அரவிந்த் கெஜ்ரிவாலுக்கு நான் சப்போர்ட் பண்ன மாட்டேன்.. டக்கென சொன்ன ஒவைசி.. எதுக்காகவாம் தெரியுமா?

டெல்லி: மத்திய அரசு கொண்டு வந்த அவசர சட்டத்திற்கு எதிராக எதிர்க்கட்சிகளை சந்தித்து டெல்லி முதல்வர் அரவிந்த் கெஜ்ரிவால் ஆதரவு திரட்டி வருகிறார். இந்த நிலையில், கெஜ்ரிவாலுக்கு தன்னுடைய ஆதரவு கிடையாது என்று ஐதராபாத் எம்.பி ஒவைசி தெரிவித்துள்ளார்.

டெல்லியில் ஆம் ஆத்மி கட்சியின் ஆட்சி நடைபெற்று வருகிறது. முதல்வராக அக்கட்சியின் ஒருங்கிணைப்பாளர் அரவிந்த் கெஜ்ரிவால் பதவி வகித்து வருகிறார். டெல்லியை பொறுத்தவரை யூனியன் பிரதேசம் என்பதால் துணை நிலை ஆளுநருக்கும் முதல்வருக்கும் இடையே பல்வேறு விவகாரங்களில் முட்டல் மோதல் நீடிக்கிறது.

டெல்லியில் காவல்துறை உள்ளிட்ட பல்வேறு துறைகள் மத்திய உள்துறை அமைச்சக கட்டுப்பாட்டில் தான் உள்ளது. இதனால், மத்தியில் ஆளும் பாஜக அரசுக்கும் டெல்லியில் ஆட்சி செய்து வரும் ஆம் ஆத்மி அரசுக்கும் இடையேயும் அதிகாரப்பகிர்வு, ஆட்சி அதிகாரம் உள்ளிட்ட பல விஷயங்களில் மோதல் போக்கு நீடித்து வருகிறது.

இந்த சூழலில் தான், கடந்த சில தினங்களுக்கு முன்பாக உச்ச நீதிமன்றம் அளித்த ஒரு தீர்ப்பு, இந்த கருத்து மோதல் உச்சத்தை அடைய வழி வகுத்தது. அதாவது, டெல்லியில் அதிகாரிகள் மாற்றம், நியமனம் போன்றவற்றில் யாருக்கு அதிகாரம் என்பது தொடர்பாக டெல்லி அரசுக்கும், மத்தியில் ஆளும் பாஜக அரசுக்கும் இடையே மோதல் நீடித்து வந்தது.

இது தொடர்பாக நீதிமன்றத்தின் கதவு தட்டப்பட்ட நிலையில், தேர்ந்தெடுக்கப்பட்ட டெல்லி அரசுக்கு தான் அதிகாரம் இருப்பதாக உச்ச நீதிமன்றம் அதிரடி தீர்ப்பை அளித்தது. ஆனால், அதற்கு மறுநாளே உச்ச நீதிமன்ற உத்தரவை நீர்த்து போக செய்யும் விதமாக மத்திய அரசு அவசர சட்டம் கொண்டுவந்துள்ளது.

இது தொடர்பாக எதிர்க்கட்சிகளின் தலைவர்களை சந்தித்து வரும் கெஜ்ரிவால் மாநிலங்களவையில் அவசர சட்டம் வரும் போது அதற்கான ஆதரவை திரட்டும் முயற்சிகளில் ஈடுபட்டு வருகிறார். அந்த வகையில் பீகார் மாநில முதல்வர் நிதிஷ்குமார், மம்தா பானர்ஜி, உத்தவ் தாக்கரே, சரத் பவார் ஆகியோரை சந்தித்து மத்திய அரசின் அவசர சட்டத்துக்கு எதிரான ஆம் ஆத்மியின் போராட்டத்துக்கு ஆதரவு தெரிவிக்கும்படி கேட்டுக்கொண்டார்.

தமிழக முதல்வர் மு.க ஸ்டாலினையும் கெஜ்ரிவால் இன்று சந்திக்க இருக்கிறார். இப்படி மத்திய அரசுக்கு எதிராக தீவிரமாக எதிர்கட்சிகளின் தலைவர்களை கெஜ்ரிவால் சந்தித்து வரும் நிலையில், மத்திய அரசை பல விவகாரங்களில் மிக கடுமையாக எதிர்க்கும் ஐதராபத் எம்.பியும் ஏஐஎம்ஐஎம் கட்சியின் தலைவருமான ஒவைசி, கெஜ்ரிவாலுக்கு ஆதரவு கொடுக்க மாட்டேன் என அறிவித்து இருப்பது அரசியல் வட்டாரத்தில் உற்று பார்க்க வைத்துள்ளது.

இது தொடர்பாக ஒவைசி கூறும் போது, "ஆம் ஆத்மி கட்சியின் ஒருங்கிணைப்பாளர் கெஜ்ரிவால் தீவிர இந்துத்வாவை பின்பற்றுகிறார். காஷ்மீருக்கு சிறப்பு அந்தஸ்தை ரத்து செய்யும் போது கெஜ்ரிவால் ஏன் பாஜகவுக்கு ஆதரவாக இருந்தார். தற்போது ஏன் கதறுகிறார்? நான் கெஜ்ரிவாலுக்கு ஆதரவு கொடுக்க போவது இல்லை. ஏனெனில் அவர் இந்துத்வாவை மென்மையாக ஆதரிக்கிறார் என்றல்ல... மிக தீவிரமாக அவர் இந்துத்வாவை ஆதரிக்கிறார்" என்றார்.

English summary

Delhi Chief Minister Arvind Kejriwal is meeting opposition parties against the Emergency Act brought by the central government and garnering support. In this situation, Hyderabad MP Owaisi said that Kejriwal does not have his support.