ராஜ்யசபா தேர்தல்.. பாஜக வேட்பாளர்கள் அறிவிப்பு! நிர்மலா சீதாராமன் கர்நாடகாவில் இருந்து போட்டி
டெல்லி: விரைவில் நடைபெறும் மாநிலங்களவை தேர்தலில் பாஜக சார்பில் போட்டியிடும் வேட்பாளர் பட்டியல் வெளியாகி உள்ளது.
நாடு முழுவதும் மொத்தம் 15 மாநிலங்களில் உள்ள 57 மாநிலங்களவை உறுப்பினர் பதவி விரைவில் காலியாகிறது. இதற்கான தேர்தல் வரும் ஜூன் 10ஆம் தேதி நடைபெறும் எனத் தேர்தல் கமிஷன் அறிவித்து உள்ளது.
இதற்கான வேட்புமனுத் தாக்கல் ஏற்கனவே தொடங்கி நடைபெற்று வருகிறது. மாநிலங்களவை தேர்தல் வேட்பாளர்களை அனைத்து கட்சிகளும் வரிசையாக அறிவித்து வருகிறது.
பாஜக வேட்பாளர் பட்டியல்
தற்போது பல்வேறு மாநிலங்களில் உள்ள சட்டசபை உறுப்பினர்களின் எண்ணிக்கை அடிப்படையில் பாஜகவுக்கு மொத்தம் 16 இடங்கள் கிடைக்கும். இந்தச் சூழலில் மாநிலங்களவை தேர்தலில் போட்டியிடும் வேட்பாளர்களை பாஜக அறிவித்துள்ளது. அதில் மத்திய அமைச்சர் பியூஷ் கோயல் மகாராஷ்டிராவில் இருந்து போட்டியிடுகிறார். அவருடன் சேர்ந்து அனில் பாண்டேவும் மகாராஷ்டிராவில் இருந்து போட்டியிட உள்ளார்,
நிர்மலா சீதாராமன்
அதேபோல மத்திய நிதி அமைச்சர் நிர்மலா சீதாராமன் கர்நாடகாவில் இருந்து போட்டியிடுகிறார். அவர் ஏற்கனவே கர்நாடகாவில் இருந்து தான் மாநிலங்களவைக்குத் தேர்வு செய்யப்பட்டு இருந்த நிலையில், இப்போது மீண்டும் அங்கு இருந்தே போட்டியிடுகிறார். மேலும், ஜக்கேஷ் என்பவரும் கர்நாடகாவில் இருந்து மாநிலங்களவைக்குச் செல்ல உள்ளார். கர்நாடகாவில் மொத்தம் 4 இடங்களுக்கு ராஜ்யசபா தேர்தல் நடைபெற உள்ளது.
மாநில வாரியாக
இந்த மாநிலங்களவை தேர்தலில் உத்தரப் பிரதேசத்தில் அதிகபட்சமாக 11 இடங்கள் உள்ளன. அங்கு மொத்தம் 6 வேட்பாளர்களை பாஜக அறிவித்துள்ளது. மகாராஷ்டிராவில் 6 இடங்களுக்குத் தேர்தல் நடைபெறும் நிலையில், அங்கு இருந்து இரு வேட்பாளர்கள் அறிவிக்கப்பட்டுள்ளது. இது தவிரப் பீகாரில் இருந்து இரு வேட்பாளர்கள் மற்றும் கர்நாடகா, ராஜஸ்தான், உத்தரகண்ட், ஹரியானா மாநிலங்களில் இருந்து தலா ஒரு வேட்பாளர்களை பாஜக அறிவித்துள்ளது.
முக்தார் அப்பாஸ்
மத்திய சிறுபான்மை விவகார அமைச்சர் முக்தார் அப்பாஸ் நக்வியின் பதவிக்காலமும் முடிவடைய உள்ளது. ஆனால் அவரது பெயர் வேட்பாளர் பட்டியலில் இடம் பெறவில்லை. நாடு முழுவதும் புதிய மாநிலங்களவை உறுப்பினர்களைத் தேர்வு செய்ய வரும் ஜூன் 10இல் தேர்தல் நடைபெற உள்ளது.
Click it and Unblock the Notifications
Sign in with Google