வானதி சீனிவாசன் ஐசியூவில் அனுமதி.. 3-4 நாட்கள் தொடர் சிகிச்சை தேவையாம்.. என்ன பிரச்சனை?

கோவை: கோவை வடக்கு சட்டசபை தொகுதியின் பாஜக வேட்பாளரான வானதி சீனிவாசன் உடல்நலக்குறைவால் நேற்று மருத்துவமனையில் அனுமதிக்கப்பட்டார். அங்கு அவருக்கு சிகிச்சை அளிக்கப்பட்டது. இந்த சிகிச்சையின்போது வழங்கப்பட்ட மருந்தால் அவருக்கு ஒவ்வாமை ஏற்பட்டுள்ளது. இதையடுத்து உடனடியாக அவர் ஐசியூவுக்கு மாற்றப்பட்டதோடு அங்கு தீவிர சிகிச்சை அளிக்கப்பட்டு வருகிறது.

பாஜகவின் தேசிய மகளிரணியின் தலைவராக இருப்பவர் வானதி சீனிவாசன். இவர் கடந்த 2021 சட்டசபை தேர்தலில் கோவை தெற்கு சட்டசபை தொகுதியில் போட்டியிட்டு வெற்றி பெற்றார். அவர் மக்கள் நீதி மய்யம் கட்சியின் தலைவர் கமல்ஹாசனை வீழ்த்தி வாகை சூடினார்.

இந்நிலையில் தான் நடைபெற உள்ள சட்டசபை தேர்தலில் வானதி சீனிவாசன் தொகுதி மாறி களமிறங்கி உள்ளார். கோவை தெற்கு சட்டசபை தொகுதிக்கு பதில் கோவை வடக்கு சட்டசபை தொகுதியில் பாஜக வேட்பாளராக போட்டியிட்டுள்ளார்.

இந்நிலையில் தான் கடந்த சில நாட்களாக தொகுதியில் வானதி சீனிவாசன் தொடர்ந்து தீவிர பிரசாரம் மேற்கொண்டு வந்தார். இந்நிலையில் தான் நேற்று வானதி சீனிவாசனுக்கு உடல்நல பிரச்சனை ஏற்பட்டது. அவர் கால்வலியால் அவதிப்பட்டார். காலில் வீக்கம் ஏற்பட்டது. இதையடுத்து நேற்று மதியம் முதல் அவர் தனது பிரசாரத்தை ரத்து செய்தார். கேஎம்சிஎச் எனும் கோவை மெடிக்கல் சென்டர் மற்றும் மருத்துவமனையில் அவர் அனுமதிக்கப்பட்டார்.

அப்போது பாக்டீரியா தொற்றுவால் அவரது வலது காலில் பிரச்சனை இருப்பது தெரியவந்தது. இதனால் அவரால் நடக்க முடியாமல் போனதும் தெரியவந்தது. இதையடுத்து அவருக்கு மருத்துவமனையில் சிகிச்சை அளிக்கப்பட்டது. ஆண்டிபயாடிக் உள்பட மருந்துகள் வழங்கப்பட்டுள்ளதாக கூறப்படுகிறது. இந்த சிகிச்சையின்போது அவருக்கு வழங்கப்பட்ட மருந்தினால் ஒவ்வாமை பிரச்சனை ஏற்பட்டது.

இதனால் உடனடியாக அவர் நேற்று இரவு 8 மணியளவில் ஐசியூவுக்கு மாற்றம் செய்யப்பட்டார். ஐசியூவில் அவருக்கு தீவிர சிகிச்சை அளிக்கப்பட்டு வருகிறது. தற்போது அவர் நலமாக உள்ளார். தற்போது அவர் டாக்டர்களின் மருத்துவ கண்காணிப்பில் உள்ளார். இதனை மருத்துவமனை நிர்வாகம் உறுதி செய்துள்ளது.

ஐசியூவில் அவருக்கு சிகிச்சை அளிக்கப்பட்டு வரும் நிலையில் 3 முதல் 4 நாட்கள் வரை அவர் மருத்துவ சிகிச்சையில் இருக்க வேண்டும் என்றும் மருத்துவமனை நிர்வாகம் தெரிவித்துள்ளது. இதனால் வானதி சீனிவாசன் அடுத்த சில நாட்கள் கோவை வடக்கு தொகுதியில் பிரசாரம் செய்ய முடியாத நிலை உருவாகி உள்ளது. அவருக்கு பதிலாக பாஜக நிர்வாகிகள் பிரசாரத்தை முன்னெடுத்து வருகின்றனர்.

தேர்தல் நேரத்தில் வானதி சீனிவாசன் இத்தகைய உடல்நல பிரச்சனையை எதிர்கொள்வதால் அவரது ஆதரவாளர்கள் கவலையடைந்துள்ளனர்.

English summary

Vanathi Srinivasan in ICU: BJP candidate for Coimbatore North Vanathi Srinivasan, who was admitted to Kovai Medical Center and Hospital (KMCH) on April 10 for a mild infection in the right leg. After this she developed a mild allergic reaction to one of the medications and was shifted to Intensive Care Unit at 8 p.m. on Friday for observation.