நாடு சந்திக்கும் 22வது பொது வேலை நிறுத்தம்! 17 அம்ச கோரிக்கைகள் என்னென்ன?

டெல்லி: இந்தியா சுதந்திரம் அடைந்த பின்னர் தொடர்ந்து பல பொது வேலை நிறுத்தங்களை சந்தித்து வருகிறது. அந்த வகையில் இன்று 22வது பொது வேலை நிறுத்தத்தை நாடு சந்திக்கிறது. 17 அம்ச கோரிக்கைகளை முன் வைத்து இந்த பந்த் நடக்கிறது.

அகில இந்திய பொது வேலை நிறுத்த கோரிக்கைகள் பின்வருமாறு,

1.புதிய நான்கு தொழிலாளர் சட்டத்தொகுப்புகளை திரும்ப பெற வேண்டும்.

2.அமைப்புசாரா தொழிலாளர், ஒப்பந்த தொழிலாளர், திட்டம் சார்ந்த தொழிலாளர் உட்பட அனைவருக்கும் மாதமொன்றுக்கு குறைந்தபட்ச ஊதியம் ரூ.26,000/- நிர்ணயம் செய்ய வேண்டும்.

3.ஒப்பந்த, தினக்கூலி, வெளிச்சந்தை முறை, பயிற்சியாளர் போன்ற பெயர்களில் நடக்கும் சுரண்டலுக்கு முடிவு கட்ட வேண்டும். ஒப்பந்த தொழிலாளர்களுக்கு சம வேலைக்கு சம ஊதியம் வழங்க வேண்டும்.

4.அமைப்புசாரா தொழிலாளர் உட்பட அனைத்து தொழிலாளர்களுக்கும் குறைந்தபட்ச ஓய்வூதியம் ரூபாய் 9,000 மற்றும் சமூக பாதுகாப்பை உறுதி செய்ய வேண்டும். வீடு சார் தொழிலாளர்கள், தாள் சேகரிக்கும் தொழிலாளர்கள், தெருவோர வியாபாரிகள், வீட்டு வேலை செய்யும் தொழிலாளர்கள், கட்டுமான தொழிலாளர்கள், புலம்பெயர் தொழிலாளர்கள், திட்டம் சார் தொழிலாளர்கள், விவசாய தொழிலாளர்கள், கடைகள் மற்றும் நிறுவன தொழிலாளர்கள், சுமைப்பணி தொழிலாளர்கள், உப்பள தொழிலாளர்கள், பீடி தொழிலாளர்கள், கார், ஆட்டோ டாக்ஸி தொழிலாளர்கள், மீனவ சமூகத்தினர் உள்ளிட்டோரை பதிவு செய்து ஓய்வூதியம் உட்பட சமூக பாதுகாப்பு திட்டங்களை உருவாக்க வேண்டும்.

5.பழைய ஓய்வூதிய திட்டத்தை அமலாக்க வேண்டும்.

6.போனஸ், வருங்கால வைப்பு நிதி, பணிக்கொடை போன்றவைகளுக்கு உள்ள உச்சவரம்பை நீக்க வேண்டும். பணிக்கொடை தொகையை அதிகப்படுத்த வேண்டும்.

7.விண்ணப்பித்த 45 நாட்களுக்குள்ளாக தொழிற்சங்கத்தை பதிவு செய்வதை கட்டாயமாக்க வேண்டும்.

8.விலைவாசி உயர்வை கட்டுப்படுத்த வேண்டும். உணவு, மருந்து, வேளாண் இடுபொருட்கள் போன்ற அத்தியாவசிய பொருட்கள் மீதான ஜிஎஸ்டியை ரத்து செய்திட வேண்டும்.

8. பெட்ரோலிய பொருட்கள் மற்றும் சமையல் எரிவாயு மீதான மத்திய கலால் வரியை கணிசமாக குறைத்திட வேண்டும். உணவு பாதுகாப்பை உத்திரவாதப்படுத்தி, பொது விநியோக திட்டத்தை பரவலாக்க வேண்டும்.

9.பொதுத்துறை நிறுவனங்கள், அரசு துறைகள், தனியார் மயத்தை நிறுத்திடு, தேசிய பணமாக்கல் திட்டத்தை (NMP) ரத்து செய்ய வேண்டும். தற்போது உள்ள சுரங்க சட்டத்தை திருத்த வேண்டும். நிலக்கரி சுரங்கங்கள் உட்பட சுரங்கங்களின் 50% லாபத்தை பழங்குடியினர் மற்றும் விவசாயிகள் உள்ளிட்ட உள்ளூர் சமூக மேம்பாட்டிற்கு ஒதுக்கிட வேண்டும்.

10.விவசாய பொருள்களுக்கு குறைந்தபட்ச ஆதார விலையை C2 + 50 என்ற முறையில் நிர்ணயம் செய்ய வேண்டும். விவசாயிகளுக்கு கொடுத்த உறுதி மொழியை நிறைவேற்ற வேண்டும்.

11.மின்சாரத் திருத்த சட்டத்தை திரும்பப் பெற வேண்டும். மின்சாரத்தை தனியார்மயமாக்குவதை கைவிட வேண்டும். ஸ்மார்ட் மீட்டர் முறையை கைவிட வேண்டும்.

12.வேலை பெறுவதை அடிப்படை உரிமையாக்க வேண்டும். காலிப் பணியிடங்களை நிரப்ப வேண்டும். மகாத்மா காந்தி ஊரக வேலை திட்டத்தை நகரங்களுக்கும் விரிவுபடுத்த வேண்டும்.

13.கல்வி, மருத்துவம், தண்ணீர் அனைவருக்கும் கிடைப்பதை உரிமையாக்க வேண்டும். புதிய கல்விக் கொள்கையை திரும்பப் பெற வேண்டும். அனைவருக்கும் வீட்டு வசதியை உறுதி செய்திட வேண்டும்.

14.வன உரிமைச்சட்டத்தை கடுமையாக அமுலாக்க வேண்டும். 2023 - வனப் பாதுகாப்புச் சட்ட திருத்தத்தை திரும்பப் பெற்றிட வேண்டும்.

15.கட்டட தொழிலாளிக்கும் இஎஸ்ஐ திட்டத்தை விரிவுபடுத்த வேண்டும். புலம்பெயர் தொழிலாளர் சட்டத்தை வலிமைப்படுத்த வேண்டும்.

16.பெரும் செல்வந்தர்களுக்கு வரி விதித்திட வேண்டும். கார்ப்பரேட் வரியை அதிகப்படுத்தி, சொத்து வரி மற்றும் பரம்பரை வரியை மீண்டும் கொண்டு வர வேண்டும்.

17.அரசியலமைப்புச் சட்டத்தின் மீதான தாக்குதலை நிறுத்த வேண்டும். கருத்துரிமை, மதச் சுதந்திரம், பன்முக கலாச்சாரம், கூட்டாட்சி முறை மீதான தாக்குதலை நிறுத்த வேண்டும்.

என 17 அம்ச கோரிக்கைகளை முன்வைத்து இன்று நாடு முழுவதும் பந்த் நடக்கிறது. இதில் சுமார் 25 கோடி தொழிலாளர்கள் பங்கேற்பார்கள் என்று சொல்லப்படுகிறது.

English summary

India is witnessing its 22nd general strike since independence, as workers and trade unions unite nationwide to press for 17 major demands. This Bharat Bandh reflects the growing unrest over economic, labor, and social issues. The strike has impacted transport, public services, and several sectors across states, reigniting debates on labor rights and government policies.