கோவையில் டாஸ்மாக் கடை.. ஒன்றிணைந்து போராட்ட களத்தில் குதித்த பாஜக- காங்கிரஸ்!

கோவை: கோவை மாவட்டம் கருமத்தம்பட்டியில் டாஸ்மாக் மதுபான கடை அமைப்பதற்கு எதிர்ப்பு தெரிவித்து பாஜக, காங்கிரஸ், கம்யூனிஸட் உள்ளிட்ட கட்சிகள் ஒன்றிணைந்து மக்களை திரட்டி போராட்டம் நடத்தியுள்ளனர்.

கோவை மாவட்டம் கருமத்தம்பட்டியில் சோமனூர் செல்லும் சாலையில் கடந்த சில ஆண்டுகளுக்கு முன்னர் டாஸ்மாக் கடை அமைக்கப்பட்டது. இதற்கு அப்பகுதி மக்கள எதிர்ப்பு தெரிவித்து பல்வேறு போராட்டங்கள் மேற்கொள்ளப்பட்டது.

இதையடுத்து அங்கிருந்த டாஸ்மாக் கடை வேறு ஒரு பகுதிக்கு மாற்றப்பட்டது. இந்த நிலையில் சில ஆண்டுகளாக ஏற்கெனவே கடை இருந்து எதிர்ப்பின் காரணமாக நீக்கப்பட்ட பகுதியில் புதிய டாஸ்மாக் கடை அமைப்பதற்கான பணிகளை டாஸ்மாக் நிர்வாகம் தொடங்கியது.

அரசியல் கட்சி

இதற்கு எதிர்ப்பு தெரிவித்து இன்று அரசியல் கட்சியினர் பொது மக்களை திரட்டி ஆர்ப்பாட்டத்தில் ஈடுபட்டனர். காங்கிரஸ், பாஜக, அதிமுக, கம்யூனிஸ்ட், கொங்கு நாடு, மக்கள் தேசிய கட்சி உள்ளிட்ட கட்சிகள் ஒன்றிணைந்து சோமனூர் சாலையில் புதியதாக மதுக்கடை கொண்டு வருவதற்கு எதிராக ஆர்ப்பாட்டத்தில் ஈடுபட்டனர்.

குழந்தைகள் நல மருத்துவமனை

குழந்தைகள் நல மருத்துவமனை, பள்ளிகள், சர்ச் போன்றவை அமைந்துள்ள இடத்தில் டாஸ்மாக் கடை அமைக்கக் கூடாது என ஆர்ப்பாட்டத்தின் போது அப்பகுதி மக்கள் வலியுறுத்தினர். கோவை மாவட்ட ஆட்சியர் டாஸ்மார் நிர்வாக அதிகாரிகளிடம் மனு அளித்தும் உரிய நடவடிக்கை என சொல்லப்படுகிறது.

மதுக்கடை

மதுக்கடை இந்த இடத்தில் அமைக்கப்பட்டால் பொதுமக்களுக்கு இடையூறாக இருக்கும் என பொதுமக்கள் கருத்து தெரிவிக்கிறார்கள். இந்த ஆர்ப்பாடடத்தில் 200-க்கும் மேற்பட்டோர் கலந்து கொண்டு மதுக்கடைக்கு எதிராக முழக்கங்களை எழுப்பினர். அப்போது வேண்டாம், வேண்டாம், மதுக்கடை வேண்டாம் என முழக்கங்கள் அடங்கிய பேனர்கள் இருந்தன. மேலும் அந்த பேனரில் ஒரு பக்கம் காந்தி படமும் இன்னொரு பக்கம் காமராஜர் படமும் அமைக்கப்பட்டிருந்தது.

கோவையில் களமிறங்கிய கட்சிகள்

கோவையில் பொதுமக்கள் சார்ந்த ஒரு பிரச்சினைக்கு பாஜகவும் காங்கிரஸ் இணைந்து குரல் கொடுத்துள்ளது. அது போல் திமுகவுடன் கூட்டணியில் இருந்தாலும் தவறு எனும் பட்சத்தில் காங்கிரஸ் கட்சியும் கம்யூனிஸ்ட் கட்சியும் ஒன்றிணைந்து களமிறங்கியுள்ளது. இது மக்களுக்கு ஒரு நம்பிக்கையை கொடுக்கும் என்றே கருதப்படுகிறது.

English summary

Congress and BJP protest against new Tasmac shop in Coimbatore which was installed near school, church.