விடாத பாஜக.. தாஜ்மஹால் பெயரை ‛தேஜோ மஹாலயா’ என மாற்றியே ஆகணும்.. மீண்டும் கிளம்பும் சர்ச்சை
டெல்லி: உலக அதிசயங்களில் ஒன்றாக உள்ள தாஜ்மஹாலின் பெயரை ‛தேஜோ மஹாலயா' என பெயர் மாற்ற வேண்டும் எனும் சர்ச்சை மீண்டும் பாஜகவால் எழுந்துள்ளது.
உலக அதிசயங்களில் ஒன்றாகவும், காதலின் நினைவு சின்னமாகவும் தாஜ்மஹால் உள்ளது. டெல்லி அருகே ஆக்ராவில் யமுனை ஆற்றங்கரையோரம் தாஜ்மஹால் அமைந்துள்ளது.
முகலாய பேரரசர் ஷாஜகான் தனது மனைவி மும்தாஜ் நினைவாக இந்த தாஜ்மஹாலை கட்டினார். இந்நிலையில் தான் சமீபகாலமாக தாஜ்மஹால் தொடர்பான சர்ச்சைகள் எழுந்து வருகின்றன.
சமீபத்திய சர்ச்சை
பாஜக எம்பி தியாகுமாரி சமீபத்தில் பேசுகையில், ‛‛தாஜ்மஹால் எங்களுக்கு சொந்தமான இடத்தில் கட்டப்பட்டுள்ளது. இதுதொடர்பான ஆவணங்கள் உள்ளன. தற்போது நீதிமன்றம் இதுதொடர்பான ஆவணங்களை கேட்டால் நாங்கள் வழங்க உள்ளோம்'' என தெரிவித்தார். மேலும் தேஜோலாயா எனும் சிவன் கோயிலை இடித்து தாஜ்மஹாலை முகலாய மன்னர் ஷாஜகான் கட்டியதாகவும், தாஜ்மஹாலின் ரகசிய அறையில் இந்துக் கடவுள்களின் சிலைகள் இருப்பதாகவும் குற்றம்சாட்டப்பட்டது. இதுதொடர்பாக அலகாபாத் உயர் நீதிமன்றத்தில் தொடரப்பட்ட வழக்கு ரத்து செய்யப்பட்டது.
புதிய சர்ச்சை
இந்நிலையில் தான் தற்போது புதிய சர்ச்சை கிளம்பி உள்ளது. அதாவது தாஜ்மஹாலின் பெயரை ‛தேஜோ மஹாலயா' என மாற்ற வேண்டும் என ஆக்ரா முனிசிபல் கார்ப்பரேஷன் பாஜக கவுன்சிலர் ஷோபராம் ரத்தோர் விருப்பம் தெரிவித்துள்ளார். மேலும் இதுபற்றி விவாதிக்க வேண்டும் என்று அவர் முன்மொழிவு கொண்டு வர திட்டமிட்டுள்ளார்.
விவாதிக்க வாய்ப்பு
தற்போது இதற்கான முன்மொழிவை அவர் தீவிரமாக தயாரித்து வரும் நிலையில் அடுத்த கூட்டத்தில் இது முனிசிபல் கார்ப்ரேஷனில் தாக்கல் செய்யப்பட்டுள்ளது. அதன்பிறகு இதுதொடர்பாக விவாதம் நடைபெறலாம் என்ற தகவல் வெளியாகி உள்ளது. இதன்மூலம் தாஜ்மஹாலின் பெயரை மாற்றம் செய்ய வேண்டும் என்பதில் பாஜகவினர் தீவிரமாக உள்ளது தெரியவந்துள்ளது.
மறுத்த உயர்நீதிமன்றம்
முன்னதாக தாஜ்மஹாலில் உள்ள 22 பூட்டிய ரகசிய அறைகளை திறக்க கோரிய பொது நல வழக்கை அலகாபாத் உயர்நீதிமன்றம் தள்ளுபடி செய்திருந்தது. இருப்பினும் தொடர்ச்சியாக பாஜகவினர் தாஜ்மஹால் தொடர்பான விஷயங்களை பேசி வருகின்றனர். அந்த வகையில் சமீபத்தில் கூட உத்தர பிரதேச மாநிலம் முதல்வர் யோகி ஆதித்யநாத் அரசால் 'ராம் மஹால்' எனப் பெயர் மாற்றப்படும் என்று பாஜக எம்எல்ஏ சுரேந்திரசிங் கூறியிருந்தது குறிப்பிடத்தக்கது.
Click it and Unblock the Notifications
Sign in with Google