யப்பா சாமி.. இந்த வயதிலும் இத்தனை எனர்ஜியா.. இணையதளத்தை கலக்கும் 80 வயசு தாத்தா!

டெல்லி: விளையாட்டுக்கும் படிப்பிற்கும் வயது ஒரு பொருட்டே இல்லை. பொதுவாக தன்னம்பிக்கை உள்ளவர்களுக்கு வயது என்பது வெறும் எண் (Age is just a number) என்பார்கள்.

தன்னம்பிக்கையும் மனஉறுதியும்தான் ஒருவரின் செயல்பாட்டை தீர்மானிக்குமே தவிர வயது அல்ல என்பது அதிக வயதில் சாதிக்கும் நபர்களின் வாதமாக உள்ளது. அதிக வயதுடையவர்கள் செய்யும் வேலையை குறைந்த வயதுடையவர்களால் செய்ய முடியாது. இதற்கு நிறைய உதாரணங்கள் உள்ளன.

நம் வீடுகளிலேயே நம் பாட்டி, அம்மா செய்த வேலைகளை இன்று நம்மால் செய்ய முடிவதில்லை. அது போல் நமது தாத்தா, அப்பாவிற்கு இருக்கும் உடல் உறுதி இன்று நம்மில் பலருக்கு இருப்பதில்லை.

சாப்பாடு

இதற்கு ஊட்டச்சத்து மிக்க சாப்பாடுதான் காரணம் என சொல்வது ஒரு புறமிருந்தாலும், நம்மால் முடியும் என்ற ஒரு தன்னம்பிக்கையை வளர்த்து கொள்ளாததும் ஆகும். 30 வயதுக்கு மேலானால் வீட்டு வேலைகளை செய்ய முடியாது. 40 வயதானால் பார்வை மங்கும். 50 வயதானால் ஓட முடியாது, 60 வயதில் நடக்க முடியாது என சொல்வதெல்லாம் நமது இயலாமை இல்லை, நம் மனதின் இயலாமையாகும். மனமிருந்தால் மார்க்கம் உண்டு என்பார்கள்.

நம்மால் முடியும்

நம்மால் முடியும் என நினைத்து செய்யும் எந்த வேலையும் சிறப்பாக இருக்கும். வயதானவர்கள் சிறு வயதில் கனவு கண்ட படிப்பை தற்போது படிக்கிறார்கள். அது போல் 80 வயது தாத்தா ஒருவர் இளைஞர்களுடன் கிரிக்கெட் விளையாடும் வீடியோ காட்டுத் தீயாய் பரவி வருகிறது. கையில் பேட்டை வைத்துக் கொண்டு பந்தை ஓங்கி அடிக்கிறார்.

நெட்டிசன்கள்

பின்னர் ரன்களை எடுக்க ஓடுகிறார். சில நேரங்களில் ரன்களை குவித்துவிட்டால் சந்தோஷத்தில் குதிக்கிறார். இது குறித்த 14 வினாடி வீடியோ அனைவரின் கவனத்தையும் ஈர்த்துள்ளது. இந்தியாவில் கிரிக்கெட் ஒவ்வொருவரின் கடைசி மூச்சிலும் இருப்பதாக பலர் கமென்ட் போடுகிறார்கள். கிரிக்கெட் கிடைத்ததற்கு இந்தியாவும் இந்தியர்களும் அதிர்ஷ்டசாலிகள் என நெட்டிசன்கள் கமென்ட் கொடுக்கிறார்கள்.

தாத்தா எனர்ஜி

தாத்தாவின் எனர்ஜி லெவலுக்கு ஈடு இணையே இல்லை என்கிறார்கள். விளையாட்டுக்கு வயது எப்போதும் தடையில்லை என்பதற்கு இந்த முதியவரின் வீடியோ ஒரு சான்றாகும். கடந்த ஆண்டு 97 வயதான லியோனிட் ஸ்டானிஸ்லாவ்ஸ்கி கிராண்டஸ்லாம் சாம்பியன் ரஃபேலுடன் டென்னிஸ் விளையாடினார். இந்த வீடியோவும் இணையதளத்தில் பாராட்டுகளை பெற்றது.

English summary

80 years old man plays cricket, applaused by internet users.