ஆரம்பம் நல்லாதான் இருந்தது.. ஆனாலும் அடி வாங்கும் பஜாஜ், டிவிஎஸ்! எல்லாம் சீனா செய்த வேலைதான்!

டெல்லி: ஆட்டோமொபைல் துறைக்கு உயிர் நாடியாக இருக்கும் அரிய பூமி காந்தங்களின் ஏற்றுமதியை சீனா நிறுத்தி வைத்திருக்கிறது. இதனால் இந்தியாவில் ஏத்தர், பஜாஜ், டிவிஎஸ் ஆகிய நிறுவனங்களின் மின்சார பைக் உற்பத்தி பாதிக்கப்பட்டிருக்கிறது. உற்பத்தி பாதியாக குறைக்கும் நிலைக்கு இந்நிறுவனங்கள் தள்ளப்பட்டிருக்கின்றன.

பஜாஜ் தனது உற்பத்தியை பாதியாக குறைக்க உள்ளது, ஏத்தர் 8 முதல் 10 சதவீதம் வரை உற்பத்தியை குறைக்க திட்டமிட்டுள்ளது. ஓலா எலக்ட்ரிக் வாகனங்கள் வழக்கம்போல உற்பத்தியை மெயின்டெயின் செய்யும் என்று எகனாமிக் டைம்ஸில் தெரிவித்திருக்கிறது. ஓலா நிறுவனத்திடம் போதுமான அளவுக்கு காந்தங்கள் இருப்பதால் அதன் உற்பத்தியில் எந்த பாதிப்பும் ஏற்படவில்லை.

கடந்த இரண்டு மாதங்களில் பஜாஜ், டிவிஎஸ் ஆகிய நிறுவனங்கள் மின்சார ஸ்கூட்டர் தயாரிப்பில் அதிக கவனம் செலுத்தி வந்தன. இந்த நிலைமையில்தானா இப்படி நடக்க வேண்டும்? என்று இந்நிறுவனங்கள் புலம்பி வருகின்றன. பெட்ரோல் பைக் உற்பத்தியில் இந்த இரண்டு நிறுவனங்களும் கடந்த காலங்களில் சக்கை போடு போட்டு வந்தன. குறிப்பாக பஜாஜ் நிறுவனத்தின் 'பல்சர்' பைக்குகள் இல்லாத இந்திய நகரங்களே இல்லை என்று சொல்லலாம். தெருவுக்கு நாலு பல்சர் பைக்குகள் நின்றுக்கொண்டிருக்கிறது.

கால் டாக்சி போல எங்கு பார்த்தாலும் ஒரு காலத்தில் பல்சர் பைக்குகள் அதிகம் ஓடிக்கொண்டிருந்தன. இப்போதும் இந்த பைக்குகளின் விற்பனை டாப்பில்தான் இருக்கிறது. மைலேஜ் பைக்குகள் எனில் பிலாடினா, சிடி 100 பைக்குகளை சொல்லலாம். ஹீரோ ஹோண்டாவின் ஸ்பெலண்டர் பைக்குகளுக்கு மாற்றாக இவை இருந்தன. இன்றும் இந்த பைக்குகளுக்கு தனி இடம் இருக்கிறது.

அதேபோல, டிவிஎஸ் நிறுவனம் அதன் 'அப்பாச்சி' பைக்குகளுக்காக பேமஸாக அறியப்படுகிறது. அப்பாச்சி தெரியாதவர்களுக்கு டிவிஎஸ் 50 சொன்னால் தெரியும். இந்த நிறுவனங்கள் இப்போதுதான் மின்சார ஸ்கூட்டர்களை நோக்கி கொஞ்சம் கொஞ்சமாக நகர தொடங்கியுள்ளன. இந்த நேரம் பார்த்து சீனாவின் நடவடிக்கையால், கடுமையான பின்னடைவை சந்தித்திருக்கின்றன.

சீனாவின் காந்த ஏற்றுமதி தடையால் 'சேதக்' பைக்கின் உற்பத்தியை குறையத் தொடங்கியுள்ளதாக பஜாஜ் ஆட்டோ தெரிவித்துள்ளது. பஜாஜ் ஆட்டோவின் நிர்வாக இயக்குனர் ராகேஷ் சர்மா இது குறித்து கூறுகையில், "சேதக் லைனில் சில உற்பத்தி இடையூறுகளை நாங்கள் பார்க்கத் தொடங்கியுள்ளோம். எங்கள் ஆர் & டி மற்றும் கொள்முதல் குழுக்கள் இதை சரி செய்ய பணியாற்றி வருகின்றன" என்று தெரிவித்திருக்கிறார்.

டிவிஎஸ் மோட்டார் கடந்த மூன்று மாதங்களில் நல்ல விற்பனையை கொண்டிருந்தது. ஐகியூப் இந்தியாவில் நம்பர் ஒன் இருசக்கர வாகனமாக இருந்து வருகிறது. ஜூன் மாதத்தில், டிவிஎஸ் 25,274 யூனிட்களை விற்றது. இது கடந்த ஆண்டை விட 80% அதிகமாகும். 2024ல் 14,029 யூனிட்களை மட்டுமே இது விற்றிருந்தது.

தற்போது, டிவிஎஸ் 24% சந்தை பங்கைக் கொண்டுள்ளது. அரிய காந்த பற்றாக்குறை அவர்களை எவ்வளவு பாதிக்கும் என்பதை நிறுவனம் வெளிப்படுத்தவில்லை. ஆனால் டிவிஎஸ் மோட்டார் செய்தித் தொடர்பாளர் ஒருவர், "EV சப்ளை சங்கிலியில் ஏற்படும் இடையூறுகள், குறிப்பாக காந்தம் கிடைப்பது தொடர்பானவை, குறுகிய மற்றும் நடுத்தர காலத்தில் சவால்களைத் தொடர்ந்து ஏற்படுத்துகின்றன. சவால்களைக் குறைக்க நாங்கள் தீவிரமாக பணியாற்றி வருகிறோம்" என்று கூறியுள்ளார்.

ஏத்தரின் விற்பனை நிலையானதாக இருக்கிறது. பெரிய அளவுக்கு சரிவோ, அதிகாரிப்போ இல்லை. ஆனால் அரிய காந்தங்கள் சரியான நேரத்திற்கு கிடைக்கவில்லை எனில், உற்பத்தியில் சரிவு ஏற்பட்டு, அது விற்பனையிலும் பிரதிபலிக்கும். இதனால் பைக்குகளின் விலை விண்ணை தொடலாம் என்று அஞ்சப்படுகிறது.

English summary

China has suspended the export of rare earth magnets, a critical component in electric vehicle manufacturing. This move has severely impacted India’s EV sector, with leading manufacturers like Ather, Bajaj, and TVS forced to cut production by 50%. The shortage highlights India's dependency on Chinese supplies and the urgent need for alternative sourcing or domestic production capabilities.