"7 சகோதரிகளை” கைப்பற்றும் பாஜக.. வடகிழக்கில் துடைத்து எறியப்படும் காங்கிரஸ்.. C Voter சர்வே ரிசல்ட்!

டெல்லி: ஏபிபி - சி வோட்டர் கருத்துக்கணிப்பின்படி, வடகிழக்கு மாநிலங்களில் உள்ள 25 மக்களவைத் தொகுதிகளில் 21 இடங்களை பாஜக தலைமையிலான தேசிய ஜனநாயகக் கூட்டணி கைப்பற்றும் எனத் தெரிவிக்கப்பட்டுள்ளது.

விரைவில் லோக்சபா தேர்தல் நடைபெற உள்ளது. தேர்தலுக்கு அனைத்து கட்சிகளும் தயாராகி வருகின்றன. இந்நிலையில் தான் வரும் லோக்சபா தேர்தல் தொடர்பாக பல்வேறு கருத்து கணிப்பு முடிவுகள் வெளியாகி வருகின்றன. அந்த வகையில் ஏபிபி நியூஸ் - சி வோட்டர் இணைந்து நடத்திய தேர்தலுக்கு முந்தைய கருத்து கணிப்பு முடிவுகள் வெளியாகி வருகின்றன. அசாம் உள்ளிட்ட வட கிழக்கு மாநிலங்களில் நடத்தப்பட்ட சர்வே முடிவுகள் வெளியிடப்பட்டுள்ளன.

ஏழு சகோதரிகள்: இந்தியாவின் வடகிழக்கில் இருக்கும் ஏழு மாநிலங்கள் "ஏழு சகோதரிகள்" என அழைக்கப்படுகின்றன. அருணாச்சல பிரதேசம், அசாம், மேகாலயா, மணிப்பூர், மிசோரம், நாகலாந்து மற்றும் திரிபுரா ஆகிய 7 மாநிலங்களே செவன் சிஸ்டர்ஸ் என்று வர்ணிக்கப்படுகின்றன. இந்த வடகிழக்கு மாநிலங்களில் மொத்தம் 25 லோக்சபா தொகுதிகள் உள்ளன.

அசாம், மணிப்பூர், திரிபுரா மற்றும் அருணாச்சல பிரதேசம் ஆகிய மாநிலங்களில் பாஜக ஆள்கிறது. அதே வேளையில், மேகாலயா மற்றும் நாகாலாந்தில் ஆளும் கூட்டணியில் பாஜகவும் பார்ட்னராக உள்ளது. வட கிழக்கு மாநிலங்களைப் பொறுத்தவரை தற்போது பாஜக எதிர்க்கட்சியாக இருக்கும் ஒரே மாநிலம் மிசோரம் மட்டுமே.

வடகிழக்கில் யார் ராஜா?: மணிப்பூர் கலவரம், அதனால் ஏற்பட்ட உயிர் பலிகள் உள்ளிட்ட விவகாரங்கள் நாடு முழுவதும் கவனிக்கப்பட்டன. இந்நிலையில், வரும் மக்களவைத் தேர்தலில் வடகிழக்கு மாநிலங்களைத் தக்கவைத்துக்கொள்ளப் போவது யார் என்பது பெரிய எதிர்பார்ப்பாக உள்ளது.

அசாமில் பாஜக கிங்: ABP-CVoter இன் கருத்துக்கணிப்பு கருத்துக்கணிப்பின்படி, பாஜக தலைமையிலான தேசிய ஜனநாயகக் கூட்டணி (NDA) அசாம் மாநிலத்தில் ஆதிக்கம் செலுத்தும் என்றும், அசாமில் மொத்தமுள்ள 14 லோக்சபா தொகுதிகளில் 12-ல் பாஜக வெற்றி பெற வாய்ப்புள்ளது, மேலும் எதிர்க்கட்சிகளின் கூட்டணியான இந்தியா கூட்டணிக்கு வெறும் 2 இடங்கள் மட்டுமே கிடைக்கும் என்று கணிக்கப்பட்டுள்ளது.

சி வோட்டர் கருத்துக் கணிப்பின்படி அசாம் மாநிலத்தில் பாஜக கூட்டணி 45 சதவீத வாக்குகளையும், இந்தியா கூட்டணி 38 சதவீத வாக்குகளையும், 13% AIUDF கட்சிக்கும் கிடைக்கும் என்று கணிக்கப்பட்டுள்ளது. அசாம் தவிர வடகிழக்கில் உள்ள மாநிலங்களில் இருக்கும் 11 மக்களவைத் தொகுதிகளில் 9 பாஜக கூட்டணி கைப்பற்றும் எனத் தெரிவிக்கப்பட்டுள்ளது.

அசாம் தவிர்த்து வட கிழக்கு மாநிலங்களில்: காங்கிரஸ் தலைமையிலான இந்தியா கூட்டணி, அசாம் தவிர்த்து வடகிழக்கு பகுதியில் மொத்தம் உள்ள 11 லோக்சபா சீட்களில் ஒரு மக்களவைத் தொகுதியில் மட்டுமே வெற்றிபெற வாய்ப்புள்ளது என்றும், மற்ற கட்சிகள் 1 இடத்தில் வெற்றி பெறுவதற்கு வாய்ப்புள்ளது என்றும் ஏபிபி சி வோட்டர் கணிப்பு முடிவுகள் தெரிவிக்கின்றன.

அருணாச்சல பிரதேசத்தில் பாஜக 61 சதவீத வாக்குகளைப் பெறும் என கருத்துக் கணிப்புகள் தெரிவிக்கின்றன. காங்கிரஸ் தலைமையிலான இந்தியா கூட்டணி 32 சதவீத வாக்குகளும், மற்றவை 7 சதவீத வாக்குகளும் பெறும் எனத் தெரிவிக்கப்பட்டுள்ளது. அதேபோல மேகாலாயாவிலும் பாஜக 2 இடங்களிலும் வெல்லும் என்கிறது ஏபிபி சி வோட்டர் கணிப்பு.

மணிப்பூர் நிலவரம்: மணிப்பூரில், பாஜக தலைமையிலான என்.டி.ஏ பெரும்பான்மை வாக்குகளைக் கைப்பற்றுவதாகத் தெரிகிறது சி வோட்டர் கணிப்பு. அங்கு பாஜக கூட்டணி 50 சதவீத வாக்குகளுடன் 2 சீட்களையும் இந்தியா கூட்டணி 34 சதவீத வாக்குகள், மற்றவர்கள் 16 சதவீத வாக்குகளும் பெறுவார்கள் எனத் தெரிவிக்கப்பட்டுள்ளது.

English summary

According to an opinion poll survey by ABP - C Voter, the BJP led NDA could win as many as 9 of the 11 Lok Sabha seats in the Northeast.