PM Kisan: அக்கவுண்டுக்கு வந்த ரூ.2,000.. பிஎம் கிசான் உதவித் தொகை.. 9 கோடி விவசாயிகளுக்கு விடுவித்தார் மோடி

கோவை: கோவைக்கு இன்று வரும் பிரதமர் மோடி பிஎம் கிஷான் திட்டத்தின் 21-வது தவணையை இன்று விடுவித்தார். இதன் மூலம் தமிழகத்தில் மட்டும் 22 லட்சம் விவசாயிகளுக்கு வங்கி கணக்கில் ரூ.2,000 ஏறுகிறது. இது தொடர்பாக நேற்று தகுதியான விவசாயிகளின் செல்போன் எண்ணுக்கு குறுந்தகவல் அனுப்பப்பட்டுள்ளது. இன்று கோவை வந்த பிரதமர் மோடி இந்த உதவித்தொகையை விடுவித்தார்.

பிரதமர் மோடி ஒரு நாள் பயணமாக இன்று கோவை வந்துள்ளார். அப்போது பிரதமர் மோடி தென்னிந்திய இயற்கை வேளாண் மாநாட்டினை தொடங்கி வைத்தார். இன்று முதல் 3 நாட்களுக்கு இந்த மாநாடானது நடக்கிறது. தொடர்ந்து பிரதமர் மோடி பிஎம் கிஷான் திட்டத்தின் கீழ் 21வது தவணையை இன்று விடுவித்தார்.

பிஎம் கிஷான் திட்டம்

விவசாயிகளுக்கு ஆண்டுதோறும் ரூ.6 ஆயிரம் உதவித்தொகை மூன்று தவணையாக வழங்கும் திட்டமே பிஎம் கிஷான் திட்டம். இந்த திட்டத்தின் கீழ் நாடு முழுவதும் உள்ள சிறு மற்றும் குறு விவசாயிகளுக்கு இந்த நிதி உதவியானது வழங்கப்படுகிறது. ஒரு தவணையில் ரூ.2,000 என மூன்று தவணையாக ஆண்டுதோறும் விவசாயிகளுக்கு ரூ.6000 வழங்கப்படுகிறது.

இந்த திட்டத்தின் கீழ் 9 கோடி விவசாயிகள் பயன்பெற்று வருகிறார்கள். தற்போது விவசாய நிலங்கள் தொடர்பாக கிராமப்புறங்களில் பயனாளிகளின் பட்டா எண் உள்ளிட்ட தகவல்கள் சேர்க்கப்பட்டது. இதன்படி தகுதி வாய்ந்த விவசாயிகளுக்கு மட்டுமே இந்த உதவித் தொகையானது வழங்கப்படுகிறது. அதன்படி தமிழகம் உள்பட நாடு முழுவதும் உள்ள 9 கோடி விவசாயிகளுக்கு ரூ.2000 உதவித்தொகை விடுவிக்கப்பட்டது. தமிழகத்தில் மட்டும் 22 லட்சம் விவசாயிகளுக்கு இந்த உதவித்தொகை கிடைக்கிறது.

செல்போனுக்கு வந்த மெசேஜ்

முன்னதாக நேற்று மாலை முதல் பயனாளிகள் செல்போன் எண்களுக்கு குறுந்தகவல் வந்திருக்கிறது. இதில், "பிரதம மந்திரி கிசான் சம்மான் நிதி திட்டத்தின் 21வது தவணை தொகையை 19.11.2025 அன்று மதியம் 1.00 மணிக்கு மாண்புமிகு பாரத பிரதமர் அவர்கள் விடுவிக்கிறார். கீழே கொடுக்கப்பட்டுள்ள இணைப்பை பயன்படுத்தி இந்நிகழ்ச்சியில் கலந்துக்கொள்ள உங்களை அன்புடன் அழைக்கிறோம் https://pmindiawebcast.nic.in/. உங்கள், சிவ்ராஜ் சிங் சௌஹான், மத்திய அமைச்சர் வேளாண்மை மற்றும் உழவர் நல அமைச்சகம். என்று கூறப்பட்டு இருந்தது.

18 ஆயிரம் கோடி

இன்று பிரதமர் மோடி நாடு முழுவதும் உள்ள பயனாளிகளுக்காக ரூ.18 ஆயிரம் கோடி நிதியை விடுவித்துள்ளார். இதில் தமிழகத்தில் 21 லட்சத்து 80 ஆயிரத்து 204 விவசாயிகள் பயன் பெறுகிறார்கள். தமிழகத்தில் மாவட்ட வாரியாக பயன்பெறும் விவசாயிகளின் எண்ணிக்கை வருமாறு:-

1. அரியலூர் - 67,845
2. செங்கல்பட்டு -26,431
3. சென்னை -38
4. கோவை -44,837
5. கடலூர் -75,924
6. தருமபுரி -1,00,192
7. திண்டுக்கல் -73,409
8. ஈரோடு -72,671
9. கள்ளக்குறிச்சி -74,425
10. காஞ்சிபுரம் -21,873
11. கன்னியாகுமரி -1,19,279
12. கரூர் -48,509
13. கிருஷ்ணகிரி -85,527
14. மதுரை -55,494
15. மயிலாடுதுறை -13,154
16. நாகப்பட்டினம் -22,537
17. நாமக்கல் -64,542
18. பெரம்பலூர் -51,570
19. புதுக்கோட்டை - 79,747
20. ராமநாதபுரம் -56,799
21. ராணிப்பேட்டை -40,270
22. சேலம் -1,15,753
23. சிவகங்கை -57,976
24. தென்காசி -38,148
25. தஞ்சாவூர் - 63,641
26. நீலகிரி - 20,460
27. தேனி - 26,501
28. திருவள்ளூர் -40,079
29. திருவாரூர் -38,891
30. தூத்துக்குடி -47,336
31. திருச்சி - 99,739
32. நெல்லை -29,344
33. திருப்பத்தூர் -39,134
34. திருப்பூர் - 61,356
35. திருவண்ணாமலை - 1,39,012
36. வேலூர் -34,993
37. விழுப்புரம் - 82,947
38. விருதுநகர் - 49,821

English summary

Prime Minister Narendra Modi is visiting Coimbatore today, where he will release the 21st installment of the PM-Kisan scheme. In Tamil Nadu alone, around 22 lakh farmers will receive ₹2,000 directly into their bank accounts. Eligible farmers received confirmation messages on their mobile phones yesterday, and the funds will be credited immediately after the Prime Minister initiates the transfer.