காங்கிரசையடுத்து இந்திய கம்யூனிஸ்ட்.. 11 கோடியை உடனே செலுத்துங்க.. வருமான வரித்துறை நோட்டீஸ்

டெல்லி: காங்கிரஸ், திரிணாமுல் காங்கிரஸ் கட்சிகளை தொடர்ந்து இந்திய கம்யூனிஸ்ட் கட்சிக்கும் வருமான வரித்துறை நோட்டீஸ் அனுப்பி உள்ளது பரபரப்பை ஏற்படுத்தியுள்ளது.

லோக்சபா தேர்தல் நாடு முழுவதும் வரும் ஏப்ரல் 19ஆம் தேதி தொடங்கி, ஜூன் 1ஆம் தேதி வரை 7 கட்டங்களாக நடைபெற உள்ளது. வாக்கு எண்ணிக்கை ஒரே நாளில் ஜூன் 4ஆம் தேதி நடைபெற உள்ளது. லோக்சபா தேர்தலையொட்டி, அனைத்து அரசியல் கட்சிகளும் வேட்பாளர்களை அறிவித்து, தீவிரமாக தேர்தல் பிரச்சார பணிகளில் ஈடுபட்டு வருகின்றன.

இந்நிலையில், காங்கிரஸ் கட்சிக்கு வரி பாக்கி செலுத்துமாறு வருமான வரித்துறை நோட்டீஸ் அனுப்பியது. அதைத்தொடர்ந்து, இந்திய கம்யூனிஸ்ட் கட்சிக்கும் வருமான வரித்துறை, ரூ. 11 கோடி பாக்கியை செலுத்துமாறு நோட்டீஸ் அனுப்பியுள்ளது.

கடந்த சில ஆண்டுகளாக பழைய PAN கார்டு எண்ணை பயன்படுத்தி இந்திய கம்யூனிஸ்ட் கட்சி வரி தாக்கல் செய்துள்ளதாக குறிப்பிட்டுள்ள வருமான வரித்துறை, வரி பாக்கி மற்றும் வரி கணக்கு தாக்கல் முரண்பாடுகளுக்காக ரூ. 11 கோடியை செலுத்த வேண்டும் என சிபிஐ கட்சிக்கு நோட்டீஸ் அனுப்பியுள்ளது.

முன்னதாக, முந்தைய ஆண்டுகளில் தாக்கல் செய்யப்பட்ட வரிக் கணக்குகளில் உள்ள முரண்பாடுகளுக்காக, 1,823 கோடி ரூபாய் பாக்கி தொகையை செலுத்துமாறு, வருமான வரித்துறை, காங்கிரஸ் கட்சிக்கு நோட்டீஸ் அனுப்பியுள்ளது.

ஏற்கெனவே, வருமான வரித் துறையால் காங்கிரஸ் கட்சியின் வங்கி கணக்கு முடக்கப்பட்டதுடன், ரூ.210 கோடி அபராதமும் விதிக்கப்பட்டுள்ளது. இதனால், காங்கிரஸ் ஏற்கனவே நிதி நெருக்கடியை எதிர்கொண்டுள்ள நிலையில் தற்போது மேலும் அபராதம் விதித்து நோட்டீஸ் அனுப்பப்பட்டுள்ளது

ஏப்ரல் 19ஆம் தேதி தொடங்கும் மக்களவைத் தேர்தலுக்கு முன்னதாக இந்தியா கூட்டணி கட்சிகள் நிதி ரீதியாக சிக்கலை எதிர்கொள்ள வேண்டும் என்பதற்காக, எதிர்க்கட்சிகளை முடக்கும் வகையில், பாஜக வருமான வரித்துறையை பயன்படுத்தி வருகிறது என்று எதிர்க்கட்சிகள் குற்றம்சாட்டியுள்ளன.

English summary

Ahead of Lok Sabha Election, CPI gets Income Tax department notice for Rs 11 crore dues on same day as Congress.