சூப்பர் சாதனை.. நீட் தேர்வில் வெள்ளியங்காடு அரசுப் பள்ளியில் படித்த 3 மாணவர்கள் தேர்ச்சி

கோவை: கோவை மாவட்டம் மேட்டுப்பாளையத்தை அடுத்துள்ள வெள்ளியங்காட்டில் செயல்பட்டு வரும் அரசு மேல்நிலைப்பள்ளி பள்ளியில் பயின்ற 3 மாணவர்கள் நீட் தேர்வில் வெற்றி பெற்று சாதனை படைத்துள்ளனர்.

கொரோனா பரவல் காரணமாக நாடு முழுவதும் +2 தேர்வுகள் இந்த ஆண்டு ரத்து செய்யப்பட்டது. +2 தேர்வுகள் ரத்து செய்யப்பட்ட போதிலும் மருத்துவ படிப்புகளுக்கான நீட் தேர்வு நடத்தப்பட்டது.

இந்தத் தேர்வில் வெள்ளியங்காடு அரசு மேல்நிலைப் பள்ளியில் படித்த 3 மாணவர்கள் தேர்ச்சி பெற்று சாதனை படைத்துள்ளனர்.

கோவை மாவட்டம் மேட்டுப்பாளையத்தை அடுத்துள்ள வெள்ளியங்காட்டில் அரசு மேல்நிலைப்பள்ளி செயல்பட்டு வருகிறது. இப்பள்ளியில் தற்போது 975 மாணவர்கள் பயின்று வருகின்றனர்.

மேலும்,வெள்ளியங்காடு பகுதியைச் சுற்றிலும் உள்ள சொடுக நஞ்சனூர், அன்சூர், குண்டூர், மானாறு உள்ளிட்ட பல்வேறு பழங்குடியின கிராமங்கள் உள்ளன. இக்கிராமங்களில் இருந்து இப்பள்ளியில் 175 பழங்குடியின மாணவர்கள் பயின்று வருகின்றனர்.

இந்நிலையில் கடந்த செப்டம்பர் மாதம் 12 ஆம் தேதியன்று நாடு முழுவதும் நடைபெற்ற நீட் தேர்வில் வெள்ளியங்காடு அரசு மேல்நிலைப்பள்ளியைச் சேர்ந்த மொத்த ஐந்து மாணவர்கள் தேர்வு எழுதினர்.

இத்தேர்வில் தாரணி பிரியா என்ற மாணவி 169 மதிப்பெண்களும், ஷாகா ஸில்வானஸ் என்ற மாணவன் 150 மதிப்பெண்களும்,சரிகா என்ற மாணவி 122 மதிப்பெண்களையும் பெற்று சாதனை படைத்துள்ளனர்.

அரசுப்பள்ளியில் பயின்று தேசிய அளவில் நடைபெற்ற நீட் தேர்வில் வெற்றி பெற்ற மாணவர்களைப் பள்ளி தலைமையாசிரியர் பெள்ளி மற்றும் பெற்றோர் ஆசிரியர் கழகத் தலைவர் ராமதாஸ், ஆசிரியர்கள் மற்றும் பெற்றோர் ஆசிரியர் கழக நிர்வாகிகள் பாராட்டி வாழ்த்துக்களைத் தெரிவித்துள்ளனர்.

English summary

NEET exam results in 2021. Tamilnadu govt school students in Neet 2021.