சிஏஏ சட்டம் அமல்.. அறிவித்த உள்துறை அமைச்சகம்.. அடுத்த நொடியே.. முடங்கிய அரசு வெப்சைட்!

டெல்லி: சிஏஏ எனப்படும் குடியுரிமை திருத்தச் சட்டம் அமல்படுத்தப்பட்டுள்ளதாக மத்திய அரசு இன்று அறிவிக்கை வெளியிட்டது. இந்தச் சட்டத்தை அமல்படுத்துவதற்கான விதிகள் அறிவிக்கையில் இடம் பெற்றிருப்பதால் அதை படிக்க பலரும் இணையதளத்திற்கு சென்றனர். இதனால், மத்திய அரசின் கெசட் இணையதளம் முடங்கியது.

லோக்சபா தேர்தல் அறிவிப்பு எப்போது வேண்டுமானாலும் அறிவிக்கப்படலாம் என்ற பரபரப்பு நாடு முழுவதும் நிலவுகிறது. இன்னும் ஓரிரு தினங்களில் தேர்தல் ஆணையம் தேர்தல் தேதியை அறிவித்து விடும் என்று எதிர்பார்க்கப்படுகிறது. தேர்தல் பரபரப்புக்கு நடுவே.. இன்று மாலை 5 மணியளவில் பிரதமர் மோடி நாட்டு மக்களுக்கு உரையாற்றுவதாக அறிவிப்பு ஒன்று வெளியானது.

தொலைக்காட்சியில் மோடி பேசப்போகிறார் என்று அறிவிப்பு வெளியானதுமே நாட்டு மக்கள் மத்தியில் பரபரப்பு தொற்றிக்கொண்டது. தேர்தல் நெருங்கும் நேரத்தில் வரிசையாக பல்வேறு திட்டங்கள் அறிவிக்கப்பட்டு வரும் நிலையில், அதையொட்டிய அறிவிப்புகள் வரலாம் என்பது ஒருபக்கம்.. குடியுரிமை திருத்த சட்டம் பற்றிய அறிவிப்பு வரலாம் என ஒருபக்கம் என காரசாரமாக டீக்கடை முதல் டிவிட்டர் வரை விவாதம் கிளம்பியது.

சிஏஏ சட்டம் அமல்: ஆனால், 5.30 மணியளவில் அக்னி ஏவுகணை சாதனை பற்றிய அறிவிப்பை மோடி தனது எக்ஸ் தளத்தில் வெளியிட்டார். மோடி அறிவிக்கப்போவதாக இருந்த அறிவிப்பு இதுதான்.. என நினைத்த மக்கள் மத்தியில் கொஞ்சம் பரபரப்பு அடங்க தொடங்கியது. ஆனால் அடுத்த சில நிமிடங்களில் குடியுரிமை திருத்த சட்டம் தொடர்பான அறிவிப்பை உள்துறை அமைச்சகம் அறிவித்தது. இந்தச் சட்டத்தை அமல்படுத்துவதற்கான விதிகளும் வெளியிடப்பட்டன.

பாகிஸ்தான், ஆப்கானிஸ்தான், வங்கதேசம் ஆகிய நாடுகளிலிருந்து இந்தியாவில் குடியேறிய முஸ்லிம் அல்லாத பிற மதத்தை சேர்ந்தவர்களுக்கு குடியுரிமையை அளிக்கும் சிஏஏ எனப்படும் குடியுரிமை திருத்த சட்டம் 2019 ஆம் ஆண்டு டிசம்பர் மாதம் நாடாளுமன்றத்தில் நிறைவேற்றப்பட்டது. ஜனாதிபதி ஒப்புதல் பெறப்பட்டாலும் இந்த சட்டம் நிறைவேற்றப்படாமல் இருந்து வந்தது.

மத்திய அரசின் இணையதளம் முடங்கியது: கடுமையான எதிர்ப்பும் கிளம்பியதால் சட்டத்தை அமல்படுத்தாமல் கிடப்பில் போட்ட மத்திய அரசு.. தேர்தல் நெருங்கும் நிலையில், அமல்படுத்துவதாக அறிவித்துள்ளது. குடியுரிமை திருத்தம் சட்டம் தொடர்பான அறிவிக்கை வெளியானதுமே.. அரசின் அறிவிக்கைகள் வெளியிடப்படும் The Gazette of India என்ற இணையதளத்திற்கு பலரும் படையெடுத்தனர்.

இதனால், மத்திய அரசின் இந்த இணையதளம் முடங்கியது. குடியுரிமை திருத்த சட்டத்தின் அறிவிக்கை மற்றும் அதன் வழிமுறைகளை தெரிந்து கொள்ள சென்ற பலரும் இணையதளம் முடங்கியதால், ஏமாற்றம் அடைந்தனர்.

English summary

The Central Government has issued a notification today that the Citizenship Amendment Act known as CAA has been implemented. Many went to the website to read the rules for implementation of the Act as it was placed in the notification. Due to this, the central government's gazette website was paralyzed.