12-18 வயதினருக்காக.. விரைவில் வருகிறது சைடஸ் கேடிலா தடுப்பூசி.. மத்திய அரசின் குட் நியூஸ்!

டெல்லி: குஜராத்தின் அகமதாபாத் அருகே சங்கோதர் பகுதியில் இயங்கி வரும் சைடஸ் கேடிலா நிறுவனம் ZyCoV-D(சைகோவ்-டி) என்ற கொரோனா தடுப்பூசியை தயாரித்துள்ளது. இந்த தடுப்பூசியை 28,000 தன்னார்வலர்களுக்கு செலுத்தி தீவிர பரிசோதனை நடந்தன.

இதில் 3 கட்ட பரிசோதனைகளும் முடிவடைந்துள்ளன. சைகோவ்-டி கொரோனா தடுப்பூசியானது புதிய டெல்டா வகை கொரோனா வைரஸ்களிலிருந்து பாதுகாக்கும் திறன் கொண்டவை என்று சைடஸ் கேடிலா நிறுவனம் தெரிவித்து இருந்தது.

சைடஸ் கேடிலா தடுப்பூசி

சைகோவ்-டி தடுப்பூசியின் அவரச கால பயன்பாட்டுக்கு அனுமதி அளிக்கும்படி சைடஸ் கேடிலா நிறுவனம் , இந்திய மருந்துகள் கட்டுப்பாட்டு ஆணையத்திடம் ஏற்கனவே விண்ணப்பித்துள்ளது. இந்த நிலையில் 12-18 வயதுடைய குழந்தைகளுக்கான சைடஸ் கேடிலாவின் தடுப்பூசிக்கு விரைவில் அனுமதி அளிக்கப்படும் என்று உச்சநீதிமன்றத்தில் மத்திய அரசு தெரிவித்துள்ளது.

குழந்தைகளுக்கான தடுப்பூசி

சைடஸ் கேடிலா நிறுவனம் தனது சைகோவ்-டி தடுப்பூசியை 12 வயது முதல் 18 வயது உடையவர்களுக்கும் பரிசோதித்து வெற்றி கண்டுள்ளது. தங்கள் தடுப்பூசி குழந்தைகளுக்கு பக்க விளைவுகள் ஏற்படுத்தாமல், கொரோனாவில் இருந்து காப்பாற்றும் வீரியம் கொண்டது என்று சைடஸ் கேடிலா நிறுவனம் கூறி இருந்தது. இதனால் தான் சைகோவ்-டி தடுப்பூசி குழந்தைகளுக்கு செலுத்தப்படுவது குறித்து மத்திய அரசு தெரிவித்துள்ளது.

அதிகாரிகள் சொல்வது என்ன?

எனவே இத்தியாவில் சைடஸ் கேடிலாவின் சைகோவ்-டி தடுப்பூசிக்கு அனுமதி வழங்கப்படும் என்று எதிர்பார்க்கப்படுகிறது. இதற்கு ஒப்புதல் அளித்து விட்டால் ஆகஸ்ட்-செப்டம்பர் மாதத்திற்குள் தடுப்பூசி வழங்கும் பணி தொடங்கும் என்று அதிகாரிகள் தெரிவித்தனர்.

5-வது தடுப்பூசி

உள்நாட்டில் தயாரிக்கப்பட்ட கோவிஷீல்ட், பாரத் பயோடெக்கின் கோவாக்சின், ரஷ்யாவின் ஸ்பூட்னிக் வி மற்றும் அமெரிக்காவில் தயாரிக்கப்பட்ட மாடர்னா ஆகியவற்றிற்கு இந்தியாவில் பயன்படுத்த அனுமதி வழங்கப்பட்டுள்ளது. இந்த வரிசையில் சைகோவ்-டி 5-வது தடுப்பூசியாக மாற இருப்பது குறிப்பிடத்தக்கது. 2 முதல் 18 வயதுக்குட்பட்ட தன்னார்வலர்களுக்கு மருத்துவ பரிசோதனைகளை மேற்கொள்ள பாரத் பயோடெக்கிற்கு மத்திய அரசு ஏற்கனவே அனுமதி வழங்கியுள்ளது குறிப்பிடத்தக்கது.

English summary

The federal government has told the Supreme Court that Zydus Cadila's Covid-19 Vaccine for children aged 12-18 will be approved soon