டெல்லியில் திடீர் சந்திப்பு.. ஐஸ்வர்யா தனுஷிடம் 'தகவல்' சொல்லி அனுப்பிய சுப்பிரமணியன் சுவாமி

Updated: Tuesday, November 16, 2021, 20:16 [IST]

Subscribe to Oneindia Tamil

டெல்லி: ரஜினிகாந்த் மகளும், நடிகர் தனுஷின் மனைவியுமான ஐஸ்வர்யா தனுஷ் டெல்லியில் இன்று பாஜக மூத்த தலைவர் சுப்பிரமணியன் சுவாமியை சந்தித்து பேசியுள்ளார்.

இந்த சந்திப்பு தொடர்பான எந்த தகவலையும் ஐஸ்வர்யா தனுஷ் தனது ட்விட்டர் பக்கத்தில் வெளியிடவில்லை.

இருப்பினும் ட்விட்டர் பயனர் ஒருவர் இந்த புகைப்படத்தை வெளியிட்டு, இன்று இருவரும் டெல்லியில் சந்தித்து பேசிக் கொண்டனர் என்று தெரிவித்துள்ளார். இந்த ட்விட் பதிவை சுப்பிரமணியன் சுவாமி தனது டுவிட்டர் பக்கத்தில் ரீட்வீட் செய்துள்ளார்.

ரஜினிகாந்த்துடன் சந்திப்பு

மேலும், சுப்பிரமணியன் சுவாமி அளித்துள்ள பதிலில் ரஜினிகாந்த் எனக்கு வணக்கம் மற்றும் வாழ்த்துக்களை தனது மகளிடம் சொல்லி அனுப்பியுள்ளார். எனது வாழ்த்துக்களை ரஜினிகாந்துக்கு தெரிவிக்குமாறு ஐஸ்வர்யா தனுஷிடம் நான் கூறியிருக்கிறேன். அடுத்த முறை சென்னைக்கு நான் செல்லும் போது ரஜினிகாந்தை சந்திக்க வருகிறேன் என்ற தகவலையும் ஐஸ்வர்யா தனுஷிடம் சொல்லி அனுப்பி இருக்கிறேன். இவ்வாறு சுப்பிரமணியன் சுவாமி தெரிவித்து உள்ளார்.

புத்திசாலிப் பெண்

மேலும், இன்னொரு ட்விட்டர் பயனரிடம், இது தொடர்பாக ஐஸ்வர்யா தனுஷ் புத்திசாலிப் பெண் என்று புகழ்ந்து சொல்லியிருக்கிறார் சுப்பிரமணியன் சுவாமி. ஐஸ்வர்யா தனுஷ் எதற்காக சுப்பிரமணியன் சுவாமியை திடீரென்று டெல்லியில் சந்தித்து பேசினார் என்ற தகவல் வெளிப்படுத்தப்படவில்லை. சுப்பிரமணியன் சுவாமி ட்வீட்டை வைத்து பார்த்தால் மரியாதை நிமித்தமான சந்திப்பு என்பதும் ரஜினிகாந்த் இந்த சந்திப்புக்கு ஏற்பாடு செய்திருப்பதும் தெரிகிறது.

பாஜக தலைவர்களுடன் நட்பு

பாஜக தலைவர்கள் பலருடன் நெருங்கிய நட்பு கொண்டவர் ரஜினிகாந்த். காங்கிரஸ் உள்ளிட்ட பிற கட்சிகளிலும் அவருக்கு நண்பர்கள் உண்டு. சமீபகாலமாக பாஜக தலைமை மீது சுப்பிரமணியன் சுவாமி பகிரங்கமாக அதிருப்தியை வெளிப்படுத்தி வருகிறார். அதிலும் பொருளாதார கொள்கைகள் பற்றி தொடர்ந்து சுப்பிரமணியன் சுவாமி விமர்சனம் செய்து வருகிறார்.

பல கேள்விகள்

பணமதிப்பிழப்பு தொடங்கி கொரோனா நோய் பரவல் காலத்தில் மத்திய அரசு எடுத்த பொருளாதார நடவடிக்கைகள் வரை பல விஷயங்களில் சுப்பிரமணியன் சுவாமி எதிர் கருத்து தெரிவித்துள்ளார். இந்த நிலையில் ரஜினிகாந்த் மகள் ஐஸ்வர்யா தனுஷ், சுப்ரமணியன் சுவாமியுடன் சந்தித்துள்ளார். இந்த சந்திப்பு பல்வேறு கேள்விகளை எழுப்பியுள்ளது என்பது மட்டும் நிச்சயம்.