இந்தியாவில் தயாரிக்கப்பட்ட டேப்லெட்! தூக்கி போட்டு காலால் மிதித்த அமைச்சர் அஸ்வினி!

Updated: Saturday, April 19, 2025, 15:49 [IST]

Subscribe to Oneindia Tamil

டெல்லி: கீழே போட்டாலும் ஏறி நின்றாலும் உடையாத இந்தியாவிலேயே தயாரிக்கப்பட்ட டேப்லெட் குறித்து வீடியோவை மத்திய ரயில்வே, மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் வெளியிட்டுள்ளார்.

ஹரியானா மாநிலம் குருகிராமை சேர்ந்தது விவிடிஎன் டெக்னாலஜீஸ் என்ற நிறுவனம். இந்த நிறுவனம் சாப்ட்வேர், அப்லிகேஷன்கள், தொலைத் தொடர்பு உள்ளிட்ட துறைகளில் சிறந்து விளங்குகிறது.

அமெரிக்கா, கனடா, ஐரோப்பிய நாடுகள், ஜப்பான் உள்ளிட்ட நாடுகளில் இந்த நிறுவனத்தின் கிளைகள் உள்ளன. இந்த நிறுவனம் சார்பில் லேப்டாப், டேப்லெட் உள்ளிட்டவை தயாரிக்கப்பட்டு வருகின்றன.

இந்த நிலையில் குருகிராமில் உள்ள விவிடிஎன் நிறுவனத்திற்கு அமைச்சர் அஸ்வினி ஆய்வுக்கு சென்றிருந்தார். அங்கு அந்த நிறுவனம் தயாரித்திருந்த டேப்லெட்டை ஆய்வு செய்தார். அப்போது அங்கிருந்த அதிகாரிகள், அந்த டேப்லெட் குறித்து விளக்கினர். அப்போது அவர்கள் இந்த டேப்லெட்டை கீழே போட்டாலும் உடையாது. அதன் மீது ஏறி நிற்குமாறும் சொன்னார்கள்.

இதையடுத்து அஸ்வினி அந்த டேப்லெட்டை கீழ் போட்டார். உடையவில்லை. சிறு கீறல் கூட ஏற்படவில்லை. அது போல் அதன் மீது ஏறி நின்றார், அப்போதும் அந்த டேப்லெட்டுக்கு எந்த பாதிப்பும் ஏற்படவில்லை. இந்த நிலையில் அமைச்சர் அஸ்வினி தனது எக்ஸ் வலைதள பதிவில் கூறியிருப்பதாவது: இந்த டேப்லெட் இந்தியாவில் வடிவமைக்கப்பட்டு தயாரிக்கப்பட்டது.

नहीं टूटेगा!

Designed in India, Made in India. pic.twitter.com/Ez6BpVasvJ
— Ashwini Vaishnaw (@AshwiniVaishnaw) April 18, 2025

இதை எளிதில் உடைக்க முடியாது. நீண்ட காலம் உடையாமல் உறுதியாக இருக்கும். இந்த டேப்லெட்டுக்கு அடிப்பொலி என பெயரிடப்பட்டுள்ளது. இவ்வாறு அஸ்வினி தெரிவித்திருந்தார். இந்த வீடியோ தற்போது வைரலாகி வருகிறது. மேலும் விவிடிஎன் நிறுவனம் உருவாக்கியுள்ள செயற்கை நுண்ணறிவு (AI Server) சர்வரையும் அஸ்வினி ஆய்வு செய்தார்.

கடந்த 10 ஆண்டுகளில் இந்தியாவில் மின்னணு துறை அபரிமிதமான வளர்ச்சியை பெற்றுள்ளது என்றும் கடந்த 2014 ஆம் ஆண்டு ரூ 2.4 லட்சம் கோடியாக இருந்த உற்பத்தி, 2024 ஆம் ஆண்டு 9.8 லட்சம் கோடியாக உயர்ந்துள்ளது. கடந்த 18 மாதங்களில் 3,900 வேலைவாய்ப்புகள் தயார் செய்யப்பட்டுள்ளது என்றும் அஸ்வினி தெரிவித்துள்ளார். இது மேக் இன் இந்தியா திட்டத்திற்கு கிடைத்த வெற்றி என்றும் அவர் தெரிவித்திருந்தார்.