5 மாநில சட்டசபைத் தேர்தல்: கொரோனா தடுப்பூசி சான்றிதழில் நீக்கப்பட்டது பிரதமர் மோடி புகைப்படம்

டெல்லி: உத்தர பிரதேசம், உத்தரகாண்ட், பஞ்சாப், கோவா, மணிப்பூர் ஆகிய 5 மாநில சட்டசபை தேர்தல் நடைபெறும் மாநிலங்களில் கொரோனா தடுப்பூசி சான்றிதழ்களில் பிரதமர் மோடியின் படம் இடம்பெறாது என அறிவிக்கப்பட்டு உள்ளது.

உத்தர பிரதேசம், உத்தரகாண்ட், பஞ்சாப், கோவா, மணிப்பூர் ஆகிய 5 மாநில சட்டசபை தேர்தலுக்கான அறிவிப்பை தேர்தல் ஆணையம் கடந்த 2 தினங்களுக்கு முன்பு வெளியிட்டது.

பிப்ரவரி முதல் மார்ச் மாதம் வரை உத்தரபிரதேசத்தில் 7 கட்டங்களாக சட்டசபைத் தேர்தல் நடைபெற உள்ளது. உத்தரப்பிரதேசத்தில் பிப்ரவரி 10ஆம்தேதி முதல் மார்ச் 7ஆம்தேதி வரை வாக்குப்பதிவு நடைபெபறும். பஞ்சாப், உத்தராகண்ட், கோவாவில் பிப்ரவரி 14ஆம் தேதியும், மணிப்பூரில் பிப்ரவரி 27 மற்றும் மார்ச் 3ஆம்தேதி வாக்குப்பதிவு நடைபெறும் என தேர்தல் ஆணையம் அறித்துள்ளது. தேர்தலில் பதிவான வாக்குகள் மார்ச் 10-ம்தேதி எண்ணப்பட்டு முடிவுகள் அன்றே அறிவிக்கப்படும்.

பிரசாரத்திற்கு கட்டுப்பாடு

கொரோனா பரவல் அதிகரித்து வருவதால் கட்டுப்பாடுகளுடன் சட்டசபைத் தேர்தலை நடத்த தேர்தல் ஆணையம் முடிவு செய்துள்ளது. நேரடியாக தேர்தல் பிரச்சாரம் செய்யவும் பேரணிகள் நடத்தவும் கட்டுப்பாடுகள் விதித்துள்ளது. ஆன்லைன் மூலம் வேட்புமனு தாக்கல் செய்யவும், டிஜிட்டல் பிரச்சாரம் செய்யவும் தேர்தல் ஆணையம் உத்தரவிட்டுள்ளது.

மோடி படம் நீக்கம்

தேர்தல் தேதி அறிவிக்கப்பட்டதை அடுத்து அங்கு உடனடியாக தேர்தல் நடத்தை விதிகள் அமல்படுத்தப்பட்டன.
இந்த நிலையில் சட்டசபைத்தேர்தல் நடைபெற உள்ள உத்தர பிரதேசம், உத்தரகாண்ட், பஞ்சாப், கோவா, மணிப்பூர் ஆகிய ஐந்து மாநிலங்களிலும் கொரோனா தடுப்பூசி சான்றிதழ்களில் பிரதமர் மோடியின் படம் இடம்பெறாது என அறிவிக்கப்பட்டு உள்ளது. இதற்கான மாற்றத்தை கோவின் தளத்தில் மத்திய சுகாதார அமைச்சகம் செய்யும்.

தடுப்பூசி சான்றிதழ்

இந்தியாவில் கோவிஷீல்டு, கோவாக்சின் தடுப்பூசிகள் மக்களுக்கு இலவசமாக செலுத்தப்படுகின்றன. இந்த தடுப்பூசிகளுக்காக, கோவின் இணைய தளத்தில் சென்று முன்பதிவு செய்து கொள்ளலாம். அல்லது அரசால் ஏற்படுத்தப்படும் முகாம்களில் நேரடியாக சென்றும் பதிவு செய்து கொள்ளலாம். தடுப்பூசி செலுத்திக் கொண்டவர்களின் விபரங்கள் ஆதார் பதிவுடன் கோவின் இணையதளத்தில் இடம்பெற்றிருக்கும். தடுப்பூசி செலுத்தியவர்கள், ஆதார் மற்றும் மொபைல் தொடர்பான விபரங்களை அளித்து கொரோனா தடுப்பூசி செலுத்தியதற்கான சான்றிதழை பதிவிறக்கம் செய்து கொள்ளலாம்.

தேர்தல் ஆணையம் உத்தரவு

பி.டி.எப். ஃபார்மேட்டில் இருக்கும் இந்த சான்றிதழில் பிரதமர் மோடியின் படம் மற்றும் சான்றிதழுக்கான கியூ.ஆர். கோடு மற்றும் தடுப்பூசி செலுத்திய விபரங்கள் இடம்பெற்றிருக்கும். இந்நிலையில் 5 மாநில தேர்தலையொட்டி, இந்த சான்றிதழிலில் பிரதமர் மோடியின் படம் நீக்கப்பட்டுள்ளது. தேர்தல் ஆணையத்தின் பரிந்துரையின் பேரில் இந்த நடவடிக்கை எடுக்கப்பட்டுள்ளது. கடந்த ஆண்டு ஏப்ரல் மாதம் நடைபெற்ற தமிழகம் உள்ளிட்ட 5 மாநில தேர்தலின் போதும் இந்த மாநிலங்களில் கொரோனா தடுப்பூசி சான்றிதழில் பிரதமர் மோடியின் படம் இடம்பெறவில்லை என்பது குறிப்பிடத்தக்கது.

English summary

Uttar Pradesh, Uttarakhand, Punjab, Goa and Manipur are the five states where assembly elections will be held.