த ஸ்டாலின்.. பின்னணியில் நடந்தது என்ன?

Updated: Wednesday, November 19, 2025, 12:41 [IST]

Subscribe to Oneindia Tamil

கோவை: கோவை மாவட்டம் சுல்தான் பேட்டை மேற்கு ஒன்றியச் செயலாளர் பிவி மகாலிங்கத்தின் பதவியை முதல்வர் ஸ்டாலின் பறித்து நடவடிக்கை எடுத்துள்ளார். கோவை மாவட்ட திமுக நிர்வாகிகள் உடனான ஒன் டூ ஒன் ஆலோசனையின் அடிப்படையில் இந்த நடவடிக்கை எடுக்கப்பட்டுள்ளதாக தெரிகிறது.

சட்டசபைத் தேர்தலுக்கு இன்னும் 5 மாதங்கள் மட்டுமே இருக்கும் நிலையில், திமுக இம்முறை தங்களின் பிரச்சாரத்தை வித்தியாசமாக அணுகி வருகிறது. அதிமுக, தவெக உள்ளிட்ட கட்சிகள் மக்களை நேரடியாக சந்தித்து பிரச்சாரத்தை மேற்கொண்டு வருகிறது. ஆனால் திமுக ஒவ்வொரு தொகுதியிலும் நிர்வாகிகளுக்கு இடையிலான மோதலை முடிவுக்கு கொண்டு வர நடவடிக்கை மேற்கொண்டு வருகிறது.

அதற்காகவே "உடன்பிறப்பே வா" என்ற பெயரில் முதல்வர் ஸ்டாலின் உள்ளிட்ட மூத்த நிர்வாகிகள் ஒவ்வொரு தொகுதிகளிலும் திமுகவினரை அழைத்து ஆலோசனை நடத்தி வருகின்றனர். குறிப்பாக திமுகவுக்கு சவாலாக இருக்கும் மாவட்டங்களில் இம்முறை ஸ்டாலின் கூடுதல் செலுத்தி வருகிறார். அந்த வகையில் கோவை மாவட்ட நிர்வாகிகளுடன் ஒன் டூ ஒன் சந்திப்பு நேற்று நடைபெற்றது.

சூலூர், கிணத்துக்கடவு, வால்பாறை ஆகிய சட்டசபைத் தொகுதி நிர்வாகிகளுடன் முதல்வர் ஸ்டாலின் நடத்திய ஆலோசனை பல்வேறு விவகாரங்கள் குறித்து ஆலோசிக்கப்பட்டுள்ளது. அப்போது கோவை மாவட்ட பொறுப்பாளர் செந்தில் பாலாஜிக்கு, கோவையின் பெரும்பாலான தொகுதிகளில் திமுக வெல்ல வேண்டும் என்று உத்தரவிட்டார்.

இதற்கு முன்பாகவே நெல்லை உள்ளிட்ட தொகுதிகளில் திமுக வெல்லவில்லை என்றால், திமுக நிர்வாகிகள் அத்தனை பேரின் பதவியும் பறிக்கப்படும் என்று ஸ்டாலின் வார்னிங் கொடுத்திருந்தார். இந்த நிலையில் கோவை மாவட்ட நிர்வாகிகளுடனான ஒன் டூ ஒன் சந்திப்புக்கு பின் கோவை மாவட்டம் சுல்தான் பேட்டை மேற்கு ஒன்றியச் செயலாளர் பிவி மகாலிங்கத்தின் பதவி பறிக்கப்பட்டுள்ளது.

அதிமுக நிர்வாகிகளுடன் தொடர்பில் இருப்பது திமுக தலைமைக்கு தெரிய வந்திருக்கிறது. இதையடுத்து உடனடியாக பதவியை பறித்து ஸ்டாலின் நடவடிக்கை எடுத்துள்ளார். இதையடுத்து கோவை சுல்தான் பேட்டை மேற்கு ஒன்றிய செயலாளராக ரமேஷ் என்பவர் நியமனம் செய்யப்பட்டுள்ளார். இதன் மூலமாக தேர்தல் பணிகளில் திமுக எந்த சமரசமும் செய்ய தயாரில்லை என்று பார்க்கப்படுகிறது.