Tamil Nadu Exit Poll: அதிமுகவுக்கு பெரிய அடி? முந்தும் பாஜக! சீட், வாக்கு சதவீதம் 2லும் பின்னடைவு!

டெல்லி: தமிழ்நாட்டில் அதிமுக இந்த லோக்சபா தேர்தலில் பெரும் அடியைச் சந்திக்கும் எனக் கணித்துள்ளது இந்தியா டுடே நடத்திய தேர்தலுக்குப் பிந்தைய கருத்துக்கணிப்பு முடிவுகள்.

நாடு முழுவதும் கடந்த ஏப்ரல் 19 ஆம் தேதி முதல் நடந்து வந்த மக்களவை தேர்தல் நிறைவடைந்துள்ளது. இன்று இறுதிகட்டமாக பிரதமர் மோடி போட்டியிடும் வாரணாசி உள்பட 57 தொகுதிகளில் வாக்குப்பதிவு நடந்து முடிந்துள்ளது. அனைத்து கட்ட வாக்குப்பதிவும் நிறைவடைந்துள்ள நிலையில், வரும் ஜூன் 1 ஆம் தேதி வாக்கு எண்ணிக்கை நடைபெற உள்ளது.

இந்நிலையில் தேர்தலுக்குப் பிந்தைய கருத்துக்கணிப்பு முடிவுகளை ஊடகங்கள், தேர்தல் கணிப்பு நிறுவனங்கள் வெளியிட்டு வருகின்றன. பாரதிய ஜனதா கட்சி தொடர்ந்து மூன்றாவது முறையாக ஆட்சியைப் பிடிக்குமா? எதிர்க்கட்சிகளின் 'இந்தியா' கூட்டணியால் இந்த முறை பாஜகவை வீழ்த்த முடியுமா? என்பதை அறிய நாடே ஆர்வத்துடன் எதிர்நோக்கி உள்ளது.

தேர்தலுக்கு பிந்தைய கருத்துக்கணிப்பு என்பது தேசத்தின் மனநிலையை ஓரளவுக்கு நெருக்கமாகக் கணிக்கும். தேர்தலுக்கு முந்தைய கருத்துக்கணிப்புகளை விட, ஒன்றரை மாத காலமாக நடைபெற்று வந்த தேர்தலுக்குப் பிறகு, இன்னும் தெளிவான பார்வை கிடைக்கும். எனவே தேர்தலுக்குப் பிந்தைய கருத்துக்கணிப்புகள் மிகவும் எதிர்பார்க்கப்பட்டு வருகின்றன.

இந்தியா டுடே கணிப்பு முடிவுகள்: இந்நிலையில், இந்தியா டுடே நிறுவனம் நடத்திய தேர்தலுக்கு பிந்தைய கருத்துக்கணிப்பு வெளியிடப்பட்டுள்ளது. அதன்படி தமிழ்நாட்டில் மொத்தம் உள்ள 39 தொகுதிகளில், இந்தியா கூட்டணி 33-37 இடங்களைப் பிடிக்கக்கூடும் எனத் தெரிவிக்கப்பட்டுள்ளது.

பாஜக கூட்டணி 2 - 4 இடங்களைக் கைப்பற்றும் எனத் தெரிவிக்கப்பட்டுள்ளது. அதேசமயம், அதிமுக கூட்டணி 0-2 இடங்களை மட்டுமே பிடிக்கக்கூடும் என இந்தியா டுடே வெளியிட்டுள்ள கணிப்பு தெரிவிக்கிறது.

அதிமுகவுக்கு பெரிய அடி?: தமிழ்நாட்டில் திமுக தலைமையிலான இந்தியா கூட்டணி, பாஜக தலைமையிலான என்.டி.ஏ கூட்டணி, அதிமுக தலைமையிலான கூட்டணி, நாம் தமிழர் கட்சி என 4 முனை போட்டி நிலவும் நிலையில், மாநிலத்தில் பிரதான எதிர்க்கட்சியான் அதிமுகவை பாஜக முந்தி இருப்பது முக்கியத்துவம் பெற்றுள்ளது.

அதேபோல, எதிர்பார்க்கப்படும் வாக்கு சதவீதத்தை பொறுத்தவரை இந்தியா கூட்டணி 46%, பாஜக கூட்டணி 22%, அதிமுக கூட்டணி 21%, மற்றவை 11% வாக்குகளைப் பெறும் என இந்தியா டுடே கருத்துக்கணிப்பு தெரிவித்துள்ளது. இது அதிமுக தரப்புக்கு அதிர்ச்சியை ஏற்படுத்துவதாக அமைந்துள்ளது.

அதேசமயம், கட்சி வாரியாக வாக்குகளைப் பகுத்துப் பார்த்தால் திமுக 26%, காங்கிரஸ் 10%, அதிமுக 19%, பாஜக 14%, மற்ற கட்சிகள் மொத்தமாக 31% வாக்குகளைப் பெறக்கூடும் எனக் கணிக்கப்பட்டுள்ளது.

English summary

In Tamil Nadu, the AIADMK is expected to suffer a major blow in this Lok Sabha election, according to the Exit poll conducted by India Today.