செந்தில் பாலாஜி மீது நம்பிக்கையாக இருக்கும் திமுக.. கோவையில் விஜய் மேஜிக்கால் நடக்கும் மாற்றம்?
கோவை: சட்டசபைத் தேர்தலில் கோவையில் திமுகவுக்கு 4 தொகுதிகள் சாதகமாக அமைந்துள்ளதாக விவரம் அறிந்தவர்கள் கூறுகின்றனர். கோவை தெற்கு, கோவை வடக்கு, கிணத்துக்கடவு மற்றும் வால்பாறை ஆகிய 4 தொகுதிகளும் திமுகவுக்கு சாதகமாக இருப்பதாக பார்க்கப்படுகிறது. அதேபோல் சிங்காநல்லூர் மற்றும் சூலூர் ஆகிய தொகுதியில் இழுபறி நீடிக்கும் என்றும் சொல்லப்படுகிறது.
சட்டசபைத் தேர்தலுக்கான வாக்குப்பதிவு முடிவடைந்துவிட்டது. இந்த தேர்தலில் ஆளுங்கட்சியான திமுக கொங்கு மண்டலத்தில் அதிக வெற்றியை பெற வேண்டும் என்பதில் தீவிரமாக இருக்கிறது. 2021 சட்டசபைத் தேர்தலில் கொங்கு மண்டலத்தில் அதிமுகவே அதிக தொகுதிகளை கைப்பற்றியது. குறிப்பாக கோவையில் உள்ள 10 தொகுதிகளிலும் அதிமுகவே வென்றது. ஒன்றில் கூட திமுக வெல்லவில்லை.
இதனால் கடந்த 5 ஆண்டுகளில் கோவை மாவட்டத்திற்கு திமுக அதிகளவில் முக்கியத்துவம் அளித்தது. முன்னாள் அமைச்சர் செந்தில் பாலாஜியை கோவை மாவட்டத்திற்கு பொறுப்பாளராக நியமித்து பணிகளை திமுக முடுக்கிவிட்டது. அதற்கேற்ப கோவையில் மாநகராட்சி மற்றும் லோக்சபா தேர்தலில் திமுக கொடி நாட்டியது. இருப்பினும் சட்டசபைத் தேர்தலில் அதிமுக எளிதாக விட்டுக் கொடுக்காது என்று பார்க்கப்பட்டது.
அதற்கேற்ப கோவையில் அதிமுக தீவிரமாக களமாடியது. அதுமட்டுமல்லாமல் தவெகவும் கோவையில் கணிசமான வாக்குகளை கைப்பற்றும் என்று சொல்லப்படுகிறது. திமுக தரப்பில் முன்னாள் அமைச்சர் செந்தில் பாலாஜி நேரடியாகவே கோவை தெற்கு தொகுதியில் போட்டியிட வைக்கப்பட்டார்.
இதனால் கோவை களம் சூடுபிடித்தது. தற்போது வாக்குப்பதிவு நடந்திருக்கும் நிலையில், ஓரளவிற்கு வெற்றியாளர்களை பலரும் கணித்து வருகின்றனர். அதன்படி கோவையில் 4 தொகுதிகளில் திமுக வெல்லும் என்று விவரம் அறிந்தவர்கள் கூறுகின்றனர். கோவை தெற்கு, கோவை வடக்கு, கிணத்துக்கடவு மற்றும் வால்பாறை ஆகிய 4 தொகுதிகளில் திமுகவே வெல்லும் என்று சொல்லப்படுகிறது.
மறுபக்கம் தொண்டாமுத்தூர், கவுண்டம்பாளையம், மேட்டுப்பாளையம், பொள்ளாச்சி ஆகிய தொகுதிகளில் அதிமுக கை ஓங்கி இருப்பதாக கூறப்படுகிறது. சிங்காநல்லூர் மற்றும் சூலூர் ஆகிய தொகுதிகளில் யார் வெற்றி பெறுவார்கள் என்பது தவெக பிரிக்கும் வாக்குகளை பொறுத்தே தெரியும். டெல்டா மற்றும் தென் மாவட்டங்களில் இழக்கும் தொகுதிகளை கொங்கு மண்டலத்தை வைத்து சரி செய்யலாம் என்று திமுக திட்டமிட்டுள்ளது.
அதற்கேற்ப கடினமான கோவை மாவட்டத்திலேயே திமுகவுக்கு ஓரளவிற்கு நம்பிக்கையான வெற்றிகள் கிடைப்பது அக்கட்சி தலைமைக்கு நம்பிக்கை கொடுத்துள்ளது. அதேபோல் ஈரோடு, நாமக்கல், திருப்பூர் உள்ளிட்ட மாவட்டங்களிலும் திமுக கடந்த முறையை விட கூடுதலாக சில தொகுதிகளை கைப்பற்றும் என்று விவரம் அறிந்தவர்கள் கூறுகின்றனர்.
Click it and Unblock the Notifications
Sign in with Google