"க்ளீன் ஸ்வீப்.." கேரளாவில் "இந்தியா" கூட்டணி தான்.. அவ்வளவு முயன்ற பாஜகவுக்கு ஜீரோ தான்! புது சர்வே

டெல்லி: இடதுசாரிகள் ஆட்சியில் உள்ள கேரளாவில் மொத்தம் இருக்கும் 20 லோக்சபா தொகுதிகளையும் இந்தியா கூட்டணி அப்படியே அள்ளும் என்று இந்தியா டுடே மூட் ஆஃப் தி நேஷன் கருத்துக் கணிப்பில் கூறப்பட்டுள்ளது.

நாடு முழுக்க இன்னும் சில மாதங்களில் லோக்சபா தேர்தல் நடைபெற உள்ளது. இதற்கான பணிகளை அனைத்து அரசியல் கட்சிகளும் மேற்கொண்டு வருகிறது. கூட்டணி, தொகுதிப் பங்கீடு பேச்சுவார்த்தைகள் தொடங்கிவிட்டன.

ஒரு பக்கம் பாஜக தொடர்ந்து மூன்றாவது முறையாக ஆட்சியைத் தக்க வைக்க வேண்டும் என்ற முனைப்பில் களமிறங்குகிறது. மறுபுறம் பாஜகவை வீழ்த்த அனைத்து எதிர்க்கட்சிகளும் இணைந்து இந்தியா கூட்டணியை உருவாக்கியுள்ளன.

லோக்சபா தேர்தல்: இதனால் இந்த இரு கூட்டணிகளுக்கும் இடையே லோக்சபா தேர்தலில் கடும் போட்டி இருக்கும் என்றே கூறப்படுகிறது. பொதுவாகவே இந்தியா கூட்டணிக்குத் தென்மாநிலங்களில் ஆதரவு அதிகமாக இருப்பதாகச் சொல்லப்படுகிறது. பிரபல ஆங்கில ஊடகமான இந்தியா டூடே வெளியிட்டுள்ள மூட் ஆஃப் தி நேஷன் கருத்துக்கணிப்பும் இப்போது அதையே காட்டுகிறது.

கேரளா: புதிதாக உருவாக்கப்பட்ட எதிர்க்கட்சிகளின் "இந்தியா" கூட்டணிக்குக் கேரளாவில் வலுவான ஆதரவு உள்ளதையே இது காட்டுகிறது. கடந்த 2019 மக்களவைத் தேர்தலில் காங்கிரஸ் தலைமையிலான ஐக்கிய முற்போக்குக் கூட்டணி கேரளாவில் 20இல் 19 இடங்களைக் கைப்பற்றி இருந்தது. இதற்கிடையே இந்தத் தேர்தலில் இந்தியா கூட்டணி 20/ 20 இடங்களில் வெல்ல வாய்ப்புள்ளதாகக் கூறப்பட்டுள்ளது.

நாட்டில் உள்ள அனைத்து மக்களவைத் தொகுதிகளிலும் உள்ள 35,801 பேரிடம் டிசம்பர் 15 முதல் ஜனவரி 28 வரை எடுக்கப்பட்ட சர்வே அடிப்படையில் இந்த மூட் ஆஃப் தி நேஷன் கருத்துக் கணிப்பை இந்தியா டூடே செய்தி நிறுவனம் வெளியிட்டுள்ளது.

வாக்கு சதவிகிதம்: கடந்த முறை கேரளாவில் யுபிஏ கூட்டணிக்கு 83 சதவீத வாக்குகள் கிடைத்த நிலையில், இந்த முறை இந்தியா கூட்டணிக்கு வாக்கு சதவிகிதம் சற்று குறையலாம் என கூறப்படுகிறது. இந்தியா கூட்டணிக்கு இந்த முறை கேரளாவில் 78 சதவீதம் வரை வாக்குகள் கிடைக்கும் எனக் கூறப்பட்டுள்ளது.

பாஜக கூட்டணி: மறுபுறம், பாஜக தலைமையிலான என்டிஏ கேரளாவில் தன்னை நிலைநிறுத்தத் தீவிர முயற்சிகள் எடுத்த போதிலும் அதற்குப் பெரியளவில் பலன் இல்லை என்பதையே இது காட்டுகிறது. கடந்த தேர்தல் முடிவைப் போலவே, இந்த முறையும் கேரளாவில் பாஜக கூட்டணிக்கு எந்தவொரு இடமும் கிடைக்காது என்றே மூட் ஆப் தி நேஷன் சர்வேயில் கூறப்பட்டுள்ளது.

அதேநேரம் பாஜகவின் வாக்கு சதவிகிதம் கணிசமாக அதிகரித்துள்ளதாகக் கூறப்பட்டுள்ளது. கடந்த 2019 லோக்சபா தேர்தலில் பாஜக கேரளாவில் 15% வாக்குகளைப் பெற்ற நிலையில், இந்த முறை அவர்களுக்கு 19% வாக்குகள் கிடைக்கும் எனக் கூறப்பட்டுள்ளது.

அதேபோல கேரளாவில் கடந்த 2021இல் சட்டசபைத் தேர்தலும் நடைபெற்றது. அதில் மொத்தமுள்ள 140 தொகுதிகளில் இடதுசாரிகள் 91 இடங்களில் வெற்றி பெற்றது. அப்போது எதிரணியில் இருந்து களமிறங்கிய காங்கிரஸ் கூட்டணிக்கு 47 இடங்கள் கிடைத்தன. மறுபுறம் அத்தனை தொகுதிகளிலும் போட்டியிட்ட பாஜக கூட்டணியால் ஒரே ஒரு இடத்தில் கூட வெல்ல முடியாமல் போனது குறிப்பிடத்தக்கது.

English summary

Mood of the nation survey says BJP will get zero seats in Kerala: Lok Sabha election 2024 survey.