எனது மருமகள் கமலா ஹாரிஸ் சுறுசுறுப்பான துணை அதிபராக திகழ்வார்... தாய்மாமன் கோபாலன் நம்பிக்கை..!

Updated: Sunday, November 8, 2020, 12:04 [IST]

Subscribe to Oneindia Tamil

டெல்லி: அமெரிக்க துணை அதிபராக வெற்றிபெற்றுள்ள கமலா ஹாரிஸ் மிகவும் சுறுசுறுப்பான துணை அதிபராக செயலாற்றுவார் என அவரது தாய்மாமா கோபாலன் பாலகிருஷ்ணன் நம்பிக்கை தெரிவித்துள்ளார்.

மேலும், கமலா ஹாரிஸ் பதவியேற்பு விழாவில் கலந்துகொள்வதற்காக டெல்லியில் இருந்து வாஷிங்டன் செல்லவுள்ளதாகவும் அவர் கூறியுள்ளார்.

ஆங்கில செய்தித் தொலைக்காட்சி ஒன்றுக்கு அவர் அளித்துள்ள பேட்டியில் இதனைக் குறிப்பிட்டுள்ளார்.

தாய்மாமா

''அமெரிக்க துணை அதிபராக தேர்வு செய்யப்பட்டுள்ள கமலா ஹாரிஸ் குறித்து அவரது சொந்த தாய்மாமாவான கோபாலன் பாலகிருஷ்ணன் தனது மகிழ்ச்சியை வெளிப்படுத்தியிருக்கிறார். டெல்லியில் வசித்து வரும் இவர் தனது சகோதரி மகள் வெற்றி குறித்து கூறியிருப்பதாவது; ''அமெரிக்க துணை அதிபர் தேர்வில் கமலா ஹாரிஸ் வெற்றிபெறுவார் என நான் எதிர்பார்த்தேன். இரண்டு நாட்களுக்கு முன்பு கூட கமலா ஹாரிஸிடம் 10 முதல் 15 நிமிடங்கள் வரை தொலைபேசியில் உரையாடினேன். அப்போது கூட நீ தான் வெற்றிபெறுவாய் என அவரிடம் கூறியிருந்தேன்''.

சுமைகளில் பாதி

''அமெரிக்க வரலாற்றில் கமலா ஒரு அற்புதமான துணை அதிபராக செயலாற்றுவார். கருப்பின விவகாரம், பொருளாதாரம், கொரோனா வைரஸ், குடியேற்ற கொள்கைகள், என இப்படி பல பிரச்சனைகள் அமெரிக்காவில் உள்ளன. ஜோ பிடன் ஒரு பொறுப்பான மனிதர். அவர் நிச்சயம் கமலா ஹாரிஸ் தோள்களில் தனது சுமைகளில் பாதியை ஏற்றுவார். அதனை கமலா மகிழ்ச்சியோடு ஏற்றுக்கொண்டு செயலாற்றுவார். வரு மாதங்களில் கமலா ஹாரிஸ் வாஷிங்டனில் மிகவும் பரபரப்பாக இருப்பார் என நினைக்கிறேன்''.

ஜோ பிடனை சந்திப்பேன்

''கமலா ஹாரிஸ் அமெரிக்க துணை அதிபராக பதவியேற்கும் நிகழ்வில் நிச்சயம் நான் கலந்துகொள்வேன். இதற்காக டெல்லியில் இருந்து அமெரிக்காவுக்கு செல்லவிருக்கிறேன். கமலா செனட் உறுப்பினராக தேர்வு செய்யப்பட்டபோதே நான் அவரது பதவியேற்பு நிகழ்ச்சிக்கு சென்றிருந்தேன். அப்போது துணை அதிபராக இருந்த ஜோ பிடனை எனக்கு அவர் அறிமுகம் செய்து வைத்தார். இந்த முறை அதிபராகியுள்ள ஜோ பிடனை சந்திப்பேன் என நான் நாம்புகிறேன்.''

கமலா தாய்

''கமலாவும் அவரது சகோதரியான மாயாவும் அவர்களது தாய், அதாவது என்னோட சகோதரி ஷியாமளாவை போன்றவர்கள். இதில் மாயாவை காட்டிலும் கமலா வாழ்க்கையில் ஷியாமளா இரண்டறக் கலந்தவர் என்றுக் கூட சொல்லலாம். இதில் சந்தேகத்திற்கே இடமில்லை. '' என்று கமலா ஹாரிஸ் தாய்மாமா கோபாலன் பாலாகிருஷ்ணன் தனது கருத்தை பதிவு செய்துள்ளார்.