அதிமுக பிரமுகருக்கு ஆஃபர்களை அள்ளித்தரும் பாஜக! ஆள் பிடிக்கும் படலம் தீவிரம்! அடுத்தது என்ன?

பாஜகவில் இணையுமாறு வந்த அழைப்பை அதிமுக பெண் பிரமுகர் நிராகரிப்பு.

Published: Wednesday, March 8, 2023, 11:40 [IST]

Subscribe to Oneindia Tamil

கோவை: கோவையை சேர்ந்த அதிமுக முக்கிய பெண் பிரமுகருக்கு தேசியளவில் முக்கியப் பதவி வழங்கப்படும் என்ற உறுதியுடன் பாஜகவிலிருந்து அழைப்பு விடுக்கப்பட்டிருக்கிறது.

இதேபோல் காங்கிரஸ் கட்சியிலிருந்தும் 6 மாதங்களுக்கு முன்பாகவே அதிமுக பெண் பிரமுகருக்கு தூது அனுப்பப்பட்டிருக்கிறது.

இதற்கு காரணம் தமிழ், ஆங்கிலம், இந்தி, குஜராத்தி, என பல மொழிகளில் மிகவும் சரளமாக பேசக்கூடிய திறமை அந்த பெண் பிரமுகரிடம் இருப்பதேயாகும்.

சோனாலி பிரதீப்

கோவை மாவட்ட அதிமுக இளைஞர் மற்றும் இளம் பெண்கள் பாசறையின் இணைச் செயலாளராக இருப்பவர் சோனாலி பிரதீப். இவரது தந்தை அதிமுககாரர். இவர்களது பூர்விகம் குஜராத் என்றாலும் தமிழ்நாட்டில் செட்டிலாகி மூன்று தலைமுறைகள் ஆகிவிட்டது. இந்தி, ஆங்கிலம், குஜராத்தி, தமிழ், மலையாளம், என பல மொழிகளிலும் சரளமாக பேசக் கூடிய சோனாலி பிரதீப், ஜெயலலிதா மீது கொண்ட பற்று காரணமாக கடந்த சில ஆண்டுகளாக அதிமுகவில் தீவிரமாக இயங்கி வருகிறார்.

கட்சியில் பதவி

அதிமுகவில் மாநில பதவியை எதிர்பார்த்து காத்திருக்கும் இவர் கடந்த நகர்ப்புற உள்ளாட்சித் தேர்தலில் கோவை மேயர் வேட்பாளராக முன்னிறுத்தப்படுவார் என்றெல்லாம் செய்திகள் உலா வந்தன. ஆனால் இவருக்கு கவுன்சிலர் சீட் கொடுக்கப்படவில்லை. இதனிடையே காங்கிரஸ் கட்சியில் இணையுமாறும் பல மொழிகள் தெரிந்திருப்பதால் பதவிகள் தேடி வரும் எனவும் 6 மாதங்களுக்கு முன்பு டெல்லியிலிருந்து முக்கியப் பிரமுகர் ஒருவர் உறுதி கொடுத்துள்ளார்.

பாஜகவில் இணைய அழைப்பு

ஆனால் அதனை பொருட்படுத்தாத சோனாலி பிரதீப், ஆளை விடுங்க சாமி என்று கூறிவிட்டு அதிமுகவிலேயே தொடர்ந்து தீவிரமாக இயங்கி வருகிறார். இந்நிலையில் பாஜகவிலிருந்து முக்கியப் புள்ளிகளை அதிமுகவில் இணைத்து அதிர்ச்சி கொடுத்த எடப்பாடி பழனிசாமிக்கு பதிலடி கொடுக்க பாஜக காய் நகர்த்தி வருகிறது. அந்த வகையில் அதிமுக பெண் பிரமுகரான சோனாலி பிரதீப்புக்கு பாஜகவில் இணையுமாறு தூது அனுப்பப் பட்டிருக்கிறது.

கட்சி மாறும் எண்ணமில்லை

விரைவில் தேசியளவில் முக்கியப் பதவி வழங்கப்படும் என்ற உறுதி அளிக்கப்பட்டும் பாஜகவுக்கு சிறிதும் பிடிகொடுக்காமல் பெரிய கும்பிடு ஒன்றை போட்டிருக்கிறார் சோனாலி பிரதீப். கடைசி வரை ''அம்மா கட்சியில்'' தான் இருப்பேன் என்றும் கட்சி மாறும் எண்ணமே தமக்கு கிடையாது என்பதையும் அவர் தூது வந்தவர்களிடம் கூறியிருக்கிறார். இதனால் வேறு சில அதிமுக புள்ளிகளை இழுக்க பாஜக தீவிரம் காட்டுகிறது.

Published On March 8, 2023