ஞானேஷ் குமார் தகுதி நீக்கம் செய்வதற்கான.. காங்கிரஸ் கட்சியின் மாதிரி நாடாளுமன்றம் தொடங்கியது
டெல்லி: தலைமை தேர்தல் ஆணையர் ஞானேஷ் குமாரை தகுதி நீக்கம் செய்வது தொடர்பாக மாதிரி நாடாளுமன்றம் கூட்டம் என்ற பெயரில் காங்கிரஸ் கட்சி இன்று போராட்டத்தை அறிவித்துள்ளது. அதன்படி மல்லிகார்ஜுன கார்கே இல்லத்தில் மாதிரி நாடாளுமன்றம் அமைக்கப்பட்டு ஞானேஷ் குமாரை தகுதி நீக்கம் செய்வதற்கான நடவடிக்கைகள் தொடங்கி உள்ளது.

வாக்காளர் பட்டியல் சிறப்பு தீவிர திருத்த நடவடிக்கைகளில் தன்னிச்சையாக செயல்பட்டதாக தலைமை தேர்தல் ஆணையர் ஞானேஷ்குமாருக்கு எதிராக எதிர்க்கட்சிகள் போர்க்கொடி தூக்கியுள்ளன.
ஞானேஷ்குமார் பதவி விலகும் வரை ஓய மாட்டோம் என்று கூறி காங்கிரஸ் தலைமையிலான இந்தியா கூட்டணி கட்சி எம்பிக்கள் டெல்லியில் தொடர் போராட்டங்களில் ஈடுபட்டு வருகிறார்கள்.
இதே விவகாரத்தில் நாளை டெல்லியில் பிரமாண்ட பேரணியை காங்கிரஸ் நடத்த உள்ளது. இந்த பேரணியில் நாடு முழுவதும் இருந்து லட்சக்கணக்கானவர்கள் பங்கேற்பார்கள் என்று காங்கிரஸ் கூறியுள்ளது.
இந்த போராட்டத்துக்கு முன்பாக க ஞானேஷ்குமாரை தகுதி நீக்கம் செய்வது தொடர்பாக மாதிரி நாடாளுமன்றம் கூட்டம் என்ற பெயரில் போராட்டத்திற்கு காங்கிரஸ் அழைப்பு விடுத்தது.
பொது பதவி நீக்க நிகழ்வு என்ற பெயரில் போராட்டத்திற்கான ஏற்பாடுகளை காங்கிரஸ் தீவிரமாக மேற்கொண்டு வந்தது. இந்த போராட்டம் மழையால் நேற்று ஒத்திவைக்கப்பட்டது.
இதையடுத்து, மல்லிகார்ஜுன கார்கே வீட்டில் ராகுல் காந்தி உள்ளிட்ட காங்கிரஸ் கட்சியின் முக்கிய தலைவர்கள் ஆலோசனை நடத்தினர். இந்த ஆலோசனைக்கு பிறகு, தலைமை தேர்தல் கமிஷனருக்கு எதிரான பொது தகுதி நீக்க நிகழ்வு போராட்டத்தை இன்று நடத்துவது என முடிவு செய்யப்பட்டது.
அதன்படி காங்கிரஸ் தலைவர் மல்லிகார்ஜுன கார்கே வீட்டில் மாதிரி நாடாளுமன்றம் அமைக்கப்பட்டது. முன்னாள் சபாநாயகர் மீரா குமார் சபாநாயகர் இருக்கையில் அமர்ந்து சபையை நடத்துகிறார். மல்லிகார்ஜுன கார்கே, சோனியா காந்தி, ராகுல் காந்தி, பிரியங்கா காந்தி உள்பட காங்கிரஸ் மற்றும் அதன் கூட்டணி கட்சி எம்பிக்கள் இந்த மாதிரி நாடாளுமன்றத்தில் பங்கேற்றுள்ளனர்.
ஒவ்வொரு தலைவர்களும் இந்த மாதிரி நாடாளுமன்றத்தில் முதலில் பேசுவார்கள். கடைசியாக இந்திய தேர்தல் ஆணையர் ஞானேஷ் குமாரை தகுதி நீக்கம் தீர்மானம் கொண்டு வரப்பட்டு நிறைவேற்றப்பட உள்ளது. இதன்மூலம் ஞானேஷ் குமாருக்கு எதிராக காங்கிரஸ் உள்பட அதன் கூட்டணி கட்சியினர் வித்தியாசமான முறையில் எதிர்ப்பை பதிவு செய்கின்றனர்.


Click it and Unblock the Notifications
