எங்களுக்கு அதிகாரம் இல்லைங்க.. வானதி சீனிவாசன் சொன்னதை பாருங்க! டோட்டல் பாஜகவும் ‘கப் சிப்’ மோடு!
கோவை: அதிமுக - பாஜக கூட்டணி முறிவு குறித்து தேசிய தலைமை முடிவு செய்யும் என்றும், இதுதொடர்பாக கருத்து சொல்ல எங்களுக்கு அதிகாரமில்லை என்றும் பாஜக எம்எல்ஏ வானதி சீனிவாசன் தெரிவித்துள்ளார்.
அதிமுக பொதுச்செயலாளர் எடப்பாடி பழனிசாமி தலைமையிலான மாவட்ட செயலாளர்கள் கூட்டம் சென்னை ராயப்பேட்டை அதிமுக அலுவலகத்தில் நேற்று நடைபெற்றது. இந்தக் கூட்டத்தில் பாஜக உடன் இனி கூட்டணி இல்லை என்று அதிமுகவினர் முடிவெடுத்தனர். இது தொடர்பான தீர்மானத்தை முன்னாள் அமைச்சர் ஜெயக்குமார் முன்மொழிந்தார். அதனை ஏற்று மாவட்ட செயலாளர்கள் கூட்டத்தில் ஏகமனதாக இந்த தீர்மானத்தை நிறைவேற்றினர்.
2024 மக்களவைத் தேர்தலில் மட்டுமல்ல, 2026 சட்டப்பேரவை தேர்தலிலும் பாஜக உடன் கூட்டணி இல்லை என்ற முடிவை எட்டியுள்ளது அதிமுக. இதையடுத்து, பாஜக கூட்டணியில் இருந்தும், தேசிய ஜனநாயக கூட்டணியில் இருந்தும் விலகுவதாக அதிகாரப்பூர்வமாக அறிக்கை வாயிலாக அதிமுக தலைமை தெரிவித்தது. எனினும் பாஜக நிர்வாகிகள் யாரும், அதிமுக கூட்டணி முறிவு பற்றி கருத்து தெரிவிக்க மறுத்து வருகின்றனர்.
அதிமுகவின் முடிவு பற்றி ட்விட்டரில் பதிவிட்ட பாஜக நிர்வாகி தனது ட்வீட்டை நீக்கினார். ஆங்கில தொலைக்காட்சி ஒன்றிற்கு இதுகுறித்து கருத்து தெரிவித்திருந்த பாஜக நிர்வாகி தனது கருத்தை திரும்பப் பெறுவதாக அறிவித்தார். பாஜக மாநிலத் தலைவர் அண்ணாமலையும் கப் சிப் என இருந்து வருகிறார். செய்தியாளர்கள் இந்த விவகாரம் குறித்து கேள்வி எழுப்பியபோதும் கட்சியின் தேசிய தலைமை கருத்து தெரிவிக்கும் என கூறிவிட்டு சென்றார் அண்ணாமலை.
இந்நிலையில் இதுகுறித்து பாஜக தேசிய மகளிர் அணி தலைவியும், தெற்கு தொகுதி எம்.எல்.ஏ.வுமான வானதி சீனிவாசன் செய்தியாளர்களிடம் பேசுகையில், "பாஜக உடனான கூட்டணியை அதிமுக முறித்துக் கொள்வதாக அறிவித்துள்ள முடிவு குறித்து தேசிய தலைமை தான் கருத்துக் கூறும். தேசிய தலைமை அறிவிக்கும் வரை நாங்கள் எந்தவித கருத்தையும் கூற முடியாது.
இதுகுறித்து தேசிய தலைமை தகுந்த நேரத்தில் எங்களுக்கு அறிவுறுத்தல் தருவார்கள். அப்போது எங்களுடைய கருத்துகளை தெரிவிக்கிறோம். அதிமுகவினர் கூறிய கருத்துக்களும், அவர்களுடைய முடிவுகள் பற்றியும் கருத்து சொல்வதற்கு எங்களுக்கு அதிகாரம் இல்லை" எனத் தெரிவித்தார்.
Click it and Unblock the Notifications
Sign in with Google