எலெக்ட்ரிக் வாகனங்கள் விலை.. லித்தியம் அயான் பேட்டரி வரி குறையுமா? இன்று ஜிஎஸ்டி கவுன்சில் கூட்டம்

டெல்லி: இன்று மத்திய நிதியமைச்சர் நிர்மலா சீதாராமன் தலைமையில் 52 வது ஜிஎஸ்டி கவுன்சில் கூட்டம் நடைபெற உள்ளது.

கடந்த 2017 ஆம் ஆண்டு ஜூலை மாதம் எதிர்க்கட்சிகளின் கடும் எதிர்ப்புகளுக்கு மத்தியில் ஜிஎஸ்டி எனப்படும் சரக்கு மற்றும் சேவை வரி அறிமுகம் செய்யப்பட்டது. தற்போது ஜிஎஸ்டி கொண்டு வரப்பட்டு 6 ஆண்டுகள் நிறைவடைந்து உள்ளது. மாதந்தோறும் ஜிஎஸ்டி வரி விதிப்பு தொடர்பாக மத்திய நிதியமைச்சர் தலைமையில் ஜிஎஸ்டி கவுன்சில் கூட்டம் நடைபெற்று வருகிறது. இந்த கூட்டத்தில் மாநில நிதி அமைச்சர்கள், நிதித்துறை அதிகாரிகள் பங்கேற்பது வழக்கம்.

இந்த கூட்டத்தின்போது பல்வேறு பொருட்கள் மற்றும் சேவைகளுக்கு விதிக்கப்பட்டு உள்ள ஜிஎஸ்டி வரியில் மாற்றம் செய்வது குறித்து ஆலோசித்து முடிவுகள் எடுக்கப்படுகின்றன. அந்த வகையில் இன்று தலைநகர் டெல்லியில் 52 வது ஜிஎஸ்டி கவுன்சில் கூட்டம் நடைபெற இருக்கிறது. டெல்லியில் உள்ள சுஸ்மா ஸ்வராஜ் பவனில் மத்திய நிதியமைச்சர் நிர்மலா சீதாராமன் தலைமையில் இந்த கூட்டம் நடைபெறும் என்று மத்திய நிதித்துறை அமைச்சகம் அறிவித்து உள்ளது.

இந்த கூட்டத்தில் அனைத்து மாநிலங்களில் நிதி அமைச்சர்கள், நிதித்துறை அதிகாரிகள் பங்கேற்க இருக்கின்றனர். நேற்று ரிசர்வ் வங்கியின் நாணய கொள்கை கூட்டம் நிறைவடைந்த நிலையில் இன்று இந்த கூட்டம் நடைபெறுவது குறிப்பிடத்தக்கது. இதில் குறிப்பாக எலெக்ட்ரிக் வாகனங்கள், செல்போன், லேப்டாப் பேட்டரிகளில் பயன்படுத்தப்படும் லித்திய அயான் பேட்டரிக்கான வரி குறைக்கப்படுவதற்கு வாய்ப்பு உள்ளதாக கூறப்படுகிறது. தற்போது லித்தியம் அயான் பேட்டரிக்கு ஜிஎஸ்டி வரியாக 18 சதவீதம் வசூலிக்கப்பட்டு வரும் நிலையில் அது 5 சதவீதமாக குறைக்கப்படும் என்று எதிர்பார்க்கப்படுகிறது.

அதேபோல், பொடியாக்கி விற்பனை செய்யப்படும் தினைகளுக்கான வரி விலக்கு, வங்கி சேவைகளுக்கான வரி தெளிவுபடுத்துவது பற்றியும் இதில் ஆலோசிக்கப்படலாம் என கூறப்படுகிறது. அதேபோல் இந்திய ரயில்வே சேவைகள் தற்போது ரிவர்ஸ் சார்ஜ் முறையின் கீழ் இயங்கி வரும் நிலையில், அதனால் ரூ.1300 க்கும் அதிகமாக இழப்பு ஏற்படுவதால் அவற்றை முன்னோக்கி கட்டண முறைக்கு கீழ் கொண்டு வருவது தொடர்பாகவும் ஆலோசிக்கப்பட உள்ளது.

குறிப்பாக நாட்டில் அதிகரித்து வரும் விலைவாசி உயர்வை கட்டுப்படுத்துவது தொடர்பாகவும் ஆலோசிக்கப்படலாம் என்று கூறப்படுகிறது. லித்தியன் அயான் பேட்டரிக்கான வரி குறைக்கப்படலாம் என்ற தகவல் ஒரு பக்கம் இருந்தாலும், வரி விகிதங்களை கண்காணிக்கும் கவுன்சிலின் கீழ் இயங்கி வரும் பிட்மெண்ட் குழு வரி விகிதங்களின் மாற்றங்களை பரிந்துரைக்காததால் பெரிய அறிவிப்புகள் இந்த கூட்டத்தில் இருக்காது என்றே கூறப்படுகிறது.

English summary

The 52nd GST Council meeting will be held today under the chairmanship of Union Finance Minister Nirmala Sitharaman.