கெட் லாஸ்ட்.. வெளியே போங்கள்! எதிர்க்கட்சி எம்பிக்களை மிரட்டிய தலைமை தேர்தல் ஆணையர்? என்ன நடந்தது?

Updated: Thursday, October 8, 2026, 16:06 [IST]

Subscribe to Oneindia Tamil

டெல்லி: நாட்டின் தேர்தல் அமைப்பை நடுநிலையாக வழிநடத்த வேண்டிய இந்தியத் தேர்தல் ஆணையம் (Election Commission of India - ECI), இதுவரை இல்லாத அளவுக்குக் கடுமையான சர்ச்சைகளிலும் அரசியல் புயலிலும் சிக்கியுள்ளது. டெல்லியில் அக்டோபர் 6 அன்று எதிர்க்கட்சிகளைச் சேர்ந்த சுமார் 240 நாடாளுமன்ற உறுப்பினர்கள் தேர்தல் ஆணைய அலுவலகத்தை நோக்கிப் பேரணியாகச் சென்ற சம்பவம் இந்திய அரசியலில் மிகப்பெரிய அதிர்வலைகளை ஏற்படுத்தியுள்ளது.

தலைமைத் தேர்தல் ஆணையர் (CEC) ஞானேஷ் குமார் பதவி விலக வேண்டும் என்றும், தங்களை நேரில் சந்தித்துப் பேச வேண்டும் என்றும் கோரி நாடாளுமன்றத்திலிருந்து பேரணியாகக் கிளம்பிய எம்.பி.க்களை, ஆணையத்தின் அலுவலகத்துக்கு சில நூறு மீட்டர்களுக்கு முன்னதாகவே டெல்லி போலீசார் தடுத்து நிறுத்தினர். இதனால் எதிர்க்கட்சித் தலைவர்கள் சாலையிலேயே அமர்ந்து எட்டு மணி நேரத்திற்கும் மேலாகப் போராட்டம் நடத்தினர்.

வெளியில் அரசியல் கட்சிகளுடன் மோதல் ஒருபுறம் இருக்க, தேர்தல் ஆணையத்தின் உள்ளேயே தலைமைத் தேர்தல் ஆணையருக்கு எதிராக மற்ற இரு ஆணையர்களும் தொடர்ச்சியாகக் கடுமையான எதிர்ப்புக் குறிப்புகளைப் பதிவு செய்திருப்பது பெரும் விவாதத்தைக் கிளப்பியுள்ளது.

அக்டோபர் 6 டெல்லி நிகழ்வு: உண்மையில் நடந்தது என்ன?

அக்டோபர் 6 அன்று மக்களவை எதிர்க்கட்சித் தலைவர் ராகுல் காந்தி மற்றும் அகிலேஷ் யாதவ் உள்ளிட்ட 'இந்தியா' கூட்டணிக் கட்சிகளின் எம்.பி.க்கள் தேர்தல் ஆணைய அலுவலகத்தை நோக்கி நடந்தனர். வாக்காளர் பட்டியல் திருத்தம் மற்றும் ஆணையத்தின் செயல்பாடுகள் குறித்து மனு அளிக்க அவர்கள் திட்டமிட்டிருந்தனர். ஆனால், அவர்களைப் போலீசார் தடுத்து நிறுத்தியதால் பெரும் தள்ளுமுள்ளு ஏற்பட்டு, பின்னர் தலைவர்கள் தடுத்து வைக்கப்பட்டனர்.

'அழைப்பு விடுத்து எங்களை அனுமதிக்க மாட்டீர்களா?' - காங்கிரஸ் கட்சியின் குமுறல்

அரசியல் கட்சிகள் தேர்தல் ஆணையத்தை அணுகும்போது நடத்தப்படும் விதம் குறித்து எதிர்க்கட்சிகள் நீண்ட நாட்களாகவே அதிருப்தி தெரிவித்து வருகின்றன.

ஜூன் 9 சம்பவம்: மத்தியப் பிரதேச மாநில மாநிலங்களவைத் தேர்தல் தொடர்பான விவகாரத்தில், காங்கிரஸ் குழு ஒன்று தேர்தல் ஆணைய அலுவலகத்திற்குச் சென்றது. அப்போது பாரதிய நியாய சன்ஹிதா பிரிவு 163-ன் கீழ் தடை உத்தரவு பிறப்பிக்கப்பட்டுள்ளதாகக் கூறி, தலைவர்கள் வாசலிலேயே நீண்ட நேரம் காக்க வைக்கப்பட்டனர். வாசலில் தர்ணா செய்த பிறகே சில மூத்த தலைவர்கள் உள்ளே அனுமதிக்கப்பட்டனர்.

"நாங்கள் நாட்டிலுள்ள முதன்மையான எதிர்க்கட்சி. எங்களை மரியாதையாக அழைத்து பேச வேண்டாமா?" என்று காங்கிரஸ் செய்தித் தொடர்பாளர் பவன் கேரா கேள்வி எழுப்பினார்.

உத்தரகாண்ட் விவகாரம்: வாக்காளர் பட்டியலின் சிறப்புத் தீவிர திருத்தம் (SIR) மற்றும் படிவம்-7 தொடர்பாகப் பேச உத்தரகாண்ட் காங்கிரஸ் குழு நேரம் கேட்டும் ஒரு வாரமாகப் பதில் இல்லை. நேரில் சென்றபோதும் உள்ளே செல்ல அனுமதி மறுக்கப்பட்டு, ஒரு சாதாரண எழுத்தர் வாயிலுக்கே வந்து மனுவைப் பெற்றுச் சென்றதாகப் பவன் கேரா சுட்டிக்காட்டினார்.

Recommended For You

ஞானேஷ் குமாருக்கு எதிராக போராட்டம்.. தடையை மீறி சென்றதாக ராகுல், பிரியங்கா மீது பாய்ந்தது வழக்கு

"நாங்கள் ஏதோ புகார் கொடுக்க வரும் சாதாரண நபர்கள் அல்ல; மக்களால் தேர்ந்தெடுக்கப்பட்ட பிரதிநிதிகள். தேர்தல் அமைப்பின் முக்கியப் பங்காளிகள்" என்பது எதிர்க்கட்சிகளின் வாதம்.

'மற்றவர்கள் பேசுவதை நீங்கள் காதுகொடுத்துக் கேட்க வேண்டும்' - மனோஜ் ஜா

2025 ஜூலை 2 அன்று, பீகார் மாநில வாக்காளர் பட்டியல் திருத்தம் (SIR) தொடர்பாக எதிர்க்கட்சிகள் தேர்தல் ஆணையத்தைச் சந்தித்தன. அனைத்துக் கட்சிகளின் கருத்துகளையும் கேட்டுப் பேசிவிட்டதாக ஆணையம் அறிக்கை வெளியிட்டது. ஆனால், கூட்டத்தில் பங்கேற்ற தலைவர்களின் அனுபவம் முற்றிலும் வேறாக இருந்தது.

ராஷ்டிரிய ஜனதா தளம் எம்.பி. மனோஜ் ஜா அந்தக் கூட்டத்திலிருந்து வெளியே வந்து, "இது சுமூகமான ஒரு சந்திப்பே இல்லை" என்று வெளிப்படையாகக் கூறினார்.

"அரசியலமைப்புச் சட்டப் பதவியில் அமர்ந்திருக்கும் ஒருவருக்கு மற்றவர்கள் சொல்வதைக் கேட்கும் குணம் மிக அவசியம். ஆனால் ஞானேஷ் குமாரிடம் கேட்கும் தன்மையே அறவே இல்லை. நான் டெல்லி பல்கலைக்கழகத்தில் பேராசிரியராகப் பாடம் எடுப்பவன். 'பிறர் சொல்வதைக் காதுகொடுத்துக் கேளுங்கள், அந்தப் பழக்கத்தை வளர்த்துக் கொள்ளுங்கள்' என்று அவரிடமே நேரில் சொன்னேன்."

முந்தைய தேர்தல் ஆணையர் ராஜீவ் குமார் காலத்தில் ஒரு எளிய மின்னஞ்சல் (Email) அனுப்பினாலே சந்திப்பு கிடைத்துவிடும் என்றும், ஆனால் ஞானேஷ் குமார் பொறுப்பேற்ற பிறகு, "சந்திப்பு கேட்க உங்களுக்கு என்ன அதிகாரம் இருக்கிறது?" என்று கேள்வி எழுப்பப்பட்டு அரசியல் கட்சிகளுக்கும் ஆணையத்திற்கும் இடையே பெரிய சுவர் எழுப்பப்பட்டுவிட்டதாகவும் மனோஜ் ஜா குற்றம்சாட்டினார்.

7 நிமிடச் சந்திப்பும் 'கெட் லாஸ்ட்' சர்ச்சையும்: திரிணாமுல் காங்கிரஸ் குற்றச்சாட்டு

2026 ஏப்ரல் 8 அன்று, மேற்கு வங்கத் தேர்தல் அதிகாரிகள் விவகாரம் தொடர்பாகத் திரிணாமுல் காங்கிரஸ் கட்சியின் டெரெக் ஓ பிரையன், சாகரிகா கோஷ், மேனகா குருசுவாமி, சாகேத் கோகலே ஆகிய நான்கு பேர் கொண்ட குழு தேர்தல் ஆணையத்திற்குச் சென்றது. மேற்கு வங்க முதல்வர் மமதா பானர்ஜி எழுதிய 9 கடிதங்களையும் அவர்கள் எடுத்துச் சென்றனர்.

அந்தச் சந்திப்பு வெறும் 7 நிமிடங்களிலேயே முடிவுக்கு வந்தது.

தாங்கள் எழுப்பிய கேள்விகளுக்குப் பதிலளிக்காமல், தலைமைத் தேர்தல் ஆணையர் தங்களை "கெட் லாஸ்ட்" (வெளியே போங்கள்) என்று விரட்டியதாக திரிணாமுல் காங்கிரஸ் குற்றம்சாட்டியது. சந்திப்பின் வீடியோ பதிவையோ அல்லது குறிப்புகளையோ தேர்தல் ஆணையம் தைரியமிருந்தால் வெளியிட வேண்டும் என்று டெரெக் ஓ பிரையன் சவால் விடுத்தார். இதற்கு மறுப்பு தெரிவித்த தேர்தல் ஆணையம், "டெரெக் ஓ பிரையன் சத்தமிட்டுப் பேசினார்.. அமைதி காக்குமாறு அறிவுறுத்தப்பட்டது" என்று விளக்கம் அளித்தது.

அங்கு நடந்த மற்றொரு முக்கிய நிகழ்வைக் குறிப்பிட்ட எம்.பி. சாகேத் கோகலே, "ஞானேஷ் குமார் பொறுப்பேற்ற பிறகு நடந்த கூட்டங்களில், அவருடன் அமர்ந்திருக்கும் மற்ற இரு ஆணையர்களும் பேசுவதற்கே அனுமதிக்கப்படுவதில்லை. ஏப்ரல் 8 அன்று மற்ற இரு ஆணையர்களின் கருத்தைக் கேட்க நாங்கள் முற்பட்டபோது, 'வெளியே போங்கள், அவர்களை நான் பேச விடமாட்டேன்' என்றார். மேலும் ஒருமுறை, 'உங்கள் கட்சியின் சின்னத்தைப் பறிக்கும் அதிகாரம் எனக்கு இருக்கிறது என்பதை நினைவில் வையுங்கள்' என்று மிரட்டல் விடுத்தார்" என்று பகிரங்கமாகக் குற்றம்சாட்டினார்.

தேர்தல் ஆணையத்திற்குள் மோதல்: ஆவணங்களில் பதிவான 14 ஆட்சேபனைகள்

அரசியல் கட்சிகள் வைக்கும் குற்றச்சாட்டுகள் ஒருபுறம் இருந்தாலும், தேர்தல் ஆணையத்தின் உள் விவகாரங்கள் குறித்து 'தி இந்தியன் எக்ஸ்பிரஸ்' நாளிதழ் வெளியிட்ட புலனாய்வு அறிக்கை நாட்டையே அதிர வைத்தது.

தலைமைத் தேர்தல் ஆணையருடன் பணியாற்றும் மற்ற இரு ஆணையர்களான சுக்பீர் சிங் சந்து மற்றும் விவேக் ஜோஷி ஆகியோர், கடந்த 10 மாதங்களில் குறைந்தது 14 முறை தங்கள் கடுமையான ஆட்சேபனைகளை எழுத்துப்பூர்வமாகப் பதிவேட்டில் பதிவு செய்துள்ளனர்:

தங்கள் இருவருக்கும் தெரிவிக்காமலும், ஒப்புதல் பெறாமலும் பல முக்கிய உத்தரவுகளும் முடிவுகளும் ஆணையத்தின் பெயரால் பிறப்பிக்கப்பட்டுள்ளதாக இவ்விரு ஆணையர்களும் பதிவு செய்துள்ளனர். சில நடவடிக்கைகளை அவர்கள் அதிகார வரம்பற்றது மற்றும் சட்டவிரோதமானது என்றும் குறிப்பிட்டுள்ளனர்.

புதிய வாக்காளர்களைச் சேர்க்கும் அதிகாரப்பூர்வ 'படிவம் 6'-ல் தேர்தல் பதிவு விதிகள், 1960-ல் முறைப்படி திருத்தம் செய்யாமல் மாற்றங்களைச் செய்ய முடியாது என்று ஆணையர் விவேக் ஜோஷி மே மாதத்தில் சுட்டிக்காட்டினார். ஆணையர் சந்துவும் இதை வழிமொழிந்தார். ஆனால், அவர்களின் எதிர்ப்பையும் மீறி அந்த மாற்றம் அமல்படுத்தப்பட்டது.

மாநில மற்றும் மாவட்ட அதிகாரிகளின் அதிகாரத்தைக் குறைத்து, வாக்காளர் பட்டியல் தரவுத்தளத்தை டெல்லியில் உள்ள தொழில்நுட்பப் பிரிவு தன்னிச்சையாகக் கட்டுப்படுத்துவது குறித்தும் இவ்விரு ஆணையர்களும் கவலை தெரிவித்தனர். இதற்காக அவர்கள் மத்திய அமைச்சரவைச் செயலாளரை அணுகும் நிலையும் ஏற்பட்டது.

கோவாவில் உள்ளூர் தேர்தல் அதிகாரி தகுதியானவர்கள் என்று முடிவு செய்த 97 வாக்காளர்களை இறுதிப் பட்டியலில் மீண்டும் சேர்க்க முடியவில்லை. மென்பொருளில் அதற்கான வசதி இல்லை எனக் கூறி அவர்கள் நீக்கப்பட்டனர். அதிகாரியின் சட்டப்பூர்வ அதிகாரத்தை விட ஒரு மென்பொருள் ஆதிக்கம் செலுத்துவது ஜனநாயக நெறிமுறைகளுக்கு எதிரானது என்று சுட்டிக்காட்டப்பட்டது.

வாக்காளர் பட்டியலில் பெயர் சேர்க்கனுமா? வரும் 10 ஆம் தேதி சிறப்பு முகாம்.. தேர்தல் ஆணையம் அறிவிப்பு

சட்டம் என்ன சொல்கிறது? தேர்தல் ஆணையம் தனி நபர் அமைப்பா?

இந்திய அரசியலமைப்புச் சட்டம் பிரிவு 324-ன் படி, இந்தியத் தேர்தல் ஆணையம் என்பது தலைமைத் தேர்தல் ஆணையர் மற்றும் பிற தேர்தல் ஆணையர்களைக் கொண்ட ஒரு கூட்டமைப்பாகும்.

2023-ல் கொண்டுவரப்பட்ட புதிய சட்டத்தின்படியும், ஆணையத்தின் அனைத்து முடிவுகளும் ஒருமனதாக எடுக்கப்பட வேண்டும்; கருத்து வேறுபாடு ஏற்படும் சூழலில் பெரும்பான்மை வாக்கு அடிப்படையில் முடிவெடுக்கப்பட வேண்டும்.

தலைமைத் தேர்தல் ஆணையர் என்பவர் மற்ற ஆணையர்களை விட உயர்ந்த அதிகாரம் படைத்த எதேச்சதிகாரி அல்ல; அவர் சமமானவர்களில் முதன்மையானவர் மட்டுமே. மற்ற இரு ஆணையர்களைப் புறக்கணித்துவிட்டு முடிவுகளை எடுக்கும் அதிகாரம் தலைமைத் தேர்தல் ஆணையருக்குச் சட்டப்படி கிடையாது.

இந்தியன் எக்ஸ்பிரஸ் வெளியிட்ட அறிக்கைக்குப் பதிலளித்த தேர்தல் ஆணையம், கருத்து வேறுபாடுகள் இயல்பானவை; முடிவுகள் அனைத்தும் ஒருமனதாகவே எடுக்கப்பட்டன என்று பொதுவான பதில் அளித்தது. ஆனால், அந்த இரு ஆணையர்களும் பதிவு செய்த 14 ஆட்சேபனைக் குறிப்புகளை ஆணையம் மறுக்கவோ, அதற்கு முறையான விளக்கமளிக்கவோ இல்லை.

தேர்தல் நடுநிலைக்கு எழுந்துள்ள பெரும் சவால்

கடந்த 2025 ஆகஸ்ட் 17 அன்று தலைமைத் தேர்தல் ஆணையராகப் பொறுப்பேற்ற பிறகு ஞானேஷ் குமார் நடத்திய முதல் செய்தியாளர் சந்திப்பிலேயே, "ராகுல் காந்தி வாக்கு திருட்டு குற்றச்சாட்டுகளுக்கு 7 நாட்களுக்குள் பிரமாணப் பத்திரம் தாக்கல் செய்ய வேண்டும், இல்லையெனில் நாட்டு மக்களிடம் மன்னிப்பு கேட்க வேண்டும்" என்று காட்டமாகப் பேசினார். இது அவர் மீதான அரசியல் விமர்சனங்களுக்குத் தொடக்கப் புள்ளியாக அமைந்தது.

அரசியல் கட்சிகளுடன் வாக்குவாதம் ஏற்படுவதை ஒருபுறம் அரசியல் மோதல் என்று ஒதுக்கிவிட்டாலும், ஆணையத்திற்குள் இருக்கும் இரண்டு தேர்தல் ஆணையர்களே 14 முறை தங்கள் எதிர்ப்பை அதிகாரப்பூர்வமாகப் பதிவு செய்திருப்பது விவகாரத்தின் தீவிரத்தை உணர்த்துகிறது.

இந்தியத் தேர்தல் ஆணையம் மூன்று உறுப்பினர்களைக் கொண்ட சட்டப்பூர்வ அமைப்பாக இயங்குகிறதா, அல்லது அனைத்து முடிவுகளையும் ஒருவரே தீர்மானிக்கும் ஒற்றை அதிகார மையமாக மாறிவிட்டதா என்ற மிக முக்கியமான வினாவை இந்த நிகழ்வுகள் எழுப்பியுள்ளன. உலகிலேயே மிகப்பெரிய ஜனநாயக நாடான இந்தியாவில், தேர்தல்களை நியாயமாக நடத்தும் அமைப்பின் நம்பகத்தன்மை பாதுகாக்கப்பட வேண்டியது அவசியமாகும்.