நபிகள் நாயகம் குறித்த சர்ச்சை.. எனக்கும் குடும்பத்தினருக்கும் கொலை மிரட்டல்.. நவீன் ஜிந்தால் புகார்

Updated: Monday, June 6, 2022, 8:30 [IST]

Subscribe to Oneindia Tamil

டெல்லி: எனக்கும் எனது குடும்பத்தாருக்கும் கொலை மிரட்டல்கள் வருவதால் எனது முகவரியை யாரும் வெளிப்படையாக அறிவிக்க வேண்டாம் என பாஜகவிலிருந்து நீக்கப்பட்ட நவீன் ஜிந்தால் தெரிவித்துள்ளார்.

பாஜகவின் செய்தித் தொடர்பாளராக பதவி வகித்து வந்தவர் நுபுர் சர்மா. இவர் அண்மையில் தனியார் தொலைக்காட்சி நிகழ்ச்சியில் ஞானவாபி வழக்கு குறித்து விவாதத்தில் கலந்து கொண்டார்.

நுபுர் சர்ச்சை

நுபுரின் சர்ச்சை கருத்துகளை டெல்லி பாஜக செய்தித் தொடர்பாளர் நவீன் ஜிந்தால் ஆதரித்திருந்தார். இவருக்கும் கடும் எதிர்ப்பு கிளம்பியது. இதையடுத்து பாஜகவுக்கு அனைத்து தரப்பில் இருந்தும் நெருக்கடி ஏற்பட்ட நிலையில் நுபுர் சர்மாவும் நவீன் ஜிந்தாலும் கட்சியிலிருந்து நீக்கப்பட்டனர்.

கொலை மிரட்டல்

இந்த நிலையில் நவீன் ஜிந்தாலுக்கு தொடர்ந்து மிரட்டல்கள் வருவதாக தனது ட்விட்டர் பக்கத்தில் தெரிவித்துள்ளார். இதுகுறித்து அவர் கூறுகையில் எனக்கும் எனது குடும்பத்தினருக்கும் சமூகவலைதளங்களில் கொலை மிரட்டல் விடுக்கிறார்கள்.

ஜிந்தாலுக்கு கொலை மிரட்டல்

எனவே எனது முகவரியை எல்லோரும் பார்க்கும் படி செய்ய வேண்டாம் என கேட்டுக் கொண்டுள்ளார். இந்த ட்வீட்டை டெல்லி போலீஸுக்கும் டெல்லி துணைநிலை ஆளுநருக்கும் அனுப்பி வைத்துள்ளார். பாஜகவிலிருந்து நுபுர் சர்மாவும் நவீன் ஜிந்தாலும் நீக்கப்பட்ட லெட்டர் பேடில் அவர்களுடைய. முகவரி இருந்தது.

கட்சியின் கருத்து அல்ல

அதை சில மீடியாக்கள் பகிரங்கமாக வெளியிட்டன. இந்த நிலையில் நவீன் ஜிந்தாலின் கோரிக்கையை ஏற்று ஏஎன்ஐ உள்ளிட்ட செய்தி நிறுவனங்கள் அவர்களுடைய முகவரி அடங்கிய ட்வீட்டுகளை டெலிட் செய்துள்ளன. முன்னதாக நுபுர் சர்மா மற்றும் நவீன் ஜிந்தாலின் கருத்துகள் கட்சியின் கருத்து அல்ல என பாஜக தலைமை தெளிவுப்படுத்தியது குறிப்பிடத்தக்கது.