பிரதமர் மோடியின் வீடியோவை டெலிட் செய்த பேஸ்புக்.. கண்கள் சிவந்த மத்திய அரசு.. பறந்த சம்மன்!
டெல்லி: மாணவர் போராட்டங்கள் தொடர்பாக பிரதமர் நரேந்திர மோடி வெளியிட்ட செல்ஃபி வீடியோ பேஸ்புக்கில் இருந்து தற்காலிகமாக நீக்கப்பட்டது தொடர்பாக அதன் தாய் நிறுவனமான மெட்டா மன்னிப்பு கேட்டுள்ளது. தொழில்நுட்பக் கோளாறு காரணமாகவே அந்த வீடியோ தவறுதலாக நீக்கப்பட்டதாகவும், பின்னர் மீண்டும் பதிவேற்றப்பட்டதாகவும் மெட்டா விளக்கம் அளித்துள்ளது.
நீட் போராட்டம் உச்சத்தில் இருந்தபோது பிரதமர் நரேந்திர மோடி கடந்த ஜூலை 23ம் தேதி நள்ளிரவில் தனது சமூக வலைத்தளத்தில் சுமார் 3 நிமிடங்கள் கொண்ட செல்ஃபி வீடியோ ஒன்றை வெளியிட்டார். அதில் நீட் தேர்வு முறைகேடுகள் தொடர்பாக நாடு முழுவதும் மாணவர்கள் போராட்டத்தில் ஈடுபட்டிருந்த நிலையில் அது தொடர்பாக பேசியிருந்தார்.
நீட் வினாத்தாள் லீக்
கேள்வித்தாள் லீக் என்பது லட்சக்கணக்கான மாணவர்களுக்கும் அவர்களின் குடும்பங்களுக்கும் மிகுந்த வேதனையை ஏற்படுத்தும் விஷயம் என்றும், இதுபோன்ற குற்றங்களில் ஈடுபட்டவர்கள் மீது கடுமையான நடவடிக்கை எடுக்கப்படும் என்றும் பிரதமர் மோடி உறுதியளித்திருந்தார். மேலும், சுமார் 22 லட்சம் மாணவர்கள் எதிர்பார்த்திருந்த நீட் தேர்வை தாமதமின்றி நடத்துவது அரசின் மிக முக்கிய பொறுப்பாக இருந்ததாகவும், வினாத்தாளை லீக் செய்தவர்கள் கைது செய்யப்பட்டு சிறையில் அடைக்கப்பட்டுள்ளதாகவும் பிரதமர் குறிப்பிட்டிருந்தார்.
பிரதமர் மோடி வெளியிட்டிருந்த அந்த வீடியோ இன்ஸ்டாகிராமில் 24 மணி நேரத்திற்குள் 30.3 கோடிக்கும் அதிகமான வியூஸ்களை பெற்றிருந்தது குறிப்பிடத்தக்கது. இதனை பாஜக ஆதரவாளர்கள் தங்கள் சமூக வலைத்தள பக்கங்களிலும் ஷேர் செய்து வந்தனர். இருப்பினும், பிரதமர் மோடி பதிவிட்ட இந்த வீடியோ சில மணி நேரங்களிலேயே பேஸ்புக்கில் இருந்து காணாமல் போனது.
கொந்தளிப்பு
மெட்டா நிறுவனமே இதை நீக்கியதாக தகவல்கள் வெளியானது. இதையடுத்து பாஜக தலைவர்கள் மற்றும் பாஜக ஆதரவாளர்கள் மெட்டாவை கடுமையாக விமர்சித்தனர். இது தொடர்பாக பாஜக தலைவர் தஜிந்தர் பக்கா, "இந்திய பிரதமரின் வீடியோவையே தடுக்க பேஸ்புக்கிற்கு யார் அதிகாரம் கொடுத்தது? இந்தியர்கள் என்ன பார்க்க வேண்டும் என்பதை வெளிநாட்டு நிறுவனம் முடிவு செய்ய முடியாது" என்று கடுமையாக சாடியிருந்தார்.
விளக்கம்
சர்ச்சை பெரிதாகிய நிலையில் மெட்டா நிறுவனம் விளக்கம் அளித்தது. இது தொடர்பாக அவர்கள், "அந்த பதிவு தவறுதலாக நீக்கப்பட்டது. தொழில்நுட்ப கோளாறு காரணமாக இப்படி நடந்துவிட்டது. ஆனால், இப்போது அந்த வீடியோ மீட்டெடுக்கப்பட்டுள்ளது" என்று மெட்டா செய்தித் தொடர்பாளர் தெரிவித்துள்ளார். இது முழுக்க முழுக்க தொழில்நுட்பக் கோளாறு காரணமாக ஏற்பட்ட தவறு என்றும் எந்தவித உள்நோக்கமும் இல்லை என்றும் மெட்டா அதிகாரிகள் தெரிவித்துள்ளனர்.
மத்திய அரசு
இருப்பினும், இந்த விளக்கத்தால் மத்திய அரசு திருப்தி அடையவில்லை என தெரிகிறது. இந்த சம்பவத்தை மிகவும் தீவிரமாக எடுத்துக்கொண்டுள்ள மத்திய அரசு, மெட்டாவின் உயர்மட்ட அதிகாரிகளுக்கு சம்மன் அனுப்பி விளக்கம் கேட்டுள்ளது. மெட்டா மற்றும் இன்ஸ்டாகிராமின் உயர்மட்ட அதிகாரிகளுக்கு சம்மன் அனுப்பியுள்ள தகவல் தொழில்நுட்ப அமைச்சகம்,, வீடியோ எப்படி நீக்கப்பட்டது... எப்படி அந்த தவறு நடந்தது, எதிர்காலத்தில் இதுபோன்ற சம்பவங்கள் நடைபெறாமல் இருக்க என்ன நடவடிக்கை எடுக்கப்படும் என்பது குறித்து நேரில் விளக்கம் அளிக்குமாறு கேட்டுள்ளதாக தகவல்கள் தெரிவிக்கின்றன.
நீட் தேர்வு விவகாரத்தில் மாணவர்கள் நடத்திய போராட்டம் கடந்த வாரம் தான் முடிவுக்கு வந்தது. மத்திய அரசு தரப்பில் பலகட்ட பேச்சுவார்த்தைகள் நடத்தப்பட்டன. இருப்பினும், தர்மேந்திர பிரதான் ராஜினாமா செய்தால் மட்டுமே போராட்டம் முடிவுக்கு வரும் என மாணவர்கள் உறுதியாக இருந்தனர். இதையடுத்து கடந்த சனிக்கிழமை தர்மேந்திர பிரதான் தனது பதவியை ராஜினாமா செய்தார். அதைத் தொடர்ந்தே போராட்டம் முடிவுக்கு வந்தது.
Click it and Unblock the Notifications
Sign in with Google
