விலகாத “மர்மம்”.. கோவை கார் வெடிப்பில் இறந்த ஜமேஷ்.. இரவு நடந்தது என்ன? 7 பேரிடம் போலீஸ் விசாரணை

கோவை: உக்கடம் அருகே காரில் சிலிண்டர் வெடித்த சம்பவம் பெரும் பரபரப்பை ஏற்படுத்தி இருக்கும் நிலையில், இதில் உயிரிழந்த ஜமேஷ் முபினுடன் இரவு தங்கி இருந்த 4 பேர் உட்பட 7 பேரிடம் தனிப்படை போலீசார் தீவிர விசாரணை மேற்கொண்டு வருகின்றார்கள்.

கோவை உக்கடம் கோட்டைமேடு பகுதியில் உள்ள சங்கமேஷ்வரர் கோயில் அருகே நேற்று அதிகாலை 4.10 மணியளவில் கார் ஒன்றில் எரிவாயு சிலிண்டர் வெடித்து, காரில் இருந்த நபர் உயிரிழந்தார்.

இந்த விபத்து ஏற்பட்ட பகுதியில் இருந்து அரை கிலோ மீட்டர் தூரத்திற்கு போலீசார் தடுப்பு வேலிகள் அமைத்து தீவிர விசாரணை மேற்கொண்டனர். தகவலறிந்த டிஜிபி சைலேந்திர பாபு சம்பவ இடத்துக்கு நேரில் சென்று பார்வையிட்டார்.

அடையாளம் கண்ட போலீஸ்

இந்த நிலையில் காரில் சிலிண்டர் வெடித்த விபத்தில் உயிரிழந்தவர் ஜமேஷ் முபின் என்ற பொறியியல் பட்டாதாரி என்பது தெரியவந்தது. அவர் ஒட்டிவந்த சென்னை பதிவு எண் கொண்ட கார் பொள்ளாச்சியை சேர்ந்த பிரபாகர் என்ற நபரின் பெயரில் பதிவு செய்யப்பட்டு இருந்தது.

இறந்தவர் யார்?

அதன் அடிப்படையில் மேற்கொள்ளப்பட்ட விசாரணையில் உயிரிழந்தவர் உக்கடம் பகுதியை சேர்ந்த ஜமேஷ் என போலீசார் விசாரணையில் கண்டனறிந்தனர். இந்த சம்பவம் விபத்தா? அல்லது சதிவேலையா? என்பது குறித்து தனிப்படை அமைக்கப்பட்டு பல கோணங்களிலும் விசாரணை நடைபெற்று வருவதாக டிஜிபி சைலேந்திர பாபு தெரிவித்தார்.

வெடிமருந்து

இறந்த நபர் கடந்த 2019 ஆம் ஆண்டு என்.ஐ.ஏ.வால் விசாரணை செய்யப்பட்டவர் என்று தெரிவித்த சைலேந்திர பாபு, அவரது வீட்டில் வெடிகுண்டுகள் தயாரிக்கப் பயன்படும் வெடிமருந்து பொருட்கள் இருந்ததாகவும், காரில் ஆணிகள் இருந்ததாகவும் கூறி இருக்கிறார். இறந்தவர் மீது வழக்குகள் இல்லை என்றும், அவர் தற்கொலை செய்வதற்கான வாய்ப்புகள் குறைவு எனவும் அவர் தெரிவித்தார்.

7 பேரிடம் விசாரணை

இவரது செல்போனில் கடைசியாக தொடர்புகொண்ட அனைவரிடமும் விசாரணை நடைபெற்று வருகிறது என்று கூறிய டிஜிபி என்.ஐ.ஏ. விசாரணைக்கு கொண்டு செல்வதற்கான வாய்ப்புகள் இருப்பதாக தெரிவித்தார். இந்த நிலையில் ஜமேஷ் முபின் மற்றும் சிலர் வீட்டில் இருந்து வெளியேறும் சிசிடிவி காட்சிகள் வெளியாகின. இதற்கிடையே ஜமேஷ் முபின் இறப்பதற்கு முதல் நாள் இரவு அவரோடு இருந்த 4 பேர் உட்பட 7 பேரிடம் தனிப்படை போலீசார் விசாரணை நடத்தி வருகின்றனர்.

English summary

Special forces police are conducting intensive investigation of 7 people including 4 people who stayed the saturday night with the deceased Jamesh Mubin in Coimbatore car blast.