தேர்தல் ரிசல்ட் வந்து 4 நாட்களாச்சே..3 மாநில முதல்வர்கள் யார்? முடிவெடுக்க முடியாமல் தவிக்குது பாஜக!

டெல்லி: ராஜஸ்தான், மத்திய பிரதேசம், சத்தீஸ்கர் மாநில சட்டசபை தேர்தல் முடிவுகள் வெளியாகி 4 நாட்களாகிவிட்ட நிலையில் இம்மாநிலங்களில் முதல்வர்கள் யார் என முடிவெடுக்க முடியாமல் பாஜக தத்தளித்து வருகிறது.

தெலுங்கானா, சத்தீஸ்கர், ம.பி, ராஜஸ்தான் மற்றும் மிசோரம் மாநிலங்களில் சட்டசபை தேர்தல்கள் நடைபெற்றன. தெலுங்கானாவில் காங்கிரஸ் கட்சி வெற்றி பெற்றது. அம்மாநில காங்கிரஸ் கமிட்டித் தலைவர் ரேவந்த் ரெட்டி இன்று முதல்வராகப் பதவியேற்றுக் கொண்டார். மிசோரம் மாநிலத்தில் ஜோரம் மக்கள் இயக்கம் வெற்றி பெற்றுள்ளது. மிசோரம் முதல்வராக லால்துஹோமா நாளை பதவியேற்க உள்ளார்.

சத்தீஸ்கர், ராஜஸ்தான் மற்றும் மத்திய பிரதேச மாநிலங்களில் பாஜக வென்றுள்ளது. ஆனால் இந்த 3 மாநிலங்களின் முதல்வர் பதவிக்கு கடும் போட்டி இருப்பதால் பாஜக மேலிடம் முடிவெடுக்க முடியாமல் தத்தளித்து வருகிறது.

ராஜஸ்தான்: ராஜஸ்தான் மாநிலத்தில் முன்னாள் முதல்வர் வசுந்தர ராஜே சிந்தியா தமக்குதான் முதல்வர் பதவி தர வேண்டும் என்பதில் உறுதியாக நிற்கிறார். அவருக்கு ஆதரவாக 25 எம்.எல்.ஏக்கள் உள்ளனர். ஆனால் பாஜக மேலிடமோ புதுமுகம் ஒருவரை முதல்வராக்க விரும்புகிறது. ராஜஸ்தான் முதல்வர் பதவிக்கான போட்டியில் அர்ஜூன் ராம் மேக்வல், தியாகுமாரி, அஸ்வினி வைஷ்ணவ், கஜேந்திர சிங் ஷெகாவத், சிபி ஜோஷி, பாபா பாலக்நாத் ஆகியோரும் உள்ளனர். அதே நேரத்தில் லோக்சபா சபாநாயகர் ஓம் பிர்லாவை ராஜஸ்தான் மாநில முதல்வராக்கவும் பாஜக மேலிடம் பரிசீலனை செய்து வருவதாகவும் கூறப்படுகிறது.

மத்திய பிரதேசம்: மத்திய பிரதேசத்தில் முதல்வர் சிவராஜ் சிங் இம்முறையும் தம்மையே முதல்வராக்க வேண்டும் என வலியுறுத்துகிறார். ஆனால் பாஜக மேலிடமோ வேறு ஒருவரை முதல்வராக்க முனைகிறது. இது தொடர்பாக டெல்லியில் நடைபெற்ற ஆலோசனைக் கூட்டங்களுக்கு போக முடியாது என மறுத்தார் சிவராஜ் சிங் சவுகான். ம.பி. மாநில முதல்வர் பதவிக்கான ரேஸில், எம்பி பதவிகளை ராஜினாமா செய்த நரேந்திர சிங் தோமர் மற்றும் பிரகலாத் சிங் பட்டேல் ஆகியோர் முன்னணியில் உள்ளனர்.

சத்தீஸ்கர்: பாஜக வெற்றி பெற்ற சத்தீஸ்கர் மாநிலத்திலும் புதுமுகம் ஒருவரையே முதல்வராக்க பாஜக முனைகிறது. சத்தீஸ்கர் மாநிலத்தில் முன்னாள் முதல்வர் ரமண் சிங், முதல்வர் பதவிக்கான ரேஸில் முதல் இடத்தில் உள்ளார். அதே நேரத்தில் அருண் சாவ், ரேணுகா சிங், விஷ்ணு தியோ சாய், ரவிச்சந்திர நேதம் ஆகியோரும் முதல்வர் பதவிக்கான போட்டியில் இருந்து வருகின்றனர். சத்தீஸ்கர், ராஜஸ்தான், மத்திய பிரதேச மாநிலத்தின் புதிய முதல்வர்கள் யார் என முடிவெடுக்க முடியாமல் பாஜக தத்தளித்து வருவதை எதிர்க்கட்சிகள் கடுமையாக விமர்சித்தும் வருகின்றன.

English summary

Sources said that BJP may give CM posts in Rajasthan, Madhya Pradesh, Chhattisgarh to new faces.