கோவை குலுங்கணும்! அதிமுகவினர் குவியணும்! ஆர்ப்பாட்டத்துக்கு ஆள் திரட்டும் எஸ்.பி.வேலுமணி!

கோவை: கோவையில் மின் கட்டண உயர்வை கண்டித்து வரும் திங்கள்கிழமை அன்று அதிமுக சார்பில் நடத்தப்படவுள்ள ஆர்ப்பாட்டத்தில், பிரம்மாண்டம் காட்ட திட்டமிட்டுள்ளார் அக்கட்சியின் முன்னாள் அமைச்சர் எஸ்.பி.வேலுமணி.

கோவை மாவட்ட அதிமுக அலுவலகமான இதயதெய்வம் மாளிகையில் இதற்காக நடைபெற்ற ஆலோசனைக் கூட்டத்தை பொதுக்கூட்டம் போல் நடத்தியிருக்கிறார் எஸ்.பி.வேலுமணி.

தமிழகத்திலேயே கோவையை போல் வேறு எந்த ஊரிலும் கூட்டமில்லை என்று சொல்லும் அளவுக்கு பெருவாரியான எண்ணிக்கையில் கட்சியினரை திரட்டும் பணியில் ஈடுபட்டு வருகிறார் அவர்.

மின் கட்டணம்

மின் கட்டண உயர்வை கண்டித்து வரும் 25-ஆம் தேதி திங்கள்கிழமை அன்று தமிழகம் முழுவதும் அதிமுக சார்பில் ஆர்ப்பாட்டம் நடத்தப்படும் என அறிவித்துள்ளார் அக்கட்சியின் இடைக்கால பொதுச்செயலாளர் எடப்பாடி பழனிசாமி. இதையடுத்து முன்னாள் அமைச்சர்களும், அதிமுக மாவட்டச் செயலாளர்களும் ஆர்ப்பாட்டத்தை வெற்றிபெற வைப்பது தொடர்பான ஆலோசனைக் கூட்டங்களை மாவட்டந்தோறும் நடத்தி வருகின்றனர்.

கோவை மாவட்டம்

அந்த வகையில் கோவை மாவட்ட அதிமுக அலுவலகமான இதய தெய்வம் மாளிகையில், முன்னாள் அமைச்சர் எஸ்.பி.வேலுமணி தலைமையில் ஆலோசனைக் கூட்டம் நடைபெற்றது. அதில் கோவை மாவட்டத்தை சேர்ந்த சட்டமன்ற உறுப்பினர்கள், ஊரக, நகர்ப்புற உள்ளாட்சி பிரதிநிதிகள், கட்சி நிர்வாகிகள் என பலர் கலந்துகொண்டனர். ஆலோசனைக் கூட்டத்தையே பொதுக்கூட்டம் போல் நடத்தி கவனம் ஈர்த்துள்ளார்.

மத்திய அரசு

மத்திய அரசு எதைச் சொன்னாலும் அதை கேட்பது போல், மின் கட்டண உயர்வுக்கு மட்டும் மத்திய அரசு மீது திமுக அரசு பழியை போடுவது ஏற்புடையதல்ல எனப் பேசினார். மேலும், அதிமுக ஆட்சிக்காலத்தில் மக்கள் கஷ்டப்படுகிறார்கள் என்பதால் மின் கட்டணத்தை உயர்த்தக் கூடாது என்பதில் எடப்பாடி பழனிசாமி மிக உறுதியாக இருந்தார் என்றும் ஆனால் இன்று மக்களை பற்றிய எந்த கவலையும் அரசுக்கு இல்லை என திமுகவை சாடினார்.

அதிக கூட்டம்

இதனிடையே திங்கள்கிழமை கோவையில் மின் கட்டண உயர்வை கண்டித்து நடைபெறும் ஆர்ப்பாட்டத்தில், அதிமுகவினரை அலை அலையாக பங்கேற்க வைப்பதற்கான பணிகளையும் தொடங்கியிருக்கிறார். ஏற்கனவே கோவையில் எஸ்.பி.வேலுமணியும் அமைச்சர் செந்தில் பாலாஜியும் ஒருவரை ஒருவர் எதிர்த்து கடுமையான முறையில் அரசியல் செய்து வருவது குறிப்பிடத்தக்கது.

English summary

Ex Minister S.P.Velumani: கோவையில் மின் கட்டண உயர்வை கண்டித்து வரும் திங்கள்கிழமை அன்று அதிமுக சார்பில் நடத்தப்படவுள்ள ஆர்ப்பாட்டத்தில், பிரம்மாண்டம் காட்ட திட்டமிட்டுள்ளார் எஸ்.பி.வேலுமணி.