கரப்பான் பூச்சி நிறுவனரை தாக்கிய ஆர்எஸ்எஸ் அமைப்பினர்? திப்கே பகிரங்க குற்றச்சாட்டு.. என்ன நடந்தது

Updated: Tuesday, June 16, 2026, 11:52 [IST]

Subscribe to Oneindia Tamil

டெல்லி: கரப்பான் பூச்சி கட்சி சார்பில் நாடு முழுக்க போராட்டங்கள் நடந்து வரும் சூழலில், நேற்று ஜெய்ப்பூர் போராட்டத்தில் அக்கட்சியின் நிறுவனர் அபிஜீத் திப்கே மீது தாக்குதல் நடந்தது. இருப்பினும், இந்த தாக்குதலுக்கு எல்லாம் அஞ்சப்போவதில்லை என்று அபிஜீத் திப்கே தெரிவித்துள்ளார். மேலும், இந்தத் தாக்குதலில் ஈடுபட்டவர்கள் ஆர்.எஸ்.எஸ் அமைப்பைச் சேர்ந்தவர்கள் என்றும் அவர் பகிரங்கமாகக் குற்றம் சாட்டியுள்ளார்.

நீட் தேர்வு வினாத்தாள் கசிவு விவகாரம் உட்பட கல்வித் துறையில் நடக்கும் குளறுபடிகளைக் கண்டித்துக் கரப்பான் பூச்சி கட்சி சார்பில் நாடு முழுக்க போராட்டங்கள் நடத்தப்படுகிறது.. குளறுபடிகளுக்குப் பொறுப்பேற்று மத்திய கல்வி அமைச்சர் தர்மேந்திர பிரதான் பதவி விலக வேண்டும் என்பதே அவர்கள் வாதம். இதற்காகக் கரப்பான் பூச்சி கட்சி தொடர் போராட்டங்களை நடத்தி வருகின்றன.

CJP leader Abhijit Dipke addressing supporters during protest

தாக்குதல்

அதன் ஒரு பகுதியாக, ராஜஸ்தான் மாநிலம் ஜெய்ப்பூரில் உள்ள ஷஹீத் ஸ்மாரக் பகுதியில் நேற்று பிரம்மாண்ட போராட்டம் நடைபெற்றது. போராட்டத்தின் போது அபிஜீத் திப்கே தனது ஆதரவாளர்களின் தோள்களில் அமர்ந்து முழக்கமிட்டுக் கொண்டிருந்தார். அப்போது கூட்டத்தில் புகுந்த சிலர், திடீரென திப்கேவை பலமுறை கன்னத்தில் அறைந்தனர். இதனால் அங்கு பெரும் பரபரப்பு ஏற்பட்டது. திப்கேவின் ஆதரவாளர்கள் தாக்குதல் நடத்தியவர்களைப் பிடிக்க முயன்றபோது தள்ளுமுள்ளு ஏற்பட்டது. உடனடியாக தலையிட்ட போலீசார் நிலைமையைக் கட்டுக்குள் கொண்டு வந்தனர்.

இந்தச் சம்பவம் தொடர்பாக ரோஹித் சர்மா, ராகேஷ் குர்ஜார், அஜய் சர்மா, குல்தீப் சிங் மற்றும் நிகேத் ஆகிய ஐந்து பேரை போலீசார் கைது செய்து விசாரணை நடத்தி வருகின்றனர். இதற்கிடையே அடுத்து மகாராஷ்டிரா மாநிலம் நாக்பூரில் நடைபெறவுள்ள போராட்டத்தில் பங்கேற்பதற்காக விமான நிலையம் சென்ற அபிஜீத் திப்கே செய்தியாளர்களிடம் பேசினார்.

ஆர்எஸ்எஸ்

அப்போது அவர், "நாங்கள் காந்தி மற்றும் அம்பேத்கரின் வழியைப் பின்பற்றும் சத்தியாகிரகிகள். இது போன்ற தாக்குதல்களுக்கு நாங்கள் ஒருபோதும் அஞ்சமாட்டோம். என் மீது தாக்குதல் நடத்தியவர்கள் ஆர்எஸ்எஸ் அமைப்பைச் சேர்ந்தவர்கள் என்பது எனக்குத் தெரிய வந்துள்ளது. இந்த அரசுக்கு எதிராகவோ அல்லது அவர்களின் கொள்கைகளுக்கு எதிராகவோ யார் குரல் கொடுத்தாலும், அவர்கள் மீது இதுபோன்ற தாக்குதல்கள் நடத்தப்படுவது வழக்கமாகிவிட்டது" என்றார்.

அவருக்கும் பிரதமர் மோடியை சந்தித்ததாகவும் ஆர்எஸ்எஸ் அமைப்புடன் அவருக்குத் தொடர்பு இருப்பதாகக் கூறப்படும் தகவல்கள் குறித்துப் பேசுகையில், "இந்த தகவல்களில் உண்மை இல்லை. அப்படி எனக்குத் தொடர்பு இருந்தால்.. ஏன் நேற்று என் மீது தாக்குதல் நடத்தினார்கள்?" என்று பதிலுக்குக் கேள்வி எழுப்பினார்.

பின்வாங்க மாட்டோம்

மாணவர்களின் கவனத்தைத் திசைதிருப்பவே இந்த தாக்குதல் நடத்தப்பட்டதாக திப்கே குற்றம் சாட்டினார். அவர் மேலும், "நீங்கள் எவ்வளவு வேண்டுமானாலும் எங்களைத் தாக்குங்கள், ஆனால் நாங்கள் எங்கள் கோரிக்கையிலிருந்து பின்வாங்க மாட்டோம். ஒரு கோடிக்கும் அதிகமான மாணவர்கள் நீட் தேர்வால் அநீதியைச் சந்தித்துள்ளனர். இதற்கு மத்திய கல்வி அமைச்சர் தர்மேந்திர பிரதான் பொறுப்பேற்று பதவி விலக வேண்டும். எங்களது போராட்டம் அமைதியான முறையிலும் ஜனநாயக ரீதியிலும் தொடரும்" என்று அவர் உறுதியாகத் தெரிவித்தார்.

அதேபோல கரப்பான் பூச்சி கட்சியின் தேசிய செய்தித் தொடர்பாளர் அசுதோஷ் ரங்காவும், இந்தத் தாக்குதல் அரசியல் உள்நோக்கம் கொண்டது என்றும் கைது செய்யப்பட்டவர்கள் பாஜகவுடன் தொடர்புடையவர்கள் என்றும் குற்றம் சாட்டினார். ஏற்கனவே பெங்களூரில் கனமழை பெய்த போதிலும், அதையும் தாண்டி இளைஞர்கள் போராட்ட களத்தில் திரண்டனர்.. இதில் நடிகர் பிரகாஷ் ராஜ் உள்ளிட்ட பல முக்கிய பிரமுகர்கள் கலந்து கொண்டனர்.

தொடரும் போராட்டம்

அடுத்த கட்டமாக நாக்பூரில் உள்ள சம்விதான் சதுக்கத்தில் 2,000-க்கும் மேற்பட்டோர் பங்கேற்கும் போராட்டம் நடைபெறவுள்ளது. இதனைத் தொடர்ந்து, ஜூன் 20ம் தேதி டெல்லியை நோக்கிப் பேரணி நடத்தவும் கரப்பான் பூச்சி கட்சி திட்டமிட்டுள்ளது. கல்வி துறையில் நிலவும் முறைகேடுகள், வினாத்தாள் கசிவு மற்றும் வேலையில்லாத திண்டாட்டம் ஆகியவற்றுக்கு எதிராக இளைஞர்கள் ஒன்றிணைய வேண்டும் என்று அபிஜீத் திப்கே அழைப்பு விடுத்துள்ளார்.