பாஜக vs "இந்தியா" கூட்டணி.. எந்த கட்சிக்கும் தனிப்பெரும்பான்மை இல்லை! அடுத்து என்ன

டெல்லி: இந்தியாவில் 7 கட்டங்களாக நடைபெற்ற லோக்சபா தேர்தல் கடந்த 1 ஆம் தேதியோடு முடிந்தது. இதற்கிடையே இப்போது வாக்கு எண்ணிக்கை தொடங்கி நடந்து வருகிறது. இதில் பாஜக மற்றும் இந்தியா கூட்டணி இடையே கடும் போட்டி நிலவி வருகிறது. தற்போது வரை பாஜக கூட்டணி 290 தொகுதிகளில் முன்னிலையில் இருக்கும் இந்தியா கூட்டணி 235 தொகுதிகளில் முன்னிலையில் உள்ளது.

உலகின் மிகப்பெரிய ஜனநாயக நாடு இந்தியா. நமது நாட்டின் ஜனநாயக திருவிழா என அழைக்கப்படும் லோக்சபா தேர்தல் கடந்த ஏப்ரல் 19 ஆம் தேதி தொடங்கி ஏழு கட்டங்களாக ஜூன் 01 ஆம் தேதி வரை நடைபெற்றது.

இன்று வாக்கு எண்ணிக்கை: 543 தொகுதிகளில் கடந்த 1.5 மாதங்களுக்கு மேலாக நடந்த தேர்தல் முடிந்த நிலையில் இன்று வாக்கு எண்ணிக்கை நடைபெறுகிறது. குஜராத்தின் சூரத் தொகுதியில் பாஜக வேட்பாளர் போட்டியின்றி தேர்வாகி இருந்தார். இதனால் ஏனைய தொகுதிகளில் வாக்கு எண்ணிக்கை நடைபெறுகிறது.

பாஜகவா? காங்கிரசா?: காலை 8 மணிக்கு வாக்கு எண்ணிக்கை தொடங்கிய நிலையில், வாக்கு எண்ணிக்கை ஒவ்வொரு சுற்று வாரியாக நடந்து வருகிறது.. ஒவ்வொரு சுற்று வாக்கு எண்ணிக்கை முடிந்தவுடன் முன்னிலை நிலவரம் உடனுக்கு உடன் அறவிக்கப்பட்டு வருகிறது. காலை 9 மணியில் இருந்தே முன்னிலை நிலவரம் தெரிய வந்துவிட்டது. இதில் பாஜகவின் என்டிஏ கூட்டணிக்கும் இந்தியா கூட்டணிக்கும் இடையே கடும் போட்டி நிலவி வருகிறது.

தற்போது வரை பாஜக கூட்டணி 290 தொகுதிகளில் முன்னிலையில் இருக்கிறது. பாஜக கூட்டணியைப் பொறுத்தவரை பாஜக 239 இடங்களில் முன்னிலையில் இருக்கும் நிலையில், தெலுங்கு தேசம் 16 தொகுதிகளிலும் ஜேடியு 12 தொகுதிகளிலும் முன்னிலையில் உள்ளன. அதேபோல ஷிண்டே சிவசேனா 6 தொகுதிகளில் முன்னிலையில் இருக்கிறது.

இந்தியா கூட்டணியை பொறுத்தவரை அவர்கள் 235 தொகுதிகளில் முன்னிலையில் உள்ளது. காங்கிரஸ் 99 தொகுதிகள், சமாஜ்வாதி 37 தொகுதிகள், திரிணாமுல் 30 தொகுதிகள், திமுக 22 தொகுதிகளில் முன்னிலையில் உள்ளது. வாக்கு எண்ணிக்கை தொடர்ந்து நடந்து வரும் நிலையில், எந்தக் கட்சிகள் எத்தனை இடங்களைக் கைப்பற்றி உள்ளது என்பது இன்னும் கொஞ்ச நேரத்தில் தெரிந்துவிடும்.

மேலும், எந்தக் கட்சிக்கும் பெரும்பான்மை கிடைக்காத சூழலே இப்போது நிலவுகிறது. பாஜக தனது கூட்டணிக் கட்சிகளுடன் இணைந்து கூட்டணி ஆட்சியை அமைக்கப் போகிறதா.. இல்லை சந்திரபாபு நாயுடு, நிதிஷ்குமாரை தங்கள் பக்கம் இழுத்து "இந்தியா" கூட்டணி ஆட்சியைப் பிடிக்குமா என்பது நாளை தெரிந்துவிடும்.

English summary

Lok Sabha Election Results 2024: The 7-phase Lok Sabha elections in India ended on the 1st. In this situation, the counting of votes is taking place today. Counting of votes will begin at 8 am. Today we will know who will rule India for the next 5 years.