பஞ்சாப் ஏபிபி- சிவோட்டர்ஸ் எக்ஸிட் போல்: ஆம் ஆத்மிக்கு கலக்கல் வெற்றி! காங்கிரசுக்கு எத்தனை இடங்கள்

டெல்லி: பஞ்சாப் மாநிலத்தில் நடந்து முடிந்த சட்டசபைத் தேர்தலில் ஆம் ஆத்மி வெற்றி பெற்று ஆட்சி அமைக்க வாய்ப்புள்ளதாக ஏபிபி- சிவோட்டர்ஸ் இணைந்து நடத்திய தேர்தலுக்குப் பிந்தைய கருத்துக் கணிப்பில் கூறப்பட்டுள்ளது.

ஐந்து மாநில தேர்தல்கள் நடைபெற்ற இடங்களில் பஞ்சாபில் மட்டுமே காங்கிரஸ் ஆட்சியில் இருந்தது. இந்த முறை பெரும் உட்கட்சி குழப்பத்திற்கு இடையே காங்கிரஸ் தேர்தலைச் சந்தித்தது.

பஞ்சாப் மாநிலத்தில் தேர்தலுக்கு முன்பு வரை காங்கிரஸ் மற்றும் ஆம் ஆத்மிக்கு இடையே கடும் போட்டி இருக்கும் எனக் கூறப்பட்டது. தற்போது வெளியாகியுள்ள கருத்துக் கணிப்புகளில் ஆம் ஆத்மி பெரும்பான்மை பெறலாம் எனக் கூறப்பட்டுள்ளது.

ஆம்ஆத்மி வெற்றி

தற்போது ஏபிபி- சிவோட்டர்ஸ் இணைந்து நடத்திய தேர்தலுக்குப் பிந்தைய கருத்துக் கணிப்பு முடிவுகள் வெளியாகி உள்ளது. இதில் மொத்தம் 117 இடங்களைக் கொண்ட பஞ்சாப் சட்டசபையில் ஆம் ஆத்மி 51 முதல் 61 இடங்களில் வெல்ல வாய்ப்புள்ளதாகக் கூறப்பட்டுள்ளது. காங்கிரஸ் மற்றும் பாஜகவுக்கு மாற்று என்ற பிரசாரத்தை முன்னெடுக்கும் ஆம் ஆத்மி, இதன் மூலம் டெல்லிக்கு வெளியே முதல் முறையாக ஆட்சியைக் கைப்பற்றுவது குறிப்பிடத்தக்கது.

காங்கிரஸ் தோல்வி

அடுத்து தற்போது ஆட்சியில் உள்ள காங்கிரஸ் கட்சி வெறும் 22 முதல் 28 இடங்களை மட்டுமே வெல்லும் எனக் கூறப்பட்டுள்ளது. அகாலி தளம் 20 முதல் 26 இடங்களில் வெல்லும் என அதில் தெரிவிக்கப்பட்டுள்ளது. தொடர்ந்து பாஜக கூட்டணி 7 முதல் 13 இடங்களிலும் இதர கட்சிகளும் சுயேச்சைகளும் 1 முதல் 5 இடங்களில் வெல்லும் எனக் கூறப்பட்டுள்ளது.

வாக்கு சதவிகிதம்

வாக்கு சதவீதத்தைப் பொறுத்தவரை ஆம் ஆத்மி அதிகபட்சமாக 39% பெறும் என ஏபிபி சிவோட்டர் தேர்தலுக்குப் பிந்தைய கருத்துக்கணிப்பில் கூறப்பட்டுள்ளது. காங்கிரஸ் 26.7%, பெறும் எனக் கூறப்பட்டுள்ளது. இந்தத் தேர்தலில் ஆம் ஆத்மியின் வாக்கு வங்கி அதிகரித்துள்ள நிலையில், காங்கிரஸ் மட்டுமின்றி அகாலி தள வாக்கு வங்கியும் சரிகிறது. அகாலி தளம் 20.7% வாக்குகள் மட்டுமே பெறும் என தெரிவிக்கப்பட்டுள்ளது.

பஞ்சாப் தேர்தல்

பஞ்சாப் மாநிலத்தில் மொத்தம் 117 சட்டசபை தொகுதிகள் உள்ளன. அதில் பெரும்பான்மையுடன் ஆட்சி அமைக்க ஒரு கட்சிக்கு 59 இடங்கள் தேவை, கடந்த தேர்தலை கேப்டன் அமரிந்தர் சிங் தலைமையில் சந்தித்த காங்கிரஸ் 77 இடங்களில் வென்றது. பஞ்சாப் தேர்தலில் முதல்முறையாகக் களமிறங்கிய ஆம் ஆத்மி 20 இடங்களில் வென்றது. இந்தத் தேர்தலில் காங்கிரஸ் மற்றும் ஆம் ஆத்மி கட்சிகளுக்கு இடையே தான் கடும் போட்டி இருக்கும் எனக் கூறப்படுகிறது.

English summary

Exit Polls Of Punjab Assembly Election says AAP will win 20222 election: 5 state election exit polls ABP C voters.