"கலங்காதே ஷர்மிளா.. நான் இருக்கேன்.." டிஸ்மிஸ்சான கோவை பெண் டிரைவருக்கு வேறு வேலை.. கனிமொழி உறுதி
கோவை: கோவையைச் சேர்ந்த பெண் பேருந்து ஓட்டுநர் ஷர்மிளாவுக்கு, வேறு வேலை மற்றும் தேவையான உதவிகளை அளிப்பதாக கனிமொழி எம்.பி. உறுதியளித்துள்ளார்.
கோவையின் முதல் தனியார் பேருந்து பெண் ஓட்டுநரான 23 வயது ஷர்மிளா பயணிகள் பேருந்தை திறம்பட ஒட்டி வந்தது அனைவரது கவனத்தையும் ஈர்த்தது. இந்நிலையில் நேற்றிரவு கோவை சென்ற கனிமொழி, இன்று காலை கோவை காந்திபுரம் பேருந்து நிலையத்திலிருந்து லஷ்மி மில் சிக்னல் வரை ஷர்மிளா இயக்கிய டவுன் பஸ்ஸில் பயணித்தார்.
அப்போது கனிமொழியிடம் பெண் கண்டக்டர் டிக்கெட் கேட்டதாகவும் அதற்கு எனது கெஸ்டிடம் எப்படி டிக்கெட் கேட்கலாம் என ஓட்டுநர் ஷர்மிளா அவர் மீது கோபப்பட்டு பேருந்து உரிமையாளரிடம் புகார் சொல்ல சென்றதாகவும் தெரிகிறது. இதனிடையே கனிமொழி உதவியாளர் ரூ.120 கொடுத்து 6 டிக்கெட் எடுத்துவிட்டார். பிரச்சனை அதுவல்ல. தனது விருந்தாளியிடம் டிக்கெட் கேட்டது ஏன் என்பது தான் ஷர்மிளாவின் ஆதங்கம்.
இதனிடையே பேருந்து அலுவலகத்தில் நடந்த வாக்குவாதத்தில் ஷர்மிளா பணி நீக்கம் செய்யப்பட்டார். இதனையறிந்த கனிமொழி உடனடியாக பணிநீக்கம் செய்யப்பட்ட பெண் பேருந்து ஓட்டுநர் ஷர்மிளாவை அலைபேசி மூலம் தொடர்பு கொண்டு பேசி நடந்த விவரத்தை கேட்டறிந்தார். மேலும்,
வேறு வேலை மற்றும் தேவையான உதவிகளை அளிப்பதாகவும் கனிமொழி எம்.பி. உறுதியளித்தார்.
டாக்டர், என்ஜினியர் பணி மட்டுமல்ல அனைத்து பணிகளையும் பெண்களால் செய்ய முடியும் என்பதற்கு உதாரணம் தான் பெண் ஓட்டுநர் ஷர்மிளா என கனிமொழி எம்பி காலையில் தான் பாராட்டியிருந்தார். அவர் பாராட்டி 2 மணி நேரத்திற்குள் ஷர்மிளாவின் வேலை பறிக்கப்பட்டது குறிப்பிடத்தக்கது.
Click it and Unblock the Notifications
Sign in with Google