CNN News18 டெல்லி எக்ஸிட் போல் முடிவுகள்: தலைநகரில் பாஜக ஆட்சி.. காங்கிரஸுக்கு பூஜ்ஜியம்?

டெல்லி: டெல்லி சட்டமன்றத் தேர்தலில் தேர்தலுக்குப் பிந்தைய கருத்துக்கணிப்பு முடிவுகள் வெளியிடப்பட்டு வருகின்றன. சி.என்.என் - நியூஸ் 18 நடத்திய கருத்துக்கணிப்பில் பாஜக 40 இடங்களிலும், ஆம் ஆத்மி கட்சி 30 இடங்களிலும் வெல்லும் எனக் கணிக்கப்பட்டுள்ளது. காங்கிரஸ் கட்சி ஒரு இடத்தில் கூட வெல்ல வாய்ப்பில்லை எனக் கருத்துக்கணிப்பில் தெரிவிக்கப்பட்டுள்ளது.

சட்டமன்றத் தேர்தலில் டெல்லி மக்கள் இன்று வாக்களித்து உள்ள நிலையில், வாக்குப்பதிவுக்கு பிந்தைய கருத்துக்கணிப்புகள் வெளிவரத் தொடங்கியுள்ளன. டெல்லி தேர்தல் முடிவுகள் வரும் பிப்ரவரி 8 சனிக்கிழமை அன்று அறிவிக்கப்படும் நிலையில், டெல்லி வாக்காளர்களின் நாடித்துடிப்பை அறிய முயன்ற எக்ஸிட் போல் கணிப்புகள் வெளியிடப்பட்டுள்ளன.

டெல்லி சட்டமன்றத் தேர்தல்

டெல்லியை பொறுத்தவரை 1.56 கோடி வாக்காளர்கள் உள்ளனர். இதில் 83.76 லட்சம் ஆண் வாக்காளர்கள், 72.36 லட்சம் பெண் வாக்காளர்கள் மற்றும் 1,267 திருநங்கை வாக்காளர்கள். இவர்களில் இன்று 60 சதவீதத்துக்கும் அதிகமானோர் வாக்களித்துள்ளனர்.

வாக்குப்பதிவு முடிந்தவுடன், டெல்லி மக்களின் மனநிலை என்ன என்பதைக் காட்டும் வாக்குப்பதிவுக்கு பிந்தைய கருத்துக்கணிப்புகள் வெளியிடப்பட்டு வருகின்றன. இந்திய தேர்தல் ஆணையத்தின் வழிகாட்டுதல்களின்படி, வாக்குப்பதிவு முடிந்த அரை மணி நேரத்திற்குப் பிறகு வாக்குப்பதிவுக்குப் பிந்தைய கருத்துக்கணிப்புகளை வெளியிடலாம். டெல்லி வாக்குப்பதிவுக்குப் பிந்தைய கருத்துக்கணிப்புகளின் முடிவுகள் மாலை 6:30 மணி முதல் வெளியிடப்பட்டு வருகின்றன.

CNN - நியூஸ் 18 எக்ஸிட் போல்

அதன்படி, சி.என்.என் - நியூஸ் 18 (CNN News18) நடத்திய கருத்துக் கணிப்பின்படி, டெல்லி சட்டசபை தேர்தலில் பாஜக 40 இடங்களிலும், ஆம் ஆத்மி கட்சி 30 இடங்களிலும் வெல்லும் எனக் கணிக்கப்பட்டுள்ளது. காங்கிரஸ் கட்சி ஒரு இடத்தில் கூட வெல்ல வாய்ப்பில்லை என சி.என்.என் கருத்துக்கணிப்பில் தெரிவிக்கப்பட்டுள்ளது.

கடந்த தேர்தலில்

கடந்த 2020 சட்டமன்றத் தேர்தலில், ஆம் ஆத்மி கட்சி பெரும்பான்மையைப் பெறும் என்று கருத்துக் கணிப்புகள் கணித்தன. இந்தியா டுடே-ஆக்சிஸ் மை இந்தியா, ஆம் ஆத்மிக்கு 59-68 இடங்களை கணித்தது. நியூஸ் எக்ஸ்-நேதா, ஜன் கி பாத் மற்றும் இந்தியா நியூஸ் நேஷன் ஆகியவை ஆம் ஆத்மிக்கு 55 இடங்கள் கிடைக்கும் எனக் கணித்தன.

2020 சட்டமன்றத் தேர்தலில் டெல்லி எக்ஸிட் போல்கள் துல்லியமாக நிரூபிக்கப்பட்டன. ஏனெனில் ஆம் ஆத்மி 62 இடங்களை வென்றது, பாரதிய ஜனதா கட்சி 8 இடங்களை வென்றது. தேசிய தலைநகரில் காங்கிரஸ் கட்சியால் ஒரு இடத்தைக் கூட வெல்ல முடியவில்லை என்பது குறிப்பிடத்தக்கது.

English summary

The exit poll results for the Delhi Assembly elections are being released. A CNN-News18 poll has predicted that the BJP will win 40 seats and the Aam Aadmi Party 30. The survey has predicted that the Congress party will not win a single seat.