வசூல் சாதனை படைத்த பாஜக.. கோடிகளின் குளத்தில் மிதக்கும் தாமரை - மற்ற கட்சிகள் கிட்ட கூட வர முடியாது

டெல்லி: ஆளும் பாரதிய ஜனதா கட்சி, 2020 - 21 நிதியாண்டில் ரூ.477 கோடியை வசூலித்து அனைத்து கட்சிகளையும்விட வசூலில் சாதனை படைத்துள்ளது.

ஒவ்வொரு அரசியல் கட்சியும் ரூ.20,000 க்கும் அதிகமாக பெறும் நன்கொடைகள் தொடர்பான விபரங்களை தேர்தல் ஆணையத்திடம் தெரிவிக்க வேண்டும் என்பது விதி.

அந்த வகையில் அரசியல் கட்சிகள் கடந்த ஆண்டுதோறும் தாங்கள் பெற்ற நன்கொடை விபரங்களை ஆதாரங்களுடன் தேர்தல் ஆணையத்திடம் சமர்பித்து வருகின்றன.

ரூ.633.66 கோடி வசூல்

இதை தேர்தல் ஆணையம் ஆண்டுதோறும் வெளிப்படையாக அறிவிக்கும். அந்த வகையில் கடந்த 2020 - 2021 நிதியாண்டில் இந்திய அரசியல் கட்சிகள் திரட்டிய நன்கொடை விபரங்களை இந்திய தேர்தல் ஆணையம் வெளியிட்டு இருக்கிறது. அதன்படி ஒட்டுமொத்தமாக அரசியல் கட்சிகளுக்கு ரூ.633.66 கோடி நன்கொடை நிறுவனங்கள் மற்றும் தனிநபர்களிடம் வந்துள்ளது.

வசூல் சாதனை படைத்த பாஜக

இதில் வழக்கம்போல் மத்தியில் ஆளும் பாரதிய ஜனதா கட்சியே முதலிடம் பெற்றுள்ளது. அதிகபட்சமாக அக்கட்சிக்கு ரூ.477 கோடி நன்கொடையை 2020 - 21 நிதியாண்டில் தனிநபர்கள் மற்றும் நிறுவனங்கள் வழங்கியுள்ளன. அதாவது மொத்தமாக அனைத்து கட்சிகள் திரட்டிய நன்கொடையில் 75% பாஜகவுக்கு மட்டுமே சேர்ந்துள்ளது.

கடந்த ஆண்டை விட குறைவு

இம்முறை 2,206 பேரிடம் பாஜக நன்கொடையை பெற்று இருக்கிறது. இருப்பினும் கடந்த ஆண்டை ஒப்பிடுகையில் இந்த ஆண்டு பாஜகவுக்கான வசூல் குறைந்து இருக்கிறது. கடந்த நிதியாண்டில் அக்கட்சி ரூ.785.77 கோடியை நன்கொடையாக பெற்றிருந்தது. கொரோனா ஊரடங்கு, பொருளாதார சரிவு போன்ற காரணங்களால் இது குறைந்திருக்கலாம் என்று கூறப்படுகிறது.

பரிதாபகர நிலையில் காங்கிரஸ்

எதிர்க்கட்சியான காங்கிரஸை எடுத்துக்கொண்டால், 2020 - 2021 நிதியாண்டில் அக்கட்சி வெறும் ரூ.74 கோடியை மட்டுமே வசூல் செய்துள்ளது. இது பாஜகவின் வசூலைவிட 6.5 மடங்கு குறைவாகும். அந்த கட்சிக்கு 1,059 பேர் நன்கொடை வழங்கி இருக்கிறார்கள். மொத்த கட்சிகளின் வசூலில் காங்கிரஸின் பங்கு வெறும் 11% மட்டுமே. கடந்த நிதியாண்டில் காங்கிரஸ் கட்சி ரூ.139.01 கோடி நன்கொடையை வசூலித்திருக்கிறது.

English summary

BJP donation in last Financial year is 6.5 times higher than Congress: ஆளும் பாரதிய ஜனதா கட்சி, 2020 - 21 நிதியாண்டில் ரூ.477 கோடியை வசூலித்து அனைத்து கட்சிகளையும்விட வசூலில் சாதனை படைத்துள்ளது.