கோவை குலுங்குது.. ஒருபக்கம் விஜய்.. மறுபக்கம் உதயநிதி ஸ்டாலின்.. ஒரே நாளில் கொங்கு விசிட்!
கோவை: இன்று கோவை வந்தடைந்தார் துணை முதலமைச்சர் உதயநிதி ஸ்டாலின். அவருக்கு திமுகவினர் மற்றும் பொதுமக்கள் உற்சாக வரவேற்பு அளித்துள்ளனர். கோவையில் அமைக்கப்பட உள்ள உலகத்தரம் வாய்ந்த ஹாக்கி மைதானத்திற்கு இன்று அடிக்கல் நாட்டுகிறார் துணை முதல்வர் உதயநிதி.
தமிழக வெற்றிக் கழகத் தலைவர் விஜய், கோவையில் தவெக பூத் கமிட்டி நிர்வாகிகள் கருத்தரங்கில் பங்கேற்றுள்ளார். இந்தச் சூழலில் உதயநிதியும் கோவையில் முகாமிட்டுள்ளார்.
கோவையில் உதயநிதி ஸ்டாலின்
இன்று பிற்பகல் 2.30 மணிக்கு சென்னையில் இருந்து விமானத்தில் புறப்பட்டு கோவை வந்தடைந்தார் துணை முதல்வர் உதயநிதி ஸ்டாலின். அவருக்கு கோவை விமான நிலையத்தில் திமுக நிர்வாகிகள் உற்சாக வரவேற்பு அளித்தனர். அமைச்சர் செந்தில் பாலாஜி உடன் இன்று கோவையில் அரசு விழாக்களில் பங்கேற்கிறார் துணை முதல்வர் உதயநிதி ஸ்டாலின்.
முன்னதாக இன்று, கோவையில் தமிழர் பண்பாட்டு ஜல்லிக்கட்டு பேரவை மற்றும் கோவை மாவட்ட நிர்வாகம் இணைந்து நடத்தும், 800க்கும் மேற்பட்ட காளைகள் கலந்துகொள்ளும் மாபெரும் ஜல்லிக்கட்டு விழாவை இன்று காலையில் துவக்கி வைத்து கலந்து கொண்டார் அமைச்சர் செந்தில் பாலாஜி. ஜல்லிகட்டு முடிவில் இன்று மாலை முதல்வர் சார்பில், சிறந்த மாடுபிடி வீரருக்கு ஒரு காரும், யாரும் பிடிக்கப்படாத காளைக்கு துணைமுதல்வர் சார்பில் ஒரு காரும் பரிசு வழங்கப்பட உள்ளது.
ஹாக்கி மைதானம் அடிக்கல்
மேலும், அமைச்சர் செந்தில் பாலாஜி ஏற்பாட்டில் நடக்கும் 25 ஆயிரத்து 526 பயனாளிகளுக்கு 21,531 கோடி ரூபாய் மதிப்பீட்டில் நலத்திட்ட உதவிகளை வழங்கி சுமார் 100 கோடி ரூபாய் மதிப்பிலான முடிவுற்ற பணிகளை துவக்கி வைக்கிறார் துணை முதலமைச்சர் உதயநிதி ஸ்டாலின்.
கோவையில் அமைய உள்ள உலகத்தரம் வாய்ந்த ஹாக்கி மைதானம் உள்ளிட்ட புதிய பணிகளுக்கு அடிக்கல் நாட்டுகிறார் துணை முதல்வர் உதயநிதி. கோவை ஆர்.எஸ்.புரத்தில் இந்த ஸ்டேடியம் கட்டப்பட உள்ளது. இரண்டு கட்டங்களாக நடைபெறும் இந்த ஹாக்கி ஸ்டேடியம் (International Hockey Federation - IHF) விதிமுறைகளின் படி கட்டப்பட உள்ளது
செந்தில் பாலாஜி ராஜினாமா
அமைச்சர் செந்தில் பாலாஜியோடு, அரசு விழாவில் மேடையை பகிர்ந்து கொள்ளும் துணை முதல்வர் உதயநிதி ஸ்டாலின் இந்த விழா முடித்து சென்னை வந்த பிறகு செந்தில் பாலாஜி தனது அமைச்சர் பதவியில் இருந்து ராஜினாமா செய்த தகவல் வெளியாகும் என்றும் பரபர தகவல்கள் வெளியாகி வருகின்றன.
உச்ச நீதிமன்ற உத்தரவு காரணமாக செந்தில் பாலாஜி தமது அமைச்சர் பதவியை ராஜினாமா செய்ய உள்ளதாக தகவல் வெளியாகியுள்ளது. அமைச்சர் பதவியா? ஜாமீனா என நாளை தெரிவிக்கும்படி உச்ச நீதிமன்றம் கூறி உள்ளதால் இன்று இரவுக்குள் அமைச்சர் பதவியை செந்தில் பாலாஜி ராஜினாமா செய்யக்கூடும் எனத் தெரிகிறது.
விஜய் கோவையில் இருக்கும் நேரத்தில்
தமிழக வெற்றிக் கழகத் தலைவர் விஜய் நேற்று கோவை வந்தார். தவெக பூத் கமிட்டி நிர்வாகிகளின் கோவை மண்டல கருத்தரங்கில் பங்கேற்று வருகிறார் விஜய். நேற்றும் இன்றும் இந்த கருத்தரங்கு நடைபெறுகிறது. இந்நிலையில் தான் துணை முதல்வர் உதயநிதி ஸ்டாலினும் கோவை விசிட் செய்துள்ளது கவனம் பெற்றுள்ளது.
நேற்று கோவை அவிநாசி சாலையில் தவெக தலைவர் விஜய் ரோடு ஷோ நடத்திய நிலையில், இன்று துணை முதல்வர் உதயநிதி ஸ்டாலினும் ரோடு ஷோ நடத்தி உள்ளார். உதயநிதி ஸ்டாலினுக்கு திமுக தொண்டர்கள் விமான நிலையத்தில் இருந்து வழிநெடுக உற்சாக வரவேற்பு அளித்துள்ளனர்.
Click it and Unblock the Notifications
Sign in with Google