“பாஜகவுக்கு எத்தனை சீட்னு சொல்லும் இடத்தில் நான் இல்லை.. அந்த மீட்டிங்கிற்கு போகல”- அண்ணாமலை பேட்டி!
சென்னை: அதிமுக கூட்டணியில் கட்சிகள் போட்டியிடும் சீட் எண்ணிக்கை பற்றி ஒரு தகவல் தமிழக அரசியல் அரங்கில் சமீப நாட்களாக உலவி வருகிறது. பாஜக 23 இடங்களில் போட்டியிட உள்ளதாக அதில் குறிப்பிடப்பட்டிருந்தது. அதுபற்றிய கேள்விக்கு பாஜக முன்னாள் மாநில தலைவர் அண்ணாமலை பதில் அளித்துள்ளார்.
கோவையில் இன்று செய்தியாளர்களைச் சந்தித்த முன்னாள் தமிழக பாஜக தலைவர் அண்ணாமலை பேசுகையில், "டிசம்பர் கடைசி வாரத்தில் இருக்கிறோம். இன்னும் 3 மாதங்கள் முழுமையாக உள்ளது. ஆகையால், தேசிய ஜனநாயக கூட்டணி எப்படி இருக்கும்? அதன் வலிமை எப்படி இருக்கும்? என்பதனைப் பொறுத்திருந்து பார்ப்போம்.
கடலூரில் ஜனவரி 9 ஆம் தேதி பொதுக் கூட்டம் நடத்தவிருப்பதாக தேமுதிக பொதுச் செயலாளர் பிரேமலதா விஜயகாந்த் தெரிவித்துள்ளார். ஜனவரியில் எந்த முடிவையும் எடுப்பதாய் இல்லை என்று அமமுக பொதுச் செயலாளர் டிடிவி தினகரனும் கூறியிருக்கிறார். ஓபிஎஸ்ஸும் நேற்றுதான் கட்சிக் கூட்டம் நடத்தி, கருத்துகளைக் கேட்டிருக்கிறார். ஆகையால், எல்லாரும் நல்ல முடிவு எடுப்பார்கள்.
தேசிய ஜனநாயக கூட்டணி வலிமையாக தேர்தல் களத்தில் நின்று, ஒரு பெரும் வெற்றியைப் பெறுவதற்கான எல்லா சாத்தியக் கூறுகளும் உள்ளன. பொறுமை காப்போம், நேரம் இருக்கிறது. திமுகவை வீழ்த்த வேண்டும் என்பது மட்டுமே தேசிய ஜனநாயக கூட்டணியின் ஒற்றை இலக்கு. எல்லா தலைவர்களும், எல்லா கட்சிகளும் மரியாதையாக நடத்தப்பட்டு, தேசிய ஜனநாயக கூட்டணி ஆட்சிக் கட்டிலில் அமரும்" என்று தெரிவித்தார்.
சமீபத்தில், தமிழக சட்டசபை தேர்தலில் அதிமுக கூட்டணியில் கட்சிகள் போட்டியிடும் சீட் எண்ணிக்கை பற்றி ஒரு தகவல் தமிழக அரசியல் அரங்கில் உலவி வருகிறது. பாஜக 23 இடங்களில் போட்டியிட உள்ளதாக அதில் குறிப்பிடப்பட்டிருந்தது. அதுபற்றி அண்ணாமலையிடம் செய்தியாளர்கள் கேள்வி எழுப்பினர்.
அதற்கு பதில் அளித்த அண்ணாமலை, "நான் எந்த மீட்டிங்கிலும் இல்லை. இதற்கும் எனக்கும் சம்பந்தம் இல்லை. பாஜகவுக்கு எத்தனை தொகுதிகள் என்பதை சொல்லும் இடத்தில் நான் இல்லை. எனவே இதுபற்றி நான் கருத்து சொல்வது சரியாக இருக்காது. சம்பந்தப்பட்ட தலைவர்கள் தான் இதுபற்றி கருத்துச் சொல்லவேண்டும். பியூஷ் கோயல் தமிழக தேர்தல் பொறுப்பாளராக இருக்கிறார், எல்லா கட்சிகளுடனும் பேச வேண்டிய நேரத்தில் பேசி முடிவு செய்வார்கள்." எனத் தெரிவித்துள்ளார்.
Click it and Unblock the Notifications
Sign in with Google