சார் வீடியோ எடுக்காதீங்க! வாடிக்கையாளரிடம் கெஞ்சிய மேனேஜர்! கோவை லூலூ மாலில் அழுகிய சிக்கன் விற்பனை

Updated: Monday, February 5, 2024, 13:21 [IST]

Subscribe to Oneindia Tamil

கோவை: கோவை லூலூ மாலில் வாங்கிய சிக்கனில் துர்நாற்றம் வீசியதால் மால் நிர்வாகத்தினரிடம் வாடிக்கையாளர் முறையிட்டதால் பரபரப்பு ஏற்பட்டது.

கோவை பாப்பநாயக்கன்பாளையத்தை சேர்ந்தவர் கணேஷ் லால். இவர் நேற்று அவினாசி சாலையில் உள்ள லூலூ மாலில் சிக்கன் வாங்குவதற்காக சென்றுள்ளார்.

Coimbatore LuLu mall sold rotten chicken

முக்கால் கிலோ சிக்கன் பதப்படுத்தப்பட்ட பாக்கெட்டை ரூ 165 க்கு வாங்கியுள்ளார். வீட்டில் வந்து சிக்கன் பாக்கெட்டை பிரித்து பார்த்தார். அப்போது அந்த சிக்கனில் இருந்து துர்நாற்றம் வீசியது.

இதையடுத்து லூலூ மால் நிர்வாகத்தில் மேனேஜரிடம் தகவலை தெரிவித்தார். இதையடுத்து கெட்டுப் போன சிக்கனுடன் லூலூ மால் வந்து முறையிட்டுள்ளார். அப்போது அங்கு நடப்பதை வீடியோவும் எடுத்தார். உடனே அந்த மேனேஜர் சார் சார் ப்ளீஸ் வீடியோ எடுக்காதீங்க, வாங்க தனியாக பேசிக்கலாம் என கேட்டுக் கொண்டார்.

இதைத் தொடர்ந்து சிக்கனை வாங்கி பார்த்த மேனேஜர் தவறை ஏற்றுக் கொண்டு மாற்றி தருவதாக சொன்னார். இருப்பினும், கணேஷ் லால் இது குறித்து உணவு பாதுகாப்புத் துறை அதிகாரிகள் பாக்கெட் இறைச்சி விற்பனை கூடங்களை ஆய்வு செய்ய வேண்டும் என தெரிவித்தார்.

இதுகுறித்து லூலூ மால் நிர்வாகிகளிடம் கேட்ட போது அவர்கள் கூறுகையில் வாடிக்கையாளர் குறை இருப்பதாக கூறியதும் நாங்கள் அந்த பொருளை மாற்றி தருகிறோம் என சொன்னோம். அது போல் அவர் அந்த பொருளை கொடுத்ததும் அதற்கான பணத்தையும் நாங்கள் திருப்பி கொடுத்துவிட்டோம்.

ஆனாலும் அந்த வாடிக்கையாளர் கோபித்துக் கொண்டு சென்றுவிட்டார் என நிர்வாகத்தினர் தெரிவித்தனர். இதுகுறித்து வாடிக்கையாளர் கணேஷ்லால் கூறியதாவது: லூலூ மாலில் எப்படி பழைய சிக்கனை கொடுக்கலாம். பொதுமக்களுக்கு என்ன பாதுகாப்பு உள்ளது. உணவு பாதுகாப்பு அதிகாரி அலுவலக அதிகாரிகளிடம் புகார் கொடுத்துள்ளோம் என கணேஷ்லால் தெரிவித்தார்.

லூலூ மால் என்பது துபாயில் மிகவும் பிரபலமான நிறுவனம். இந்த நிறுவனத்தின் உரிமையாளர் யூசுப் அலி கேரளாவை சேர்ந்தவர். இவர் துபாய் உள்ளிட்ட வெளிநாடுகளில் தொழில் துறையில் சிறந்து விளங்குகிறார். இவருடன் நிறுவனம் தமிழகத்தில் கூட வர இருப்பதாக தகவல்கள் வெளியாகியுள்ளன.