சனாதனம் பற்றிய உதயநிதி பேச்சு.. நைசாக காங்கிரசை கோர்த்து விட்ட பாஜக தலைவர் நட்டா

டெல்லி: சனாதனத்திற்கு எதிராக அமைச்சர் உதயநிதி ஸ்டாலின் பேசியிருந்தது தேசிய அளவில் பெரும் விவாதமாக எழுந்திருக்கும் நிலையில், "சனாதனத்திற்கு எதிராக திமுக தொடர்ந்து பேசுவதற்கு ராகுல், சோனிய காந்திதான் காரணம்" என பாஜக தேசிய தலைவர் ஜே.பி.நட்டா விமர்சித்துள்ளார்.

தமிழ்நாடு முற்போக்கு எழுத்தாளர் மற்றும் கலைஞர்கள் சங்கத்தின் சார்பில் சமீபத்தில் சென்னை காமராஜர் அரங்கத்தில் சனாதன எதிர்ப்பு மாநாடு நடைபெற்றது. இந்த மாநாட்டில் சிறப்பு அழைப்பாளர்களாக அமைச்சர்கள் உதயநிதி ஸ்டாலின், பொன்முடி, தமிழ்நாடு சிறுபான்மையினர் ஆணையத்தின் தலைவர் பீட்டர் அல்போன்ஸ், விசிக தலைவர் திருமாவளவன் எம்பி, சிபிஐ மற்றும் சிபிஎம் தலைவர்கள் பங்கேற்றிருந்தனர். இதில் சிறப்புரையாற்றிய உதயநிதி ஸ்டாலின்,

"சனாதனம் என்கிற பெயரே சமஸ்கிருதத்திலிருந்து வந்தது. நிலையானதாகவும், மாற்ற முடியாததாகவும் இருப்பதன் அர்த்தமே சனாதனம். ஆனால், எல்லாவற்றையும் மாற்ற வேண்டும். எதுவுமே நிலையானது கிடையாது, அனைத்தையும் நாம் கேள்வி கேட்க வேண்டும் என்பதற்கு உருவான இயக்கம்தான் கம்யூனிஸ்ட் இயக்கமும், திராவிட முன்னேற்ற கழகமும். சனாதனம் என்பது மலேரியா, டெங்கு போன்றது. அதை எதிர்ப்பது அல்ல, ஒழிக்க வேண்டும் என்பதே நமது நோக்கம்" என்று பேசியிருந்தார்.

இவரது பேச்சுக்கு பாஜக கடும் கண்டனம் தெரிவித்து வருகிறது. உத்தரப் பிரதேசத்தில் சாமியார் ஒருவர் உதயநிதியின் தலைக்கு ரூ.10 கோடி சன்மானம் அறிவித்துள்ளார். டெல்லி, பீகாரில் உதயநிதி மீது காவல்நிலையத்தில் புகார் அளிக்கப்பட்டுள்ளது. அதேபோல உத்திரப் பிரதேசம் ராம்பூர் காவல் நிலையத்தில் உதயநிதி மீது வழக்குப்பதிவு செய்யப்பட்டுள்ளது. இதனைத் தொடர்ந்து பாஜகவின் கண்டனம் அதிகரித்திருக்கிறது.

இதுபோன்ற கண்டனங்களுக்கு பதிலளித்த உதயநிதி ஸ்டாலின், "நான் எந்த சட்ட சவாலையும் சந்திக்க தயாராக உள்ளேன். இது போன்ற காவி மிரட்டல்களுக்கு நாங்கள் அஞ்ச மாட்டோம். நாங்கள் பெரியார், அண்ணா மற்றும் கருணாநிதியை பின்தொடர்பவர்கள். முதலமைச்சர் மு.க. ஸ்டாலின் வழிகாட்டுதலின் கீழ் சமூக நீதியை நிலைநாட்டுவோம். இதனை இன்றும் சொல்வேன், நாளையும் சொல்வேன், என்றென்றைக்கும் சொல்வேன். திராவிட மண்ணில் சனாதனத்தை தடுத்து நிறுத்த வேண்டும் என்ற எங்களது தீர்மானத்தில் இருந்து ஒரு துளி கூட பின்வாங்க மாட்டோம்" என்று கறாராக கூறியிருந்தார்.

இந்நிலையில் சமீபத்தில் பிரதமர் நரேந்திர மோடி தலைமையில் நடைபெற்ற மத்திய அமைச்சரவை கூட்டத்தில், "சனாதனம் குறித்த அவதூறு கருத்துக்களுக்கு மத்திய அமைச்சர் தக்க பதிலடி கொடுக்க வேண்டும்" என்று பிரதமர் மோடி கூறியிருந்தார். இது பெரும் சலசலப்பை ஏற்படுத்தியுள்ளது. கர்நாடக முதலமைச்சர் சித்தராமையா மோடியின் கருத்துக்கு கடும் எதிர்ப்பு தெரிவித்துள்ளார். "பிரதமர் மோடியின் அறிவிப்பு மிகவும் ஆத்திரமூட்டல் மட்டுமல்ல, அரசியலமைப்பிற்கும் எதிரானது" என்று கூறியுள்ளார்.

இருப்பினும் பாஜக திமுக உள்ளிட்ட இந்தியா கூட்டணி கட்சிகள் மீது தொடர் விமர்சனத்தை முன்வைத்து வருகிறது. இந்நிலையில் இன்று பாஜக தேசிய தலைவர் ஜே.பி.நட்டா "சனாானத்திற்கு எதிராக திமுக தொடர்ந்து பேசுவதற்கு ராகுல், சோனியதான் காரணம்" என்று விமர்சித்துள்ளார். இது குறித்து X சோஷியல் மீடியாவில் அவர் பதிவிட்டுள்ளதாவது, "மும்பையில் இந்தியா கூட்டணியின் கூட்டம் நடைபெற்ற இரண்டு தினங்களுக்கு பின்னர் உதயநிதியின் சனாதனத்திற்கு எதிரான கருத்து வெளிவந்துள்ளது.

சனாதனத்திற்கு எதிராக பிரியங்க் கார்கேவும் விமர்சித்துள்ளார். சனாதன தர்மத்திற்கு எதிராகதான் இந்தியா கூட்டணி உருவானது என்பதை திமுக தலைவர்கள் ஒப்புக்கொண்டனர். இது சோனியா காந்தி, ராகுல் காந்தி மற்றும் காங்கிரஸ் வியூகத்தின் ஒரு பகுதி. இந்த அறிக்கை குறித்து காங்கிரஸ் மற்றும் இந்திய கூட்டணி தங்கள் கருத்தை தெளிவுபடுத்த வேண்டும், இந்திய கூட்டணிக்கு அரசியலமைப்பின் விதிகள் பற்றி தெரியாதா?" என்று கேள்வியெழுப்பியுள்ளார்.

English summary

When Minister Udayanidhi Stalin's speech against the Sanatana has become a big debate at the national level, BJP National President JP Ndda has criticized that "Rahul and Sonia Gandhi are the reason why the DMK continues to speak against the Sanatana".