கூட்டணியை விட்டு சென்றவர்கள் செல்லாத காசு.. பாஜகவை கடுமையாக தாக்கிய அதிமுக மாஜி அமைச்சர்

கோவை: அதிமுக கூட்டணியை விட்டு சென்றவர்கள் செல்லாத காசு என்று பாஜகவை மிகக் கடுமையாக விமர்சித்து அதிமுக முன்னாள் அமைச்சர் பொள்ளாச்சி ஜெயராமன் பேசினார். கோவையில் நடைபெற்ற பூத் கமிட்டி கூட்டத்தில் இவ்வாறு காட்டமாக விமர்சித்தார்.

அதிமுகவுக்கும் தமிழக பாஜக தலைவர் அண்ணாமலைக்கும் அவ்வப்போது கருத்து மோதல்கள் ஏற்பட்டு வந்தது. முன்னாள் முதல்வர் ஜெயலலிதா குறித்து அண்ணாமலை கூறிய கருத்துக்கு அதிமுக கடும் கண்டனம் தெரிவித்தது. இந்த விவகாரம் சற்று அடங்கியிருந்த நிலையில், தமிழக முன்னாள் முதல்வர் அண்ணாதுரை குறித்து தமிழக பாஜக தலைவர் அண்ணாமலை பேசியது மீண்டும் அதிமுக - பாஜக மோதலுக்கு வித்திட்டது.

அதிமுக முன்னாள் அமைச்சர்கள் பாஜக தலைவர் அண்ணாமலையை கடுமையாக விமர்சிக்க பதிலுக்கு அண்ணாமலையும் காட்டமாக பதிலடி கொடுத்தார். இதனால், இரு தரப்பிலும் விரிசல் அதிகரித்தது. இந்த நிலையில் நேற்று செய்தியாளர்களை சந்தித்த அதிமுக முன்னாள் அமைச்சர் ஜெயக்குமார், பாஜகவுடன் தற்போதைக்கு கூட்டணி இல்லை என்றும் தேர்தல் காலத்தில் தான் முடிவு செய்யப்படும் என்று அதிரடியாக அறிவித்தார்.

கூட்டணியை முறித்து கொள்வதாக அதிமுக அறிவித்த மறு நிமிடமே தமிழக பாஜக தலைவர்கள் பலரும் காட்டமாக அதிமுகவை விமர்சிக்க தொடங்கினர். பதிலுக்கு அதிமுக தலைவர்களும் விமர்சித்து வருகின்றனர். அந்த வகையில் இன்று கோவையில் நடைபெற்ற பூத் கமிட்டி கூட்டத்தில் பேசிய அதிமுக முன்னாள் அமைச்சர் பொள்ளாச்சி ஜெயராமன், பாஜகவை கடுமையாக சாடினார். பொள்ளாச்சி ஜெயராமன் கூறியதாவது:-

அதிமுக உறுப்பினர்கள் எண்ணிக்கையை 1.5 கோடியில் இருந்து 2.5 கோடியாக அதிகரிக்க நடவடிக்கைகள் எடுக்கப்பட்டு வருகிறது. மதுரையில் நடைபெற்ற அதிமுக மாநாடு வெற்றிகரமாக முடிந்தது. நாடாளுமன்ற தேர்தல் விரைவில் நடைபெற இருக்கிறது. சட்டமன்றத்திற்கும் அதோடு தேர்தல் வரலாம். எனவே தொண்டர்கள் அதற்கும் தயாராக இருக்க வேண்டும்.

அதிமுக கூட்டணியை விட்டு சென்றவர்கள் கிழிந்து இத்துப்போன செல்லாக்காசு. அதிமுகவுடன் கூட்டணி சேர்ந்தால் செல்லும் ரூபாய் நோட்டாக இருப்பார்கள். எடப்பாடி பழனிசாமியை வருங்கால முதல்வராக ஏற்றுக்கொள்கிறவர்களுடன் தான் கூட்டணி வைப்போம். அதிமுகவை எதிர்த்தவர்களின் எதிர்காலம் சூனியமாக இருக்கும்" என்று காட்டமாக பேசினார்.

English summary

Former AIADMK Minister Pollachi Jayaraman criticized the BJP saying that those who left the AIADMK alliance are bad money. At the Booth Committee meeting held in Coimbatore, he criticized it like this.